Ретропатиките на „Адидас“ станаа хит во светот

„Адидас“ (Adidas AG) предвидува поголем профит годинава бидејќи германскиот спортски бренд ја проширува понудата на ретропатики, кои станаа хит и поттикнаа нов раст на глобалната продажба.

Германската компанија за спортска облека очекува оперативен профит од 1,7 до 1,8 милијарда евра годинава, се наведува во денешното соопштение, кое се надоврзува на прелиминарниот извештај за заработката за четвртиот квартал од јануари. Иако тоа е помалку од просечната процена на аналитичарите за оперативен профит од 2,07 милијарди евра, компанијата е позната по своите конзервативни прогнози и веќе трипати ги зголеми своите очекувања минатата година.

Патиките „самба“ - одново се во тренд! Фото: „Блумберг“

 

Неодамнешните солидни резултати го истакнуваат закрепнувањето на компанијата под водство на извршниот директор Бјорн Гулден, кој веќе трета година е на чело на компанијата. Поранешниот извршен директор на „Пума“ (Puma SE) е заслужен за управувањето со кризата по завршувањето на партнерството на „Адидас“ со раперот и дизајнер Је, порано познат како Канје Вест. Инвеститорите позитивно реагираа на враќањето на Гулден кон основите на спортот и прагматичниот пристап за развој на нови обувки и облека. Неговата цел е да ја намали разликата со „Најк“ (Nike Inc.), компанија што се соочува со предизвици, но сè уште има водечка позиција во индустријата.

Продавница на „Адидас“ во Лондон Фото: „Блумберг“

 

Побарувачката за ретромодели на патики, вклучувајќи ги и „самба“ (Samba) и „кампус“ (Campus), продолжува да расте, внесувајќи нов импулс за брендот што минува низ низа кризи во последните години. „Адидас“ претстави повеќе ретромодели, како што се патиките за трчање со тенок ѓон „СЛ 72“ (SL72) и „токио“ (Tokyo).

Поради популарноста на овие модели, Гулден реши да го одложи враќањето на кошаркарските патики „суперстар“ (Superstar) од 1970-тите години, за да не го преплави пазарот со обувки со трите линии.

Компанијата исто така бележи голема побарувачка за спортска опрема, вклучувајќи ги копачките „предатор“ (Predator) и патиките за трчање „адизеро“ (Adizero), соопштија од „Адидас“.

„Адидас“ и натаму се обидува да го симне „Најк“ од тронот Фото: „Блумберг“

 

Компанијата соопшти дека продажбата приспособена според валутните промени во 2025 година веројатно ќе порасне за висок едноцифрен процент, што е во согласност со процените. Ако се исклучи сега веќе непостојната франшиза „Џези“ (Yeezy), „Адидас“ очекува двоцифрен раст.

Во четвртиот квартал продажбата на „Адидас“ порасна за 16 проценти во Кина и за 25 отсто во Европа. Исто така забележа раст од 15 проценти во Северна Америка, пазар на кој долго време доминира „Најк“, компанијата со седиште во Орегон, каде што „Адидас“ долго време се соочуваше со тешкотии.

Во четвртиот квартал компанијата ги распродаде и преостанатите резерви од производите на „Џези“, со кои во текот на 2024 година оствари приходи во износ од 650 милиони евра. Последната продажба дојде по повеќе од две години по завршувањето на партнерството.

Акциите на „Адидас“ пораснаа за околу 32 отсто изминатата година, надминувајќи ги „Најк“ и „Пума“.

Во моментов нема коментари за веста. Биди прв да коментира...

Остави коментар