Нафтата скокна за повеќе од 5 отсто по ненадејниот напад на Хамас врз Израел, што ги зголеми стравувањата од поширок конфликт. Инвеститорите ги избегнуваат традиционално ризичните средства како што се акциите и, наместо тоа, купуваат злато, обврзници и долари.
ВТИ (West Texas Intermediate) се искачи над 87 долари за барел, додека брент достигна 89 долари во моменти кога трговците се подготвуваат за потенцијална ескалација што може да предизвика шок во снабдувањето. САД соопштија дека испраќаат воени бродови, а „Волстрит журнал“ објави дека ирански безбедносни експерти помогнале во планирањето на нападот.
Геополитичката несигурност го зголеми доларот во однос на еврото и фунтата, додека јенот - уште едно популарно засолниште - исто така зајакна. Фјучерсите на американските акции паднаа, а оние за државните обврзници пораснаа пред да се намалат придобивките поради загриженоста дека поскапата сурова нафта на крајот ќе ја поттикне инфлацијата. Златото поскапе за цели 1,2 отсто.
Bloomberg
„Настаните за време на викендот очигледно го дестабилизираат регионот“, рече Кајл Рода, висок пазарен аналитичар на „Капитал“ (Capital.com). „На крајот на краиштата, овие настани имаат тенденција само за краткорочно влијание врз финансиските пазари и веројатно и овој пат ќе биде исто. Инвеститорите би можеле да бидат во паника неколку дена, додека не се намалат јасно ризиците од ескалација“.
Банката на Израел соопшти дека ќе продаде дури 30 милијарди долари во девизи и ќе додаде до 15 милијарди долари преку механизми за размена за поддршка на пазарите. Шекелот се лизна на најниско ниво во последните седум години, додека борбите влегоа во третиот ден.
Последиците од нападите во неделата одекнаа низ пазарите на Блискиот Исток, предизвикувајќи пад на акциите. Главните репери за акции во регионот паднаа, предводени од падот на израелскиот берзански индекс ТА-35, кој забележа најголема загуба во повеќе од три години, со пад од 6,5 отсто.
Иако најновите настани не се непосредна закана за протокот на нафта, трговците се загрижени дека тоа може да стане прокси-војна. Иран е и главен производител на нафта и поддржувач на Хамас. Секоја одмазда против Техеран може да го загрози минувањето на бродовите низ Ормутскиот Теснец, витален канал што Иран и претходно се закануваше дека ќе го затвори.
.webp){kind=icon}
