Венс предупредува: САД се на работ на блокада, демократите и Трамп без договор

Потпретседателот на САД, Џеј Ди Венс, предупреди дека владата на САД е на пат кон блокада, обидувајќи се да ја префрли вината врз демократите еден ден пред истекот на федералното финансирање.

„Мислам дека одиме во блокада бидејќи демократите не сакаат да го сторат вистинското нешто“, изјави Венс во понеделникот по средбата со конгресмени во Белата куќа. „Се надевам дека ќе ја сменат одлуката, но ќе видиме“, додаде тој.

Американскиот претседател Доналд Трамп се сретна со водечките демократски и републикански конгресмени помалку од 36 часа пред рокот на 1 октомври, но двете страни останаа далеку од договор за барањата на демократите – продолжување на субвенциите за здравствена заштита и укинување на кратењата на средствата за Медикејд од даночниот пакет на Трамп усвоен годинава.

„Сè уште постојат големи разлики меѓу нас“, изјави лидерот на демократите во Сенатот, Чак Шумер, по средбата. Но, потоа во Капитол, Шумер сугерираше дека демократите би можеле да прифатат дел од нивните приоритети – имено, продолжување на субвенциите за премиите во рамките на Законот за достапна здравствена заштита (Affordable Care Act) и спречување на Белата куќа да користи забрзани и еднострани процедури за повлекување федерални средства. Тој, сепак, ја одби можноста да се изгласа привремениот републикански предлог-закон без да се постапи конкретно по прашањето на субвенциите за ACA, истакнувајќи дека милиони Американци наскоро ќе добијат известувања за масовни зголемувања на премиите.

„Сè е во рацете на претседателот“, рече Шумер.

Лидерот на републиканското мнозинство во Сенатот, Џон Тун, оцени дека одбивањето на демократите да одобрат краткорочен закон за финансирање со кој владата би останала отворена до 21 ноември претставува „заложништво“, но додаде дека ќе разговара со демократите откако ќе се надмине непосредниот рок за финансирање.

Венс изјави дека демократите имаат некои позиции што претседателот ги смета за „разумни“. Потпретседателот како можност за компромис го спомена финансирањето на здравствената заштита во руралните средини.

Иако републиканците имаат мнозинство во Сенатот, на нивните лидери им требаат најмалку осум гласа од демократите за да помине кој било предлог за финансирање, бидејќи се соочуваат со процедурални пречки и со противење од барем еден републикански сенатор – Ренд Пол од Кентаки.

Законодавците доцна во понеделникот бараа начин да се надмине блокадата. Сенаторот Мајк Раундс од Јужна Дакота изјави дека тој и други сенатори разгледуваат можен компромис со кој би се продолжиле кредитите од Законот за достапна здравствена заштита (ACA) за неколку години, но придобивките би се намалувале постепено во втората и третата година, приближувајќи се кон нивото пред пандемијата.

Раундс рече дека верува дека таков договор може да се постигне за неколку дена, доколку демократите се согласат да ја задржат владата отворена.

Блокадата би го одложила објавувањето клучни економски показатели, меѓу кои и месечниот извештај за вработеност што треба да биде објавен во петок – и би испратила стотици илјади федерални работници на принудно отсуство, додека други би морале да работат без плата за да продолжат основните услуги.

Американските берзи ги намалија добивките откако Бирото за статистика на трудот (Bureau of Labor Statistics) вчера соопшти дека планира да не објавува економски податоци за време на можната блокада.

Трамп се закани дека ќе отпушти голем број владини работници доколку дојде до блокада на владата, со што би се зголемил ударот врз економијата. Досега во вакви ситуации вработените што биле испратени на принудно отсуство се враќале на работа кога ќе се постигнел договор за финансирање и добивале плата за изгубените денови. Плановите за затворање на агенциите, сепак, досега не спомнуваат никакви отпуштања, и покрај заканата на Трамп.

Венс изјави дека „основните услуги“ ќе продолжат да функционираат за време на евентуалната блокада.

Оваа блокада би била прва од 2018–2019 година, кога финансирањето на владата беше запрено пет недели, вклучувајќи и за Нова година, за време на првиот мандат на Трамп.

Блокадите на владата може да траат со недели
Траење на прекините во конгресното финансирање што доведуваат до делумна блокада на владата

Bloomberg

Лидерот на демократското малцинство во Претставничкиот дом, Хаким Џефрис, изјави дека демократите нема да прифатат само ветувања за иднa соработка околу здравствената политика во замена за нивните гласови за краткорочен закон за финансирање со кој владата би останала отворена.

„Никој не може да им верува на нивните зборови кога станува збор за здравството“, рече тој, посочувајќи дека републиканците повеќе од една деценија се обидуваат да го укинат Обамакер. „Американскиот народ знае дека би било неразумно да се направи тоа.“

Демократите сакаат да потрошат 350 милијарди долари за трајно продолжување на даночните кредити од Обамакер за семејствата од средната класа, за да се избегне раст на премиите од 1 јануари. Тие исто така бараат законот да ги укине кратењата на Медикејд од огромниот даночен пакет на Трамп, вклучувајќи ги и новите услови за работа и сузбивање на сметководствениот трик што им овозможуваше на државите да ги зголемуваат стапките на надомест за Медикејд. Дополнително, тие сакаат да се поништат кратењата на средствата за медицински истражувања и да се спречи Белата куќа да повлече веќе одобрени средства.

 

Во моментов нема коментари за веста. Биди прв да коментира...

Остави коментар