Нафтата повторно поскапе поради ќор-сокакот со Иран, а потонаа и јужнокорејските акции

Нафтата поскапе откако американскиот претседател Доналд Трамп изрази сомнеж околу прекинот на огнот со Иран, што ги засили стравувањата дека затворањето на Ормускиот теснец ќе трае подолго. Азиските акции забележаа остри осцилации по повиците во Јужна Кореја за исплата на дивиденда со користење даноци од профитите од ВИ.

Нафтата Брент поскапе за 0,6 отсто на околу 105 долари за барел, бидејќи застојот во преговорите меѓу САД и Иран и продолженото затворање на теснецот укажуваат дека трошоците за енергија ќе останат високи. Тоа изврши дополнителен притисок врз обврзниците, при што приносот на 10-годишните американски државни обврзници порасна за еден базичен поен на 4,42 отсто. Доларот зајакна во однос на сите валути од Групата 10 поради побарувачката за безбедни засолништа.

Јужнокорејскиот индекс Kospi потона за 3,1 отсто, откако висок креатор на политики изјави дека државата треба да им исплати дивиденда на граѓаните користејќи даноци од профитите од ВИ. Коментарите на шефот на претседателската политика Ким Јонг-бом предизвикаа силни осцилации на берзите, додека инвеститорите се обидуваа да го протолкуваат опсегот на неговите предлози.

Азиско-пацифичкиот индекс на MSCI падна за 0,4 отсто, додека фјучерсите на европските берзански индекси укажуваа на пад од 0,7 отсто на европските акции. Пад забележаа и договорите за референтните индекси на Волстрит, откако основните индекси во понеделникот затворија на рекордно високо ниво.

Шестнеделната победничка серија на S&P 500 е меѓу најсилните

Американскиот индекс порасна за повеќе од 16 отсто за шест недели, најмногу од глобалната финансиска криза

Bloomberg

Новите тензии на Блискиот Исток се закануваат да го нарушат растот на глобалните акции, иако силните корпоративни резултати во САД и обновениот бран на ВИ тргување поттикнаа нов бран нагорни ревизии на прогнозите за Волстрит до крајот на годината. Вниманието се насочува и кон американските инфлациски податоци што ќе бидат објавени во вторник, кои ќе покажат колку ценовните притисоци предизвикани од војната се прелеваат во економијата и би можеле да влијаат врз изгледите за каматните стапки на Фед.

Притисоците од Блискиот Исток засега немаат „масовно влијание врз импулсот на раст во САД“, изјави Колин Парди, главен инвестициски директор за јавни пазари во „Манулајф инвестмент“ (Manulife Investment Management).

„Тоа би можело да се случи ако ова трае значително подолго од сегашното. Во моментов гледаме дека Фед паузира“, рече тој.

Што велат стратегистите на Блумберг...

„Комбинацијата од нагло зголемената пазарна вредност и нестабилноста кај најголемите компании на Kospi, како ‘Самсунг’ (Samsung) и ‘СК Хајникс’ (SK Hynix), значи дека ненадејните промени во Јужна Кореја имаат зголемен потенцијал да предизвикаат прелевање на нестабилноста и врз другите средства.“

— Гарфилд Рејнолдс, лидер на тимот МЛИВ.

Прекинот на огнот меѓу САД и Иран влезе во особено нестабилна фаза откако Трамп изјави дека договорот е „на масивна апаратура за одржување во живот“, откако ја отфрли најновата мировна понуда од Техеран. Трамп ја нарече реакцијата на Иран на неговиот предлог „парче ѓубре“ и рече дека „не ја ни дочитал“.

Трамп не посочи дали САД повторно би започнале воени напади врз Иран, како што претходно се закани доколку раководството на Исламската Република не ги прифати неговите услови. Трамп претходно во понеделникот за Фокс Њуз изјави дека разгледува повторно активирање на план за придружба на бродови низ Ормускиот теснец.

„Договорот и натаму е далеку, а ризиците остануваат високи“, изјави Марк Хефеле од инвестициската канцеларија на „УБС“. „Двете страни остануваат под притисок да постигнат договор.“

Трамп во четврток патува за Пекинг на самит со висок влог со кинескиот претседател Шји Џјинпинг, при што трговијата и војната со Иран се очекува да доминираат на агендата. На листата на бизнис-лидери поканети да му се придружат на Трамп на патувањето во Кина не се најде извршниот директор на „Енвидија“ (Nvidia Corp.) Џенсен Хуанг.

Истовремено, трговците ги следат и британската фунта и пазарот на државни обврзници, додека Кир Стармер се соочува со растечки притисок да се повлече од функцијата премиер.

Иако конфликтот со Иран се одолговлекува, фокусот на мал број лидери во ВИ го направи пазарот изненадувачки отпорен на најновите случувања на Блискиот Исток, напиша во белешка Тони Сајкамор, пазарен аналитичар во „ИГ Австралија“ (IG Australia).

Дел од Волстрит е загрижен и дека високите цени на нафтата и стравувањата од можен недостиг би можеле да го прекинат растот на акциите.

Мајкл Бари, инвеститорот кој стана познат по „The Big Short“, предупреди дека индексот Nasdaq 100 се движи кон драматичен пресврт по „параболичниот“ раст што ги доведе вреднувањата на технолошките компании на неодржливо високи нивоа.

„Најголемата грижа е што досега имавме заштитен слој кога станува збор за цените на енергијата, а сега се отвора прашањето кога тоа ќе престане. Кога ќе се исцрпат резервите и кога ова навистина ќе стане проблем“, изјави Сара Хант, главен пазарен стратег во „Алпин Саксон Вудс“ (Alpine Saxon Woods), во интервју за Блумбер ТВ.