Европските лидери не сакаат да го прифатат барањето на Владимир Путин и да ги ублажат санкциите кон Русија. САД испратија ревидиран договор до Украина во кој бараат контрола над големите инфраструктурни проекти и минерали. Фјучерсите на европските акции утрово се тргуваат претежно во црвено, додека брентот се тргува близу 74 долари за барел.
ПОЛИТИКА
ЕУ планира да ги зајакне санкциите кон Русија
Европските лидери ја отфрлија можноста за ублажување на санкциите кон Русија, што е едно од барањата на рускиот претседател Владимир Путин за да се согласи на делумен прекин на огнот со Украина. Британскиот премиер Кир Стармер изјави дека „сега не е време за укинување на санкциите“ и дека, наместо тоа, се разговарало за тоа како да се зајакнат санкциите и дополнителниот притисок врз Москва. Претседателот на Финска, Александер Стуб, на состанокот на 30-те европски лидери во Париз, изјави дека лидерите веќе работат на нов пакет санкции кон Русија. Европските лидери исто така дискутираат за начини како да ѝ се даде поддршка на Украина, вклучувајќи и забрзување на исплатата на кредитниот пакет од 18 милијарди евра, зајакнување на украинската војска и потенцијално распоредување на европските вооружени сили на стратегиски локации низ Украина.
САД сакаат контрола над инвестициите во Украина
САД се залагаат за договор што би им донел контрола над големите идни инфраструктурни и минерални инвестиции во Украина. Тоа би ѝ овозможило на Америка потенцијално право на вето за која било улога на другите сојузници на Киев. Администрацијата на претседателот Доналд Трамп бара „право на прва понуда“ за инвестиции во проекти за инфраструктура и природни ресурси, во рамките на ревидираниот договор за партнерство со Украина. Ова се наведува во нацрт-документот во кој имал увид „Блумберг“.
БЕРЗИ
Европа
Фјучерсите на европските акции утрово се тргуваат претежно во црвено. Европските берзи и тргувањето во четвртокот го завршија со загуби, откако американскиот претседател Доналд Трамп најави царини на увозот на автомобили од 25 проценти. Најголеми загуби забележаа акциите на автомобилските компании, при што акциите на „Стелантис“ (Stellantis) паднаа за 4,2 проценти, на „Мерцедес-Бенц“ (Mercedes-Benz) за 2,7 проценти и на БМВ (BMW) за 2,55 проценти.
САД
Од другата страна на Атлантикот, фјучерсите на американските индекси се тргуваат со добивки, откако најновите податоци покажаа дека американската економија во четвртиот квартал од минатата година пораснала побрзо од очекуваното.
Имено, бруто-домашниот производ од октомври до декември пораснал по стапка од 2,4 проценти годишно, додека индексот на трошоците за лична потрошувачка (базичен PCE-индекс), кој ги исклучува волатилните категории на храна и енергенти, е ревидиран на 2,6 проценти.
Bloomberg
Азија
Акциите во азиско-пацифичкиот регион регистрираа пад, додека најголемата распродажба беше забележана во Јужна Кореја и во Јапонија. Истовремено, цената на златото достигна рекордна вредност, бидејќи најновиот бран на царини предизвика загриженост од сеопфатна трговска војна. Па така, цената на златото порасна за 0,7 проценти, на највисоко ниво од 3.077 долари за унца.
НАФТА
Брентот се тргува близу 74 долари за барел, додека ВТИ (West Texas Intermediate) е под 70 долари. Таканаречените реципрочни царини и царина за купувачите на сурова нафта од Венецуела треба да стапат во сила на 2 април, кои се дополнување во низата американски царини што ги потресоа пазарите низ светот.
Нафтата расте од почетокот на март, бидејќи инвеститорите ги мерат нарушувањата во снабдувањето предизвикани од санкциите и царините на претседателот Доналд Трамп. Венецуела исто така го зголеми извозот на сурова нафта во Кина на највисоко ниво во речиси две години.
Bloomberg
.webp){kind=icon}
