Може ли серијата „Белиот лотос“ да го извлече луксузот од кризата?

Во време кога луксузот сè повеќе личи на берза - цените растат, аналитичарите прават графикони, а купувачите сè почесто ја гледаат етикетата пред да го допрат кашмирот - се чини дека најефикасниот моден потег повеќе не е ревија во Париз, туку добра позиција во хит-серија на Ејч-би-о (HBO).

ЛВМХ (LVMH) ги зголемува цените на сè, „Хермес“ (Hermes) ѝ останува верен на политиката „ако прашате за цената, не сте купувач“, додека „Керинг“ (Kering) со „Гучи“ (Gucci) како главен адут бележи пад на продажбата од 25 проценти. Но тука на сцена стапува серијата „Белиот лотос“ (The White Lotus), чија трета сезона потврдува дека влијанието на телевизискиот кадар може да биде најефективната реклама.

Ако се суди по виралниот момент што завладеа на интернет, доволно е Паркер Поси, во ликот на Викторија Ратлиф, да облече свилено кимоно од брендот „Џим Томсон“ (Jim Thompson) и со лесно подигнување на веѓите да му каже на сопругот: „Мислам дека во овие години не можам да живеам неудобно“ за да се случи бум. Емитуван на 23 март, споменатиот модел веднаш беше лансиран во орбитата на побарувачката. Продажбата на брендот „Џим Томсон“ порасна дури за 671 процент, известