.webp){kind=icon}
Извршниот одбор на Меѓународниот монетарен фонд (ММФ) го одобри кредитот за Македонија од околу 530 милиони евра, преку кредитната линија за претпазливост и ликвидност (ПЛЛ).
„Извршниот одбор на ММФ на 21 ноември одобри двегодишен аранжман за Северна Македонија според линијата за претпазливост и ликвидност (ПЛЛ), во износ од околу 530 милиони евра. Аранжманот ПЛЛ ќе ги поддржи политиките на властите за справување со економските последици од двата последователни глобални шокови: пандемијата на ковид-19 и последиците од руската инвазија врз Украина“, пишува во соопштението што го објави ММФ.
Одобрувањето на кредитната линија овозможува итна исплата на 110 милиони евра, што ќе биде проследено со уште една исплата од околу 155 милиони евра по завршувањето на првиот преглед, планиран во мај 2023 година. Ќе следуваат уште неколку транши.
„Северна Македонија се квалификува за ПЛЛ врз основа на нејзините здрави економски основи, силните рамки на институционалните политики, евиденцијата на добри економски перформанси и имплементацијата на политиките и посветеноста да се одржуваат таквите политики во иднина“, пишува во извештајот на ММФ.
„Со оглед на големата зависност од увозот на енергија, потребата од надворешно финансирање е зголемена, додека во исто време глобалните финансиски услови се заострија, зголемувајќи ги трошоците за пазарно финансирање“, велат од ММФ. Политичките приоритети на властите во рамките на аранжманот ПЛЛ вклучуваат заштита на јавните финансии, намалување на енергетските субвенции и подобрување на енергетската ефикасност со заштита на ранливите категории, справување со високата инфлација и зачувување на финансиската стабилност. Аранжманот ќе помогне да се задоволат потребите за надворешно финансирање во следните 12 месеци и да се обезбеди осигурување од негативни ризици во следната година.
„Владата презеде акција за да го ограничи фискалниот дефицит во 2022 година и да ги консолидира јавните финансии во 2023 година, истовремено заштитувајќи ги оние што беа најмногу погодени од шокот на цените на суровините. Властите воведоа блок тарифи за електрична енергија и ги зголемија тарифите за електрична енергија за да го ублажат фискалното и надворешното влијание на шокот. Тие се посветени на задржување на растот на платите и пензиите, со оглед на ограничениот фискален простор и ризиците од инфлација. За да спречи високата инфлација, Народната банка ја заострува монетарната политика“, се некои од заклучоците на ММФ.
Оттаму забележуваат и дека властите се ангажирани на континуирано намалување на дефицитот на среден рок, поткрепено со новововедените фискални правила.
„Тие ќе ги зголемат јавните инвестиции, додека внимателно ќе управуваат со поврзаните фискални ризици. За да се намалат фискалните и надворешните ранливости на енергетските ценовни шокови, тие планираат постепено да ги укинат нетаргетираните енергетски субвенции, а истовремено да ја зајакнат целната поддршка за ранливите и да ја подобрат енергетската ефикасност“, велат од ММФ.
