Во период кога Скопје се врати на листата градови со најзагаден воздух во светот вчера како капак на лончето дојде веста од Јавното сообраќајно претпријатие – Скопје дека јавен превоз од денес ќе вршат само 25 автобуси со погон на гас додека сите останати ќе бидат исклучени од сообраќај бидејќи претпријатието не ги подмирило долговите за гориво. Повеќе од јасно е дека не очекува хаос во сообраќајот во главниот град бидејќи и граѓаните што досега се возеа со автобуси ќе мораат да користат автомобили или такси-превоз во услови кога возењето велосипед и одењето се опасни по живот поради енормното загадување.
Добро утро, ви пишува Владимир Николоски од дигиталната редакција на „Блумберг Адрија“. Подолу петте важни вести што ги издвоивме за почеток на денот.
Топ локации за вештачка интелигенција: Македонија и регионот може да учат од Романија
Букурешт и Романија се единствените од Централна и Источна Европа кои се најдоа на листите на градови и земји рангирани како врвни локации за стартапи базирани на вештачка интелигенција во 2024 година. Платформата за иновативна економија „СтартапБлинк“ (StartupBlink), која со години наназад ги следи стартап-екосистемите во светот ги објави 50. најдобри градови и 21. земја кои се истакнуваат во стартап индустријата за вештачка интелигенција.
Рангирањето е изведено од алгоритам заснован на објективна методологија којашто овозможува компаративно мерење низ региони, земји и градови. Ниту една земја и град од регионот Адрија не се најдоа на двете листи. „Од првите десет градови за вештачка интелигенција, шест се од САД и три се од Кина, што е одраз на влијанието на пријателските политикина овие земји кон вештачката интелигенција за разика од Европа“, констатираат од „СтартапБлинк“.
Минималната плата ја убива продуктивноста, добрите работници извисуваат
Продуктивноста во индустријата во септември се намалила за 5,9 отсто, покажуваат последните статистички податоци кои ги објави Министерството за финансии. Оваа година податоците за продуктивноста на месечно ниво само во текот на јули беа во позитива (2,5 отсто раст). По сектори, најголем пад има во рударството. Во септември продуктивноста се намалила за 11, 6 отсто, во преработувачката индустрија падот изнесува четири отсто на месечно ниво.
Статистичките податоци уште покажуваат дека иако продуктивноста најмногу паѓа во рударството, таму расте бројот на вработени. Во преработувачката индустрија тој се намалува, падот за една година изнесува 2,7 отсто. Ваквите трендови одат паралелно со континуираниот раст на минималната и просечната плата. Она од што најмногу стравуваат и работодавците и експертите е дека индустријата веќе не може да се носи со растот на платите, а податоците за продуктивноста ги потврдуваат тие стравови.
Златната треска ќе потрае: И Македонците не можат да ѝ одолеат
Годинава е рекордна за златото, кое се смета за традиционално средство за инвестирање што ја има етикетата на најстабилно и важи за прибежиште во услови на несигурност во глобални рамки. Но се чини дека не е достигнат врвот. Имено, некои од најголемите инвестициски банки прогнозираат дека трендот на раст ќе продолжи и следната година, па дури и дека неговата цена ќе ја достигне границата од 3.000 долари за унца.
Според УБС (UBS Group AG), вредноста на златото ќе се зголеми до 2.900 долари за унца до крајот на следната година, што е уште една позитивна прогноза за инвеститорите чие омилено средство се златните прачки. „Блумберг Адрија“ веќе пишуваше за навалицата за злато на светските берзи, но и дали и колку тоа ги мотивира Македонците да инвестираат во ова средство. Прогнозите за натамошен раст на цената на златото ги поткрепи и Снежана Поповска, сертифицирана техничка аналитичарка, која советува дека секоја ценовна корекција надолу е можност за инвестиција.
УЈП: Трговците имаат обврска да ги прикажат попустите за Блек фрајдеј
Во пресрет на најавениот Блек фрајдеј (Black Friday), Управата за јавни приходи упати препорака сите даночни обврзници што ќе применуваат попусти на цените на своите производи и услуги да ги изразат и наведат при издавањето на сметката, односно пресметаниот данок на додадена вредност да биде наведен во сметката со новосоздадената цена.
„Даночните обврзници што вршат промет на добра и услуги, а за кои плаќањето се извршува готовински, должни се да поседуваат фискален систем на опрема (ФСО), задолжително да издаваат фискални сметки при вршење продажба и промет и на видно место и да постават соопштение со кое го информираaт купувачот на доброто за неговата обврска да побара фискална сметка“, информираат од УЈП.Оттаму додаваат дека потрошувачите на добрата, односно корисниците на услуги при купувањето се должни да побараат фискална сметка и да ја чуваат по напуштањето на местото на прометот на доброто заради контрола.
Зошто се бара од „Гугл“ да го продаде Хром - објаснување на целиот случај
„Гугл“ (Google) на „Алфабет“ (Alphabet Inc.) ја загуби најголемата антимонополска битка со која се соочи летоска, кога американски судија утврди дека незаконски го монополизирал пазарот на пребарување. Сега се соочува со можноста резултатот да биде присилно раздвојување на компанијата. Државните обвинители и Министерството за правда на САД изјавија дека размислуваат да побараат од судијата Амит Мехта да го принуди „Гугл“ да продаде делови од својот бизнис, што би било најголемото присилно раздвојување на американска компанија од распадот на AT&T во 1984 година.
Мехта ќе го надгледува судењето закажано за април 2025 година за предложените мерки за незаконското монополизирање. Мехта од Окружниот суд на САД за округот Колумбија утврди дека 26 милијарди долари во плаќања што „Гугл“ ги направил кон други компании за да го направи својот пребарувач стандардна опција на паметни телефони и веб-прелистувачи ефективно го блокирале секој друг конкурент да успее на пазарот.
.webp){kind=icon}