„Римац Невера Р“ сè уште најбрз електричен автомобил, но продажбата забавува

„Римац Невера Р“ (Rimac Nevera R) достигна брзина од 431,2 км/ч минатата недела на патеката за тестирање на автомобили во Папенбург во Германија, што хрватскиот производител на хиперавтомобили го опишува како светски рекорд за максимална брзина на електрично возило.

„Рушењето рекорди е во нашата ДНК и нема да застанеме тука“, рече Мате Римац, основач и претседател на „Римац Груп“ (Rimac Group), како и извршен директор на „Бугати Римац“ (Bugatti Rimac) и „Римац Технолоџи“ (Rimac Technology), во соопштение за медиумите. Буквата „Р“ во името на моделот означува радикален, немилосрден и бунтовен, рече Римац кога го претстави електричниот хиперавтомобил вреден 2,3 милиони евра за време на Неделата на автомобили во Монтереј минатата година.

Римац невера Р е помоќна, надградена верзија на електричниот хиперавтомобил Невера, кој првпат беше претставен во 2021 година / Лиценцирана фотографија од Rimac Group

 

Сепак, во елитните кругови на екстремна брзина, многу рекорди зависат од технички нијанси и семантика.

Резултатот на „Римац“ го надмина претходниот максимум од 412 км/ч на „Невера Р“, но беше под 440 км/ч постигнати од „Аспарк Оул“ (Aspark Owl SP600) во 2024 година - кој влезе во Гинисовата книга на рекорди како „најбрзиот прототип на електричен хиперавтомобил на батерии во светот“. Ознаката „прототип“ е клучна тука: „Невера Р“ ќе се произведува во 40 единици, а испораките до клиентите ќе започнат подоцна оваа година, додека „Аспарк Оул“што се користеше за рекордот беше прототип.

„Веруваме дека тоа е важна разлика за клиентите: не купувате само уникатен прототип, туку автомобил што соборува рекорди што всушност можете да го возите на патот“, рече Марта Лонгин, портпаролка на „Римац“. Претставниците на „Аспарк“ не одговорија на барањето за коментар.

„Римац“ користел систем за собирање податоци со висока прецизност од „Девсофт“ за да го сними возењето. Претставници од Гинисовата книга на рекорди не беа присутни, вели Лонгин, наведувајќи ја како причина структурата на побарувањата за сертификација.

„Нивната постапка бара необични формати на настани, како што е истовремено возење со повеќе од 10 конкурентски автомобили, што е порелевантно за потрошувачки настани и изложбени програми“, рече Лонгин. Гинис потврди рекорд од 2023 година кога „Невера“ во рикверц достигна 275 км/ч.

Новата максимална брзина на „Невера Р“ е само еден од 24-те критериуми поставени за време на тестирањето од 5 до 8 јули. Тие вклучуваат подобрено забрзување од 0 до 100 км/ч за само 1,66 секунди (претходно 1,74), како и време од 0–400–0 км/ч од 25,79 секунди, што ја прави „Невера“ 2,04 секунди побрза од 27,83 секунди на „Кенигсег Џеско Абсолут“ од 2024 година.

Автомобилите со мотори со внатрешно согорување сè уште имаат предност во екстремните брзини. „Бугати Широн“ (Bugatti Chiron Super Sport 300+) достигна 490 км/ч во 2019 година, а и „Кенигсег“и „ССЦ Туатара“ (SSC Tuatara) произведуваат бензински автомобили со поголеми максимални брзини од „Невера“.

Колку може да биде брз еден електричен автомобил?/Лиценцирана фотографија од Rimac Group

Веста доаѓа во време кога „Римац“ се соочува со разочарувачка продажба на својот електричен хиперавтомобил, што предизвика тензии кај инвеститорите. „Порше“ (Porsche) поседува околу 20 проценти од „Римац Груп“, која има 55 проценти удел во „Бугати Римац“и 100 проценти удел во „Римац Технолоџи“. (Меѓу другите инвеститори се „Хјундаи Мотор“, „Голдман Сакс“и „Софтбенк вижн фонд 2“).

Германскиот производител на автомобили е незадоволен од партнерството поради слабата продажба на „Невера“ и падот од 46 проценти на приходите од „Бугати Римац“ минатата година на 182 милиони евра, според годишниот извештај на „Порше“. Групацијата „Римац“ размислува за купување на уделот на „Порше“ во „Бугати Римац“, проценувајќи ја компанијата на повеќе од милијарда евра, според извештајот на „Блумберг“.

Во мај 2024 година, Мате Римац изјави дека само 50 од планираните 150 „Невера“ се испорачани („Лонгин“ одби да коментира за поновиот број за овој текст); подоцна тоа лето, во интервју за „Блумберг“, Римац ја објасни слабата побарувачка со фактот дека купувачите сè уште преферираат супер автомобили на бензин.

Компанијата оттогаш објави пресврт во својата стратегија за хиперавтомобили, велејќи дека планира да изгради автономно такси со две седишта и дека не е трајно врзана за целосно електричен погон.

„Размислуваме за сите возбудливи технологии што постојат, за сите идеи што можеме да ги смислиме“, рече Римац. „Не само батерии – ги разгледавме сите можности кога станува збор за иднината на брендот“.

 

 

Во моментов нема коментари за веста. Биди прв да коментира...

Остави коментар