Ќе најде ли „Порше“ спас во автомобилите на „Бугати“ од четири милиони долари?

Извршните директори на „Порше“ (Porsche AG) и хрватскиот претприемач во областа на електрични возила Мате Римац беа полни со насмевки во 2021 година при најавата за заедничко производство на хиперавтомобили, „Бугати Римац“ (Bugatti Rimac), во прекрасната тврдина од 14 век покрај морето во Дубровник. Меѓутоа, како што обично се случува кога се судираат две многу различни деловни култури, романтиката изгледа не траеше долго.

„Римац“ (Rimac Group) е заинтересирана да откупи 45 проценти од уделот на „Порше“ во заедничката инвестиција, извести „Блумберг њуз“ во средата, повикувајќи се на прелиминарна понуда која го вреднува бизнисот на нешто повеќе од милијарда евра; Римац би можел да се здружи со други инвеститори, како што се наведува во извештајот. „Порше“ е под притисок да ја зголеми цената на своите акции и да го подобри својот луксузен имиџ; на прв поглед, продажбата би делувала против таа стратегија. Меѓутоа, „Бугати Римац“ е еклектичен спој: продава околу 100 автомобили годишно, во споредба со 310.000 на „Порше“, а технолошките основи на возилата се различни. Доколку одлучи да се раздели од ова ценето средство, „Порше“ е во добра позиција да преговара со голема тежина.

Извор: Porsche (2o21)

Станувањето извршен директор на „Бугати“ во 2021 година беше неверојатен успех за тогаш 33-годишниот Римац, дури и за некој кој веќе доживеал чудесен подем од чепкање на БМВ во гаражата на своите родители до лансирање на рекордерскиот електричен хиперавтомобил „Невера“ (Nevera), и станување добавувач на електрични компоненти за некои од најголемите имиња во индустријата, вклучувајќи го и „Порше“. (Иако не постои стандардна дефиниција за суперавтомобили и хиперавтомобили, вториот термин често се користи за возила со извонредни перформанси, мали количини на производство и цени со седмоцифрен број.)

Поранешниот сопственик на „Бугати“, „Фоксваген“ (Volkswagen AG), му го предаде на Римац едно од најпознатите средства на автомобилската индустрија, при што неговата компанија поседуваше 55 проценти, а тогашната филијала на VW, „Порше“, го држеше преостанатиот удел. „Порше“ стана јавна компанија следната година, држи повеќе од 20 проценти од уделот во „Римац Груп“, чии други инвеститори ги вклучуваат „Хјундаи“ (Hyundai Motor), „Голдман Сакс“ (Goldman Sachs Asset Management) и „Софтбанк“ (Softbank Vision Fund 2).

„Бугати“ минатата година лансираше хибриден хиперавтомобил „Турбилон“ (Tourbillon), вреден 3,8 милиони евра, со внатрешни инструменти налик на аналогни швајцарски часовници и 16-цилиндричен Cosworth мотор, и брзо ги продаде сите 250 примероци. (Дополнителните опции и додатоци наводно можат да додадат уште милион долари на цената на купувањето.) Меѓутоа, наскоро се појавија тензии меѓу агилниот стартап на Римац и повеќе структурираните пристапи на „Порше“.

Мате Римац на претставувањето на Bugatti Tourbillon Извор: Bugatti

Во декември, германскиот „Менаџер“ (Manager Magazin) извести дека „Порше“ не бил задоволен од партнерството - продажбата на „невера“ била разочарувачка, а приходот на ова заедничко вложување паднал за 46 проценти минатата година на 182 милиони евра, според годишниот извештај на „Порше“, поради пауза во новите модели. Германците се обидувале да преземат контрола над загубарското заедничко вложување, додека Римац тогаш изјавил дека сака да го зголеми својот удел.

Оттогаш, Лутц Мешке, архитектот на односот на „Порше“ со Римац, е сменет од позицијата финансиски директор. Така што не е јасно што сега сака „Порше“. Во изјава, „Порше“ посочи дека „континуирано ги оценува потенцијалните оптимизации за своите удели и тесно соработува со деловните партнери и коинвеститорите“. „Порше“ „силно“ верува во потенцијалот на „Бугати“ додадоа тие.

Потенцијалната борба за контрола доаѓа во напнат момент за германскиот производител на спортски автомобили; профитабилноста опадна поради падот на продажбата во Кина и несигурната стратегија за електрични возила. Сега се соочува со царина од 25 проценти на увозот во САД, а неговите акции заостануваат зад конкурентот во луксузни спортски автомобили, „Ферари“ (Ferrari NV).

