.webp){kind=icon}
Инвеститори вложиле 650 милиони долари во два таканаречени фонда за природен капитал со кои управува компанијата „Клајмет асет менаџмент“ (Climate Asset Management), во заедничка сопственост на една од најголемите светски банки, британската ХСБЦ (HSBC), и инвестициската советодавна компанија „Полинејшн“ (Pollination).
Имено, станува збор за нов облик на инвестициски средства, за кој сè поголем интерес покажуваат глобално влијателните инвестициски играчи, како француската „БНП Парибас“ (BNP Paribas), швајцарската „Ломбард Одиер груп“ (Lombard Odier Group) или британската осигурителна компанија „Авива“ (Aviva).
Споменатите фондови ќе инвестираат во земјоделство, заштита на шумите, еколошки проекти и намалување на емисиите на јаглерод преку систем за издавање зелени сертификати.
Природниот капитал во моментот е рапидно растечки тип на инвестициско средство и се обидува да профитира од зголемената подготвеност на инвеститорите да се вклучат во проекти насочени кон запирање на деградацијата на животната средина и заживување на биолошката разновидност.
Намерата на партнерството во кое се вклучени ХСБЦ и „Полинејшн“ е да се создаде најголем фонд за инвестиции во природен капитал преку создавање два фонда со вкупна вредност од три милијарди долари, од кои две милијарди ќе бидат наменети за намалување на емисиите на стакленички гасови.
„ХСБЦ е камен-темелник на двата фонда, а вклучени се и осигурителни компании од Европа и Азија“, рече Кристоф Кучер, главен извршен директор во „Клајмет асет менаџмент“, додавајќи дека следната година се очекува дополнително собирање средства.
„За собирање пари за нова стратегија, нова компанија и нов тип средства е потребно време. Конкуренцијата не спие. Знаеме дека сè повеќе инвеститори го гледаат природниот капитал како нов вид средство“, додава Кучер.
Bloomberg Mercury
Стратегијата на фондовите за природен капитал е да се фокусираат, меѓу другото, на почвите исцрпени од премногу интензивното одгледување во земјите на Организацијата за економска соработка и развој (OECD), со цел да се остварат профити од инвестициите во подобрени методи за обработка на земјиштето, зајакнување на производството и заштита на биолошката разновидност.
Еден од првичните развојни проекти е пренамена на 400 хектари обработливо и често поплавувано земјиште во шпанскиот регион Екстремадура за обновливо производство на бадеми со одредени парцели посветени на биолошката разновидност.
Исто така, како дел од борбата за намалување на емисиите на јаглерод ќе се направат напори за издвојување два милиона хектари обработливо земјиште во шест африкански земји преку сертификати за намалување на јаглеродот.
Зголемениот интерес на инвеститорите веројатно е одраз и на посилниот фокус на политичарите на зелените прашања. Овој месец во Монтреал се одржува конференција на Обединетите нации, каде што 191 земја ќе се обидат да постигнат глобален договор за заштита на биолошката разновидност сличен на климатскиот договор од Париз од 2015 година.
