Светските девизни резерви намалени за рекордни илјада милијарди долари

Глобалните девизни резерви паѓаат со најбрзо темпо досега, бидејќи централните банки од Индија до Чешка интервенираат за да ги поддржат своите валути.

Резервите годинава паднаа за околу илјада милијарди долари или 7,8 отсто, на 12 илјади милијарди, што е најголем пад откако Bloomberg почна да собира податоци во 2003 година.

Дел од падот едноставно се должи на промените во вреднувањето. Самиот скок на доларот на највисоко ниво во последните две децении споредено со дел од останатите валути, како еврото и јенот, придонесе за намалување на резервите. Но, смалените резерви, исто така, го одразуваат стресот на пазарите за пари, кој принудува сè поголем број централни банки да заземат борбен став за да се одбранат од депресијација.

Залихите во Индија, на пример, годинава паднаа за 96 милијарди долари на 538 милијарди долари. Централната банка на земјата соопшти дека промените во вреднувањето на средствата се одговорни за 67 отсто од падот на резервите во текот на фискалната година од април, што значи дека остатокот доаѓа од интервенцијата за поддршка на валутата. Рупијата загуби околу 9 отсто во однос на доларот оваа година и достигна рекордно ниско ниво минатиот месец.

Јапонија во септември потроши околу 20 милијарди долари за да го забави падот на јенот во својата прва интервенција за поддршка на валутата од 1998 година. Тоа би претставувало загуба од околу 19 отсто во резервите оваа година. Валутната интервенција во Чешка придонесе резервите на земјата да се намалат за 19 отсто од февруари.

„Сето ова е дел од каталогот за симптоми на канаринци во рудник за јаглен“, вели Аксел Мерк, главен инвестициски директор во Merk Investments, во врска со намалените резерви. „Се појавуваат пукнатини и тие црвени светла ќе ги има сè повеќе“.

Иако големината на падот е извонредна, практиката на користење резерви за одбрана на валутите не е ништо ново. Централните банки купуваат долари и трупаат резерви за да го намалат притисокот врз валутата при наплив на странски капитал. Во лоши времиња, тие црпат резерви за да го ублажат ударот од бегството на капиталот.

Годинава е забележан рекорден пад на светските девизни резерви

„Некои земји, особено во Азија, можат да одат во двата правца, 'пеглајќи' ги слабостите и силните страни“, вели Алан Раскин, главен меѓународен стратег во Deutsche Bank AG.

Повеќето централни банки сè уште имаат доволно муниција за да продолжат да интервенираат доколку сакаат. Девизните резерви на Индија сè уште се за 49 отсто повисоки од нивото од 2017 година и доволни за плаќање на деветмесечен увоз. Централните банки, вклучително и оние на Индонезија, Малезија, Кина и Тајланд, во петок ќе ги објават најновите податоци за девизните резерви.

Но, некои други брзо го исцрпуваат своето. По падот од 42 отсто оваа година, пакистанските резерви од 14 милијарди долари не се доволни за покривање на тримесечен увоз, покажуваат податоците собрани од Bloomberg.