Извозниците бараат од Моди итни мерки против тарифите на Трамп

Индиските извозници во понеделникот побараа од премиерот Нарендра Моди итни мерки за ублажување на последиците од одлуката на САД да воведат 50-процентни тарифи на индиските производи, велат извори запознаени со состанокот, додека индустриите со многу вработени се борат со последиците од потегот.

Претставници на секторите за обувки, текстил, ракотворби и инженерство побарале поддршка преку одложување на отплатата на кредитите и субвенционирани каматни стапки, брифираат добро упатените анонимни извори.

На состанокот, покрај Моди, присуствувале и највисоки владини претставници, меѓу кои министрите за финансии и трговија. Иако не биле дадени конкретни ветувања, извозниците добиле впечаток дека нивните барања се разгледуваат сериозно.

Кабинетот на премиерот не одговорил веднаш на барањето за коментар, а исто така не реагирале ни министерствата за финансии и за трговија.

Додека некои официјални лица во Њу Делхи во последно време сугерираат дека Индија е блиску до трговски договор со Вашингтон, други – меѓу кои и министерот за трговија и индустрија Пијуш Гојал – испраќаат мешани пораки, нагласувајќи дека земјата нема да потпише договор под притисок.

Оваа неизвесност предизвикала дополнителна загриженост меѓу индиските извозници, велат изворите.

Американскиот претседател Доналд Трамп ја издвои Индија со казнени тарифи од 50 отсто, повикувајќи се на нејзините набавки на руска нафта и неподготвеноста да обезбеди поголем пазарен пристап за американските производи. Тарифите се највисоки во Азија и ги прават индиските производи неконкурентни во однос на ривалите како Виетнам и Бангладеш.

САД се најголемиот извозен пазар на Индија, а новите давачки најсилно ги погодија индустриите со многу вработени, како текстилот, кожарството, обувките и накитот. Индискиот извоз во САД паднал за речиси 12 отсто во септември во споредба со истиот месец лани, покажуваат официјалните податоци, што ги предизвика барањата за владина поддршка. Економистите на „Ситигруп“ (Citigroup Inc.) проценуваат дека тарифите би можеле да го намалат годишниот раст на Индија за 0,6 до 0,8 процентни поени.

Извозниците исто така побарале од централната банка да дозволи пад на вредноста на рупијата со цел да се ублажат некои од загубите предизвикани од американските тарифи, објави „Блумберг њуз“ во септември. Сепак, Резервната банка на Индија веројатно нема да преземе таков чекор, иако континуираната слабост на рупијата делумно го амортизирала ударот.