text size
Цените на тоалетната хартија повторно се во пораст, а вината може да се фрли на неочекуван виновник: падот на пазарот на домување. Падот на домувањето предизвика криза во граѓата, поради што фјучерсите паднаа за повеќе од 60 проценти во изминатите 12 месеци. Како резултат на тоа, пиланите ги затвораат работилниците.
Во Канада, најголемиот светски производител на граѓа од иглолисно дрво, приближно една третина од капацитетите на пиланите сега се затворени. Тоа предизвикува турбуленции во глобалниот синџир на снабдување со хартија, што зависи од нуспроизводите произведени во погоните. Сега, светот се соочува со притисок за дрвна маса.
Трошоците за целулоза на глобално ниво се зголемуваат, а производителите на тоалетна хартија, вклучувајќи го и „Кимберли Кларк“ (Kimberly-Clark Corp), ги покачија цените во обид да ги зголемат маржите. Малопродажните цени на тоалетната хартија во САД веќе се зголемија за околу 20 проценти од јули 2021 година до крајот на минатата година. Сагата за тоалетна хартија покажува колку е тешко за глобалните синџири на снабдување да закрепнат од проблемите што ги измачуваа пазарите на стоки во последните неколку години. Зголемената нестабилност, логистичките проблеми предизвикани од пандемијата и руската инвазија врз Украина предизвикаа диви промени на цените и недостиг од одредени суровини. Тоа нагласува зошто е тешко да се скроти инфлацијата предизвикана од понудата.
Bloomberg Mercury
Што се однесува до дрвната граѓа, пазарот почна да паѓа по вртоглавиот скок до рекордно високо ниво во 2021 година. Пресвртот предизвика некои производители во Канада да ја прекинат работата или да ги затворат производствените погони. Тоа е регион што произведува врвен вид пулпа, позната по тоа што дава пријатно чувство на висококвалитетна тоалетна хартија. На Канада отпаѓа околу половина од глобалното производство на такви влакна.
„Вистинска штета е што фабриката не работи. Компаниите не можат да ги заменат влакната со послаб квалитет и да ги постигнат истата цврстина и мекост во ткивото, бидејќи тоа не е нешто што сакате да го користите дома“, рече Џо Немет, менаџер на „Пулп енд пејпр“ (BC Pulp and Paper Coalition).
Бразилската компанија за пулпа „Клабин“ (Klabin SA) вчера потврди дека производителите на пулпа од меко дрво низ светот ги зголемиле цените за 30 долари за метрички тон поради позатегнатиот пазар. Тоа би значело добивка до 970 долари за тон, која претходно беше 940 долари.
Потрошувачите се обидуваат да се справат со повисоките цени на тоалетната хартија со префрлање на поевтини брендови на продавници или купување помали пакувања.
„Добрата вест за потрошувачите е дека претстојат знаци на олеснување. Затворањето на канадските пилани засега го затегнува пазарот на пулпа, но влијанието врз цените на крајот ќе биде избалансирано со послаба потрошувачка и поголема понуда достапна од Северна Европа“, рече Кевин Мејсон од „ЕРА Форест продакшн“ (ERA Forest Products Research).
„Производителите во Шведска и Финска го зголемуваат производствениот капацитет и се очекува до втората половина од 2023 година да произведуваат еден милион тони повеќе на годишно ниво“, проценува високиот економист на „Фастмаркетс“ (Fastmarkets), Патрик Кавана. Тоа целосно ќе ги надомести загубите во Канада.
.webp){kind=icon}
