Камче во џебот заменува клуч за автомобил од 230.000 долари

Со 905 коњски сили и забрзување од 0 до 100 км/ч за помалку од три секунди, „лотус елетре“ (Lotus Eletre) е помоќен од „ламборгини хуракан“ (Lamborghini Huracán) и побрз од „порше 911 карера“ (Porsche 911 Carrera). Теренецот од 230.000 долари стана не само демонстрација на технолошка моќ туку и клучна точка во стратегијата за електрификација на брендот.

Затоа не беше нималку сеедно како ќе изгледа неговиот клуч.

Поточно, фоб. Во индустрија што сè повеќе ги брише границите помеѓу софтверот и автомобилот, дизајнот на физичкиот клуч може да изгледа речиси непотребно. Сепак, тој останува првиот контакт на корисникот со возилото – еден вид ракување со брендот. Ако е добро осмислен, зборува за неговиот идентитет. Ако не е, може да фрли сенка врз целиот производ.

„Не сакавме да направиме пренатрупан и кабаст клуч“, вели Мет Хил, шеф за дизајн на ентериер во „Лотус“.

На ум им биле лекциите од минатото – како на пример дисплеј-фобот на БМВ од 2015 година, кој имал екран на допир и ја зголемувал цената за повеќе од 600 долари. Беше укинат во 2022 година поради недоволна побарувачка.

БМВ дисплеј-фоб што беше укинат во 2022 година Фото: BMW 

„Целта не е технологија поради самата технологија“, вели Хил. „Целта е: дали тоа навистина ни го олеснува животот?“

За „елетре“, „Лотус“ потрошил шест месеци развивајќи керамички клуч во форма на перце за гитара, инспириран од формата на логото на брендот. Сивиот заоблен уред со само едно копче за заклучување и отклучување доби прекар – камче.

Елегантен, едноставен и, што е важно, помал од 7,5 сантиметри, совршено го собира и во џеб од сако. „Ако носите костум, не ја нарушува линијата“, вели Хил.

Камчето на „Лотус“ Извор: Lotus 

Таквиот минимализам стана реткост во автомобилската индустрија. Модерните фобови често го отклучуваат секој дел од автомобилот поединечно, го стартуваат моторот кога му се приближувате, ја местат температурата, ја прикажуваат состојбата на батеријата или горивото и уште многу повеќе.

Уште откога „Кадилак“ (Cadillac) го воведе безжичниот пристап во осумдесеттите години од минатиот век, фобот стана комплексен систем. Денес содржи електронска плоча, батерија, сензори и, најчесто, скриен метален клуч за секој случај.

Но дизајнот секогаш носи и порака.

Фобот за „порше 911“ потсетува на силуетата на автомобилот. Тој за „бентли континентал ГТ“ (Bentley Continental GT) има иста текстура како контролната табла. „Волво“ му останува верен на правоаголниот дизајн. А ривалите како „Ауди“ (Audi), „Форд“ (Ford) или „Тојота“ (Toyota) одат со форма на „заоблен куфер“. Клучот за „мерцедес е-класа“ (Mercedes E-Class) зрачи со дискретен луксуз.

Фоб-клуч за теренец на „Бентли“ Извор: Bentley Motors

„Бентли“, на пример, потрошил две години и 1,75 милион долари за развој на својот фоб – со метални детали и гравура, дизајниран да потсетува на внатрешноста на возилото. „Тоа ви е како визит-карта за 'Бентли'“, вели Дарен Деј, шеф за дизајн на ентериер.

На другиот крај од спектарот, „Кадилак“ за својот „селестик“ (Celestiq) – лимузина од 360.000 долари како одговор на „Ролс-Ројс“ (Rolls-Royce) – испорача ист пластичен фоб како и за другите модели на „Џенерал моторс“ (GM). Иако спакуван во кожена футрола, изгледа неусогласено со визијата за футуристички луксуз.

Фоб  за „кадилак селестик“ Фото: Hannah Elliott/Bloomberg

Некои брендови, сепак, ја редефинираат идејата за клуч: „Тесла“ (Tesla) и „Ривијан“ (Rivian) нудат тенки картички наместо класични фобови. А иднината оди уште подалеку – „Хјундаи“ (Hyundai) веќе користи сензори за отпечаток од прст, „Форд“ развива препознавање лице.

„Во иднина физичкиот фоб ќе биде вишок“, вели Ребека Линдланд, директорка во консултантската фирма „Алисон вордвајд“ (Allison Worldwide). Таа веќе го користи својот „алфа ромео стелвио“ (Alfa Romeo Stelvio) преку апликација. Ако ѝ се испразни телефонот – само го полни. Ако, пак, го изгуби фобот – мора да чека нов и да плати.

За многу рани корисници на „елетре“, апликацијата е главен канал на интеракција. Сепак, Хил додава дека неговиот татко сè уште сака да „почувствува нешто во џебот кога се оддалечува од автомобилот“.

„Тоа е тој момент на осознавање“, вели Хил. И додава дека керамичкиот фоб, и покрај дигитализацијата, има една клучна предност во однос на телефонот: „Ако падне, нема да се скрши“.

Во моментов нема коментари за веста. Биди прв да коментира...

Остави коментар