Голема причина зошто инвеститорите го преферираат „Ферари“ е тоа што продава возила по просечна цена поголема од 400.000 евра, во споредба со 117.000 евра на „Порше“; понудата за ултрабогатите, а не само за имотните, ја прави италијанската фирма помалку подложна на економски падови и царини. Тој ценовен јаз веројатно ќе расте во текот на оваа година кога „Ферари“ ќе почне да го испорачува хиперавтомобилот Ф80 (F80). Иако не сум фан на неговиот квадратен изглед и хибридниот V6 мотор, „Ферари“ ги продаде сите 799 примероци на оваа „ѕверка“ од 1.200 коњски сили по цена од 3,6 милиони евра по примерок, без додатоци.

Аналитичарите очекуваат дека Ф80 ќе биде исклучително профитабилен.

Извор: Porsche, Ferrari

Додека обожавателите на „Порше“ очекуваа дека компанијата ќе лансира свој хиперавтомобил - како што направи пред десет години кога „918 спајдер“ (918 Spyder), „лаферари“ (LaFerrari) и „мекларен“ (McLaren P1) станаа познати како „свето тројство“ - Германците не ги исполнија тие очекувања. На повикот за инвеститори во март, „Порше“ рече дека такво возило може да биде „можност за иднината“, што не навести голема „загреаност“ за оваа идеја.

„Порше“ предвидуваше дека нивниот следен хиперавтомобил ќе биде електричен, но инженерите сега имаат сомнежи; многу купувачи во сегментот на високо луксузни автомобили сè уште сакаат мотор со внатрешно согорување кој 'ржи, додека дури и евтините електрични автомобили можат да постигнат неверојатни брзини, што ја прави големата брзина помалку привлечен аспект при продажба. Последица на тоа е дека „Порше“ има голем празен простор на врвот на пирамидата на своето портфолио, што неговата стратегија за понатамошно подигање на спортскиот автомобил 911 нема да го пополни.

Теоретски, би било логично „Порше“ подобро да го искористи „Бугати“, чии луксузни возила колекционерите многу ги ценат поради нивните големи вредности при препродажба (затоа некои речиси никогаш не излегуваат од гаража). Клиентите на „Бугати“ во просек поседуваат „околу 84 автомобили, три авиони и една јахта“, според зборовите на поранешниот извршен директор, слично како и клиентелата на „Ферари“. Меѓутоа, рачното производство на возила со високи перформанси не е секогаш финансиски исплатливо. За да ја зачуваат ексклузивноста, производителите одржуваат ограничена продажба, што е една од причините зошто „Бугати Римац“ минатата година изгуби околу 150 милиони евра.

Развојот на хиперавтомобили и трошоците за материјали се високи бидејќи целта е да се поместат границите на можностите, додека и натаму се почитуваат безбедносните и стандарди. И не заборавајте, VW ја прекина соработката со „Бугати“ во 2021 година бидејќи немаше доволно синергија меѓу луксузниот производител на автомобили по специјални барања на клиентите и бизнисот на VW со голем обем на производство. „Бугати вејрон“, кој беше лансиран во 2005 година, се смета дека VW го чинеше толку многу што, врз основа на бизнисот по возило, изгуби повеќе пари отколку било кој автомобил во автомобилската историја.

Римац е вешт во максимално искористување на ограничен буџет, а финансиските резултати треба да бидат многу подобри оваа година благодарение на кабриолетот „Мистрал“ (Mistral) и тркачкиот хиперавтомобил „Боид“ (Bolide); испораката на моделот „Турбилон“ започнува во 2026 година. Но, заедничкото вложување е уште далеку од тоа да стане сигурна машина за правење пари.

Поради тоа, се сомневам дека, ако „Порше“ ја одбие понудата и одлучи да преземе поголема контрола над „Бугати“, тоа значително ќе ја подигне пазарната вредност на германската група, без оглед на можноста за проширување на понудата на „Бугати“. Истовремено, на „Порше“ не му треба готовина, а Римац не може да го натера да продава, што го остава „Порше“ во добра позиција да извлече висока цена.

И покрај сомнителната економска логика, сè уште постои многу интерес на инвеститорите за вакви трофејни имоти; во декември, инвестицискиот фонд ЦЈВН (CYVN Holdings LLC), во сопственост на владата на Абу Даби, купи 100 проценти од производството на суперавтомобили на „Мекларен“ од бахреинскиот државем инвестициски фонд „Мумталакат“ (Mumtalakat Holding Co).

Продажбата на едно од најпознатите имиња во сферата на луксузните автомобили може да изгледа како чуден начин за „Порше“ да го подобри својот имиџ во сегментот на ултралуксузни автомобили. Но, не би требало да дозволи „Бугати“ да стане имот кој е заглавен.