„Вашерон Константин“ го претстави најкомплексниот рачен часовник во светот

Уште од крајот на 18 век, кога го разви својот прв часовник со приказ на датум, „Вашерон Константин“ (Vacheron Constantin) постојано ги поместува границите на механичкото часовничарство, особено во областа на астрономските компликации – што го потврдува и нивниот џебен часовник со 13 компликации изработен во 1929 година за египетскиот крал Фуад I. Компанијата која оваа година слави 270 години постоење во чест на јубилејот веќе пред неколку месеци претстави нова верзија на моделот Historiques 222, чиј прв модел во времето на 70-тите години од минатиот век беше најтенкиот автоматски механизам со целосен ротор на светот. Сега повторно радикално ги поместуваат границите со претставувањето на најкомплексниот часовник на светот - „Ле кабинот солариа ултра град компликејшн“ (Les Cabinotiers Solaria Ultra Grand Complication). Технолошкото достигнување кое бараше осум години истражување и развој поседува дури 41 компликација, вклучувајќи пет астрономски функции. Сè е развиено, проектирано и составено од страна на еден мајстор часовничар, чиј идентитет „Вашерон Константин“ не сака да го открие.

Новиот часовник има две страни Фото: Vacheron Constantin

За овој часовник се поднесени 13 патентни пријави, а новиот механизам, Caliber 3655, содржи 1.521 рачно склопена и финиширана компонента. Самиот механизам има димензија од 36 мм во дијаметар, а дебелината му е нешто помала од 11 мм. Часовникот е направен од 18-каратно бело злато, дијаметарот му е 45 мм и дебелината 14,99 мм, што се смета за ремек дело на минијатуризацијата. Часовникот е дел од долгата традиција на часовници со потпис на оваа компанија посветени на особеностите на Сончевиот систем и фасцинацијата што ја предизвикуваат.

Сите работи што треба да ги знаете за времето, сонцето, месечината и ѕвездите сега се на вашиот зглоб  Фото: Vacheron Constantin

Повеќе од точно време

Замислете да ги следите плимите и осеките, положбата на сонцето и месечината во текот на денот, па дури и да имате можност да најдете одредена ѕвезда ноќе—сето тоа на вашиот зглоб. Овој часовник зазема посебно место во хорологијата, бидејќи интегрира астрономски функции поврзани со движењето на Сонцето и прикажува различни видови време. Стандардно време – времето кое сите го користиме секојдневно, прикажано класично, со централни стрелки за часови и минути. Сидерално (вистинско време—23 часа, 56 минути и 4 секунди, колку што треба Земјата да се сврти целосно околу својата оска додека кружи околу сонцето) и соларно или тропско време (времето потребно за Сонцето да се врати на одредена позиција). Сите овие времиња варираат во текот на годината. Диференцијалот се нарекува равенка на времето, equation of time, која исто така е прикажана на часовникот.

Ваквата конструкција бара диференцијација во склоповите на запчаниците за да се земат предвид специфичните аспекти на Сончевиот систем – што не е прв пат за класичните часовници. На пример, астрономскиот часовник во Прага (Прашки Орлој), исто така покажува сидерално време, но е револуционерно достигнување за механички рачен часовник.

Осум години истражување и развој под маестрално водство на само еден часовничар Фото: Vacheron Constantin

Тука е и Грегоријанскиот вечен календар, три лунарни индикации, вклучувајќи астрономска месечева фаза со приказ на фазите на Месечината, турбион (кој ги компензира грешките во мерењето на времето предизвикани од гравитацијата кога часовникот е во одредени позиции на раката), како и приказ на друга временска зона и светско време.

Третата астрономска компликација е поврзана со функцијата хронограф со двоен секундарник и е прикажана на задниот дел од часовникот, овозможувајќи одредување на моментот кога избраната ѕвезда ќе се појави во видното поле.

Покрај петте астрономски компликации кои никогаш порано не биле комбинирани во рачен часовник, поседува и специјално осмислен минутен репетитор со Вестминстерско ѕвоно (кој ѕвони на барање користејќи четири чекани и четири гонга со различни тонови), за кој се поднесени седум од вкупно 13 патенти.

Најкомплексниот часовник во светот на прв поглед изгледа многу едноставно Фото: Vacheron Constantin

Уникатен „плаг енд плеј“ систем за сервисирање

Главниот барање упатено до часовничарот од страна на раководството на брендот било да „направи нешто извонредно, но во компактен рачен часовник“, вели Кристијан Селмони, директор за стил и наследство во „Вашерон Константин“.

„Успеавме да вклучиме толку многу компликации и компоненти, што е фантастично достигнување“, вели Селмони. Ставањето 41 компликација во часовник „без целосно редефинирање на целата структура значеше да имаме прилично голем, прилично дебел часовник. Да го направивме што е можно покомпактен беше клучниот двигател на иновацијата“.

Уште еден патент се однесува на она што брендот го нарекува „плаг енд плеј“ (plug and play) систем, кој беше со години во развој. Иако не се смета како една од 41 компликации, тоа е генијална иновација дизајнирана да го поедностави сервисирањето на часовникот.

„Овој систем во срцето на механизмот е создаден така што кога сопственикот треба да го сервисира часовникот, часовничарот не мора да отстранува повеќе стрелки, бројчаници или компликации. Тоа е некој вид модул кој може да се исклучи“, вели Селмони. „Осмислен е да заштеди денови и денови работа при сервисирање.“

Фото: Vacheron Constantin

Според Селмони, еден од најимпресивните аспекти на овој најкомплексен рачен часовник во светот е читливоста на неговите функции. „Нашиот часовничар, кој е истовремено и инженер, го дизајнираше секој бројчаник и секоја индикација така што да бидат многу лесно читливи. Тоа апсолутно не е лесно да се постигне. Мораше повторно да го осмисли распоредот на функциите, да создаде нов систем на брегови и дури да дизајнира ново куќиште за механизмот да се вклопи на начин кој го замислил“.

Механизмот Caliber 3655 Фото: Vacheron Constantin

Тоа е само продолжение на традицијата на „Вашерон Константин“е да ја спојува врвната механика со уметничките занаети. Работилниците ги негувале техниките како гравирање, емајлирање и уметничко поставување на скапоцени камења.

Еден од првите примери на оваа спојка на техника и уметност бил џебниот часовник од 1812 година со репетитор и емајлиран бројчаник. Исто така, моделот Reference 4261 од 1943 година имал ултратенок репетиторски механизам од само 3,2 мм.

Абрахам и Франсоа Константин, коосновачи на брендот  Фото: Vacheron Constantin

Последниве години се создадени повеќе исклучително комплексни рачни часовници, како Les Cabinotiers Celestia Astronomical Grand Complication 3600 од 2017 година со 23 компликации и Les Cabinotiers Grand Complication Split-Seconds Chrono Tempo од 2020 година со 24 компликации. Секој од тие часовници има дијаметар од 50 мм и дебелина од 20 мм или повеќе.

Сепак, со Les Cabinotiers Solaria се надминаа самите себе и ги соборија рекордите на другите водечки брендови. Овој часовник е уникатен примерок. Селмони вели дека се надева дека ќе биде направена уште некоја верзија во различно куќиште или со различни бои на бројчаникот. Швајцарскиот производител не сака да ја открие цената, но ако ги имаме предвид нивните претходни исклучително комплексни рачни часовници со сепак помалку компликации и патенти, тие често имале цена од над два милиона долари.