Украина и САД сè уште ги пеглаат деловите од договорот за минералите

На преговарачите им треба повеќе време за да го финализираат договорот со кој Вашингтон би добил дел од критичното рудно богатство на Украина, рече лице запознаено со разговорите.

Нацрт-договорот предложен од администрацијата на Трамп во моментов има некои сомнителни елементи, а украинскиот претседател Володимир Зеленски не е подготвен да го одобри, рече лицето кое побара да остане анонимно. Лицето одби да каже што во нацртот ги поттикна приговорите од Киев.

Украинските власти разговараа за потенцијалниот договор за минерали со американскиот специјален пратеник Кит Келог за време на неговата посета на Киев, откако Зеленски ја отфрли првичната понуда на Вашингтон претходно овој месец. Украинскиот лидер рече дека предлогот треба да биде поврзан со американските безбедносни гаранции и „не е во интерес на суверена Украина“.

Американскиот предлог предвидува обезбедување на 50 отсто од продажбата на лиценци и други приходи од минерали, што би ги прекршило украинските закони, изјави тогаш лице запознаено со дискусиите. Вклучуваше и приходи од нафта, гас и пристаништа, објави Ej-би-си Њус, повикувајќи се на нацрт-документ.

Киев објави дека предложил измени на предлогот кои ќе бидат од корист за двете страни. Критичарите на нацрт-договорот го осудија дека потсетува на колонијализмот од изминатите векови.

„Тимовите од Украина и САД работат на нацрт-договор меѓу нашите влади“, рече Зеленски во своето секојдневно обраќање до нацијата доцна во петокот. „Ова е договор што може да ги зајакне нашите односи и е од клучно значење да се разработат деталите за да се обезбеди неговата ефикасност“, рече тој, додавајќи дека се радува на „фер исход“.

Американскиот притисок врз Украина да го потпише договорот доаѓа откако претседателот Доналд Трамп даде серија изјави кои го ставија Зеленски во непријатна позиција. Американскиот претседател на почетокот на оваа недела посочи дека Украина е виновна за започнувањето на целосната руска инвазија пред три години.

Трамп, исто така, сигнализираше дека сака да постигне договор со Москва за тоа како да се стави крај на конфликтот без Украина на маса и го нарече демократски избраниот Зеленски „диктатор“ со рејтинг од 4 отсто.

Украинскиот лидер, чиј рејтинг беше 57 отсто во неодамнешната анкета, возврати велејќи дека американскиот претседател паднал на руски „дезинформации“.

Киев идеално би очекувал конечниот договор за минерали да биде потпишан во присуство на американскиот и украинскиот претседател, според упатени во разговорите. Зеленски, кој се сретна со Келог во четвртокот, се заложи за средба со Трамп пред каква било потенцијална средба меѓу американскиот лидер и рускиот претседател Владимир Путин.

Во моментов нема коментари за веста. Биди прв да коментира...

Остави коментар