Русија ја укина забраната за извоз на дизел

Русија дозволи враќање на поморскиот извоз на дизел само неколку недели по воведувањето на забраната што ги разбранува глобалните пазари, преземајќи други чекори наместо да ги задржи резервите на гориво дома.

Испораките може да продолжат под услов горивото да се доставува до пристаништата на земјата преку цевковод, се наведува во соопштението на владиниот налог на апликацијата Телеграм. Ваквите текови во западните пристаништа на Русија го сочинуваат најголемиот дел од извезените количества.

Овој потег ќе биде олеснување за увозниците откако Русија, најголемиот извозник на дизел-горива по морски пат, донесе речиси целосна забрана за испораки на 21 септември. Ограничувањата ги зголемија европските цени на и онака тесниот пазар. Рафинериите низ светот се борат да произведат доволно количества, откако Русија и Саудиска Арабија ја намалија понудата на сурова нафта богата со дизел, што предизвика резервите да се намалуваат.

Москва ја воведе забраната откако зголемените домашни трошоци за гориво ја покачија инфлацијата, создавајќи потенцијален политички проблем за Кремљ пред претседателските избори во март. Иако извозот сега може да се рестартира, производителите мора да придонесат најмалку 50 отсто од нивното производство на дизел да остане дома, посочи Владата.

Маржите за производството на гориво паднаа во петокот пред да закрепнат. Добивката од претворање на суровата нафта во дизел падна на 23,89 долари за барел, што е пад од 2,28 долари од четвртокот, пред да се тргува за 24,42 долари. Трговците беа скептични за тоа колку долго Русија би можела да ја задржи мерката без преполнување на местата за домашно складирање.

Извозниците што не произведуваат сопствен дизел, но ги испорачуваат количествата купени на домашниот пазар, сега ќе мора да плаќаат многу повисока извозна давачка, се наведува во соопштението. Таа е поставена на 50.000 рубли (речиси 500 долари) за тон, блиску до сегашната цена на рускиот меѓусезонски дизел на националната берза СПИМЕКС (SPIMEX).

Владата исто така ги враќа во целост своите субвенции за рафинериите за да обезбеди задоволување на домашната побарувачка за гориво и рафинериите да добијат компензација за разликата меѓу цените дома и во странство.

Минатиот месец таа ги преполови исплатите од повеќе милијарди рубли за да ги заузди буџетските трошоци оптоварени од зголемените трошоци на војната во Украина. Но овој потег беше критикуван од претседателот Владимир Путин, кој рече дека намалувањето ја влошува ситуацијата на домашниот пазар на гориво.