.webp){kind=icon}
Цената на нафтата на светскиот пазар порасна во понеделникот наутро, по солидната добивка во првиот квартал, бидејќи знаците дека Кина закрепнува ги зголемија надежите дека побарувачката за нафта и во таа земја може да се зголеми.
Брент за испорака во јуни се искачи над 87 долари за барел, откако порасна за 14 отсто во првите три месеци од годината, додека вест тексас интермедиејт (ВТИ) е близу 84 долари. Кинеската индустриска активност закрепна во март и го запре петмесечниот пад, поттикнувајќи ги надежите дека потрошувачката во најголемиот увозник на сурова нафта може да закрепне.
„Изгледите за нафтата се поттикнати од знаците за економско закрепнување во Кина, најголемиот увозник на нафта во светот, предизвикани од оживувањето на индустриската активност и фабричкото производство“, рече Равиндра Рао, раководител за стоковни истражувања во „Котак“ (Kotak Securities Ltd). „Постојаните геополитички тензии исто така влијаат на растот на цената на нафтата“, додаде тој.
Bloomberg
Цената на нафтата порасна годинава бидејќи ОПЕК+ ги намали испораките за да ги зголеми цените и да го неутрализира влијанието на зголемените текови во земји надвор од организацијата. Се очекува групата да ја потврди својата актуелна политика за намалување на производството на нафта на онлајн состанокот, кој е закажан в среда. Цените на нафтата беа поддржани и од украинските напади врз руската енергетска инфраструктура и зголемените тензии на Блискиот Исток.
Неочекувано еластичната побарувачка на нафта во Европа исто така им помогна на цените, се наведува во белешката на „Голдман Сакс“ (Goldman Sachs Group). Минатиот месец банката соопшти дека цените на суровините ќе пораснат годинава бидејќи централните банки ги намалуваат каматните стапки, помагајќи им на индустријата и побарувачката на потрошувачите.
Обемот на тргување најверојатно ќе биде слаб на почетокот на неделата поради Велигден.
- Брент за јунско порамнување поскапе за 0,3 отсто, на 87,27 долари за барел, во 13:30 часот во Сингапур.
- ВТИ за испорака во мај додаде 0,3 отсто на 83,46 долари за барел.
