Германија го отфрли тврдењето дека планира да купи руска нафта во почетокот на следната година, велејќи дека наместо тоа ќе увезува сурова нафта од Казахстан. Најголемата европска економија претходно соопшти дека планира да го запре увозот на руска сурова нафта до крајот на оваа година, по инвазијата врз Украина.
Сепак, тоа беше доведено во прашање кога главниот извршен директор на рускиот оператор за нафтоводи рече дека добил барања за снабдување во првиот квартал од 2023 година. Германските рафинерии „Леуна“ и „Шведт“ историски зависат од увозот на руска нафта преку цевки. Сега тековите по нафтоводот „Дружба“, најголемиот европски канал за сурова нафта, ќе бидат од Казахстан, иако тој договор сè уште не е финализиран.
„Информациите дека Германија нарачала руска сурова нафта се лажни. Рафинериите ’Леуна’ и ’Шведт’ повеќе нема да нарачуваат руска сурова нафта во новата година“, рече портпаролката на германското министерство за економија. „Рафинеријата PCK во Шведт, во близината на полската граница, има резервирани капацитети за казахстанска нафта во системот од јануари“, додаде таа.
Германските источни рафинерии се зависни од руската сурова нафта / Bloomberg Mercury
Нафтоводните текови од Русија се изземени од забраната на Европската Унија за најголемиот дел од увозот преку море, која започна на 5 декември. Германија и Полска, кои добиваат руска сурова нафта преку северниот крак на врската „Дружба“, ветија дека ќе се одвикнат до декември.
„Тие најавија дека нема да земаат нафта од Русија од 1 јануари, но добивме барања од полски потрошувачи: Дајте ни три милиони тони за следната година и 360.000 тони за декември. Германија веќе испрати барање за првиот квартал: Дајте ни и нам“, рече извршниот директор на „Транснефт,“ Николај Токарев, во интервју за државниот ТВ-канал Росија 24.
Токарев смета дека би било тешко за германските рафинерии да ги заменат сите руски количества со казахстанска сурова нафта и додаде дека иако технички е можно да се спроведат таканаречени операции за размена за делумна замена на руската нафта, тоа е политичка одлука.
Казахстански пратки
Според информациите од министерот за надворешни работи на Казахстан, Мухтар Тилеуберди, централноазиската земја би можела да испраќа од два до пет милиони тони годишно. Казахстанската сурова нафта се испумпува во Самара во Русија, се меша со руските резерви и се извезува преку пристаништата Уст-Луга и Новоросијск. Товарот во сопственост на казахстанскиот „Казтрансоил“, кој сега е означен како KEBCO за да се разликува од REBCO во сопственост на Русија, е изземен од санкциите на ЕУ и нафтата може да се пренасочи од пристаништата во нафтоводот „Дружба“, но за тоа ќе биде потребно учество на рускиот нафтовод.
„Нема разговори со нас за тековите на нафта од Казахстан што минуваат низ Русија, Белорусија и Полска до Германија. Не беа потпишани договори“, изјави портпаролот на „Транснефт“, Игор Дјомин, во телефонска изјава за „Блумберг“.
„Полското барање до ’Транснефт’ беше стандардна процедура за резервација на потенцијален транзитен капацитет“, соопшти минатиот месец националната рафинерија „Орлен“ (PKN Orlen, SA). Компанијата е подготвена да го запре увозот на руска нафта, но за да се случи тоа ѝ требаат владини одлуки.
.webp){kind=icon}