.webp){kind=icon}
Една вечер влегов во собата на ќерка ми, која нема ни 12 години, и се зачудив кога видов чудно суштество во нејзиниот кревет како мирно чита книга. Носот на суштеството беше блескав и пластичен, челото му беше намачкано со јаглен, образите и брадата ишарани со синкаво-зелена глина. Суштеството ме погледна, трепна неколкупати, а потоа непречено се врати да ја чита книгата.
Да, ние сме во средина на манијата за нега на кожата кај децата. Можеби сте слушнале за овој проблем, бидејќи постојано доаѓаат нови загрижувачки медицински извештаи на оваа тема. Децата, главно десетгодишни девојчиња и малку постари, а и некои момчиња, без сомнение затоа што сите се движат „во чопор“, се собираат во „Сефора“ (Sephora) за да ги пробаат скапите производи за убавина што се популарни на Тикток.
Дали им се потребни сите овие скапи серуми, спрејови и лосиони? Не. Многу од овие деца се во фаза од животот кога нивната кожа никогаш повеќе нема да биде здрава и чиста. Но дали веруваат кога ќе им кажете дека не им треба?
За родителите ова изгледа како дилема. Но тоа би можело да биде и добра шанса да го фокусираат интересот на своите деца за тоа како да стекнат правилни навики за нега на кожата и, патем, можеби ќе им помогне да научат да размислуваат критички за она што го гледаат на социјалните мрежи.
Опсесијата на десетгодишните деца со нега на кожата не е нова. Моите врсници од генерацијата икс и јас секако би го замениле нашиот природен пилинг со мирис на кајсија за софистицираните производи што ги има на располагање генерацијата алфа. Она што е различно е консумеризмот, кој ги наведува децата на секојдневна нега на кожата, екстремно скапи, целосно непотребни, а во некои случаи и штетни производи за нивната млада кожа. Да бидам искрена, работите излегоа од контрола.
„Кожата е најголемиот орган на нашето тело. Пред пубертетот, кожата е потенка и сè уште не почнала да произведува масло. Тоа значи дека младата кожа ќе апсорбира многу повеќе нанесени производи отколку кожата на возрасен“, вели дерматологот од Сиетл д-р Хедер Роџерс.
Дерматолозите забележуваат дека децата од преттинејџерска возраст доаѓаат со иритации и исип на кожата, предизвикани од непотребните состојки во инвазивните производи за нега на кожата. „Ова не сакаат да го слушнат тинејџерите, но навистина им требаат нежни и неагресивни производи за нега на кожата“, вели таа.
Децата обично не се воодушевени од главните препораки на дерматолозите како „Кетапхил“ (Cetaphil) и „Кераве“ (CeraVe). Тие сакаат брендови што ги сакаат нивните пријатели. Тоа е во ред до одреден момент, но децата треба да ги изберат најосновните, најнежните производи во линијата.
Обидете се да ги насочите децата од преттинејџерска возраст што се опседнати со маски кон маски од целулоза, за кои Роџерс вели дека се најнежни. Таа исто така препорачува ограничување на фреквенцијата на користење маски, бидејќи дури и нежните производи често содржат мириси што можат да ја иритираат кожата. (Исто така, вреди да ги потсетиме децата од еколошки најсвесната генерација дека сите тие производи и нивното прекрасно пакување на крајот ќе завршат на депонија.)
Со мало водство, оваа опсесија по „Сефора“ идеално би можела да премине во доживотни здрави навики за нега на кожата. Тоа може да се сведе на неколку основни правила: измијте го лицето со нежно средство за чистење пред спиење, нанесете хидратантен крем и во текот на денот нанесете соодветен крем за заштита од сонце. Тој последен чекор е клучен, како за борбата против стареењето, нешто за што непотребно се грижат и генерациите алфа и зед, така и за заштита од рак на кожата, кој секоја година погодува повеќе од шест милиони луѓе во САД. (Патем, без разлика што инфлуенсерите се обидуваат да ви кажат за правење сопствен крем за сончање, СПФ не е нешто што треба да се прави дома. Ако сте загрижени за состојките, придржувајте се до производите на база на цинк.)
Секојдневната нега на кожата за преттинејџерските години може да се засили кога хормоните ќе почнат да се менуваат. „Веднаш штом ќе влезете во пубертет, штом ќе се појават митесери, можете да користите медицински производи за нега на кожата“, вели Роџерс. Но постои разлика помеѓу користење еден или два производа што можат да помогнат во борбата против акните и примена на цела низа лосиони и серуми секоја вечер.
Се разбира, сите овие совети се под претпоставка дека децата од преттинејџерска и тинејџерска возраст сакаат да ги слушаат советите на нивните родители, наместо советите на нивните врсници или влијателни лица. Со среќа со тоа.
Особено предизвикувачки аспект на Тикток е тоа што не се само децата од преттинејџерска возраст тие што си даваат лоши совети за нега на кожата едни на други. Социјалните мрежи се преплавени и со медицински инфлуенсери, кои дополнително заработуваат со продажба на сопствени производи или спонзорирани објави.
Ова е добра можност децата на таа возраст да научат внимателно да размислуваат за тоа што би можело да се крие зад пораките, без разлика дали доаѓаат од друго дете или инфлуенсер. Дали тие директно профитираат од купувањето на производите што ги нудат? Впрочем, и дерматолозите велат дека слоганот „помалку е повеќе“ важи и за нега на кожата. Проблемот е што помалку производи значат помал профит за големите компании.
Кога сè друго нема да успее, а особено ако проблематичната кожа почне да предизвикува проблеми, закажете состанок со дерматолог. Можеби сепак ќе го послуша советот на лекар специјалист.
