Светските приноси на државните обврзници највисоки во последните 15 години

Приносите на државните обврзници низ светот продолжија да растат, достигнувајќи ги највисоките нивоа од 2008 година. Добрите економски показатели го уништија оптимизмот на инвеститорите дека централните банки наскоро ќе го запрат циклусот на зголемувања на каматните стапки.

Приносот измерен со индексот на „Блумберг“ за светските државни обврзници се искачи на 3,3 отсто во средата, што е највисоко ниво од август 2008 година. Државниот долг низ светот годинава им донесе на инвеститорите  загуба од 1,2 отсто, што ја прави оваа класа на средства најлоша во споредба со индексите за други обврзници.

Приносот на американските десетгодишни државни должнички хартии од вредност во четвртокот се зголеми за шест базични поени, на 4,31 отсто, така што сега е само за три базични поени понизок од октомврискиот максимум, што е и највисоко ниво од 2007 година. Приносите на австралискиот долг со иста рочност скокнаа за цели 10 базични поени, на највисоко ниво од 2014 година, дури и откако податоците покажаа дека невработеноста се зголемила. Долгот на Нов Зеланд со ист датум на достасување забележа пораст на приносот за 10 базични поени, па сега каматата е над пет отсто за првпат од 2011 година.

„Неодамна објавените податоци се подобри, што ги зголемува  очекувањата дека централните банки ќе имаат уште работа“, рече Пашант Њунаха, стратег во ТД (TD Securities Inc.) во Сингапур. „Сегашната распродажба е поизразена кај хартиите од вредност со подолг рок, што покажува загриженост за понудата и ликвидноста“, додаде тој.

Американските обврзници беа клучен двигател на глобалната распродажба на долгот бидејќи отпорноста на најголемата светска економија им пркоси на очекувањата дека зголемувањето на каматните стапки на Федералните резерви (повеќе од пет процентни поени) ќе ја турнат во рецесија. Хартиите од вредност беа погодени и од очекувањата дека американската влада ќе издаде повеќе обврзници следниот квартал за да го покрие растечкиот федерален дефицит.

Приносите на десетгодишниот американски долг скокнаа за повеќе од 30 базични поени во август, што е најголем месечен пораст од февруари. Покрај тоа, Јапонија - која има најниски стапки во развиениот свет благодарение на ултралабавата монетарна политика - забележа мал интерес од инвеститорите при продажбата на дваесетгодишни обврзници во четвртокот. Според една метрика, побарувачката беше најслаба од 1987 година.

Лов на приноси

Повисоките приноси во САД продолжуваат да привлекуваат купувачи. Инвеститорите годинава вложија 127 милијарди долари во фондови што инвестираат во државни записи, соопшти минатата недела „Банката на Америка“ (Bank of America Corp), цитирајќи податоци од ЕПФР (EPFR Global). Според податоците од Комисијата за тргување со фјучерси на стоки, фондовите ги зголемиле вкупните долги позиции во фјучерси на државни записи и сега се на нов рекорд (во неделата до 8 август). Анкета за клиенти на „ЏП Морган“ (JPMorgan Chase & Co.) покажа дека долгите позиции во неделата до 14 август се на нивоа последен пат забележани во 2019 година и пред тоа во 2010 година.

„Обврзниците низ светот изгледаат особено привлечно со оглед на тоа што САД индиректно ги зголемуваат приносите низ светот во време кога многу економии покажуваат слабост“, вели Стивен Мејџор, шеф за истражување на пазарот на обврзници во ХСБЦ (HSBC Plc).

„Голем дел од песимизмот за обврзниците е поврзан со САД“, напиша тој во белешка во средата. „Затоа недостига глобалната заднина, заедно со долгорочните структурни двигатели. Фактот што некои централни банки на пазарите во развој веќе попуштаат укажува дека инфлацијата брзо паѓа или дека има циклични и структурни пречки“, додаде тој.