text size
Уште во декември, Европската унија го забрани речиси целиот увоз на сурова нафта преку море од Русија. Два месеци подоцна, забраната ја прошири и на нафтените деривати, пред се на дизелот.
Сепак, правилата не ги спречија земјите како Индија да купуваат евтина руска сурова нафта, да ја претворат во горива како дизелот и да ја испраќаат назад во Европа по повисока цена.
Азиската земја е на пат да стане најголемиот европски снабдувач на рафинирани горива овој месец, додека истовремено купува рекордни количини руска сурова нафта, покажуваат податоците кои „Блумберг“ ги собра со помош на аналитичката компанија „Кплер“.
Bloomberg
„Руската нафта го наоѓа патот назад кон Европа и покрај сите санкции, а индиското зголемување на извозот на гориво кон Запад е добар пример за тоа“, рече Виктор Катона, водечки аналитичар во компанијата. „Со тоа што Индија купува толку многу руски барели, тоа е неизбежно“.
Сепак, ова е меч со две острици за ЕУ. Од една страна, на блокот му требаат алтернативни извори на дизел сега кога ги прекина директните текови од Русија, претходно нејзиниот главен снабдувач. Но, ова на крајот ја зголемува побарувачката за московски барели и значи дополнителни транспортни трошоци.
Тоа значи и поголема конкуренција за европските преработувачи на нафта кои немаат пристап до евтината руска нафта, заради зголемената контрола на пазарот за тоа од каде доаѓа увозот на дизел во регионот.
Главниот извршен директор на „Репсол“ (Repsol SA), Јосу Јон Имаз, изјави во четвртокот дека рускиот дизел нелегално влегува во Европа и ги повика властите да преземат активности. Тој не зборуваше за трговија преку Индија, туку за проток на дизел со потекло од Русија.
Прелиминарната истрага за ова прашање, започната од шпанските власти, не откри докази за влез на руски дизел во земјата, изјави во петокот владин претставник, додавајќи дека истрагата е во тек.
Увозот на рафинирано гориво од Индија во Европа треба да се зголеми на над 360.000 барели дневно, што е малку над увозот од Саудиска Арабија, покажуваат податоците на Кплер.
Пристигнувањето на руската сурова нафта во Индија во април се очекува да надмине два милиони барели дневно, што претставува речиси 44 отсто од вкупниот увоз на нафта во земјата, покажуваат податоците на „Кплер“.
Повеќе од половина од испораките на нафта на Русија преку море беа во Европската унија и Групата 7 пред блокот да почне да ги намалува купувањата како одговор на инвазијата на Украина во почетокот на 2022 година.
.webp){kind=icon}
