Нафтата се насочи кон трет месечен пад, што е најдолг губиток во повеќе од две години, поради загриженоста дека построгата монетарна политика ќе го погоди растот и дека Кина ќе продолжи со својата стратегија за „нулта ковид“.
West Texas Intermediate (WTI) падна за дури 4,09 долари за барел од високо на ниско во средата, со што се постави на курс за месечен пад од околу 10 отсто. Европа е зафатена од енергетска криза која може да резултира со рецесија, додека во Азија растот е забавен во Кина, најголемиот увозник на нафта во светот.
„Потрошувачката на сурова нафра и нафтени деривати не се совпадна со очекувањата во повеќето места во светот, кои се важни“, вели Георги Славов, глобален шеф за фундаментално истражување во лондонскиот брокер Marex. „Во меѓувреме, сè уште постои конзистентна акумулација на понудата долж целиот синџир на снабдување и резултатот е оваа слабост на цените што ја гледаме“, додава тој.
Централните банки, особено Федералните резерви во САД, неделава одново уверија дека зголемувањето на каматните стапки е потребно за да се залади брзата инфлација, создавајќи спротивен ветер за економскиот раст и побарувачката на нафта.
WTI на курс кон трет последователен месечен пад, најдолго надолно движење од април 2020 / Bloomberg
Сепак, трговците следат низа прашања поврзани со понудата кои имаат потенцијал да ги зголемат цените. И покрај тоа што во последните денови имаше значителни немири и во Либија и во Ирак, производството на нафта во двете членки на ОПЕК се чини дека засега не е засегнато. Од друга страна, разговорите за заживување на иранскиот нуклеарен договор што може да обезбеди поголем извоз на сурова нафта се одолговлекуваат, а руското производство се одржува на нивоа повисоки од претходните очекувања.
„Русија успеа да најде купувачи особено во Азија, Кина и Индија, па оттука повеќе нафта од Саудиска Арабија и другите производители остана за западните земји - што исто така ја зајакна страната на понудата“, посочи Карстен Фрич, аналитичар во Comerzbank.
Падот на нафтата во август е најново поглавје во бурната година, при што цените беа зголемени во првата половина поради руската инвазија на Украина, а потоа поткопани бидејќи централните банки го сменија правецот, а Москва успеа да го задржи најголемиот дел од извозот. Неодамнешниот пад на суровата нафта ја натера Саудиска Арабија, тешкаш во рамките на ОПЕК+, да ја изнесе идејата дека картелот може да го намали производството, иако руските медиуми објавија дека организацијата во моментот не разговара за таков потег.
Главна тема „се песимистичките макроекономски очекувања, заедно со тесната понуда поради ниските залихи“, вели Жоу Ми, аналитичар во Chaos Research Institute in Shanghai, кој е поврзан со Chaos Ternary Futures Co.
Денешните податоци ги истакнуваат предизвиците со кои се соочува Кина. Фабричките активности се намалија во август веќе втор месец по ред, при што економијата беше погодена од појавата на Ковид-19, кризата на пазарот на недвижнини и недостигот на електрична енергија.
.webp){kind=icon}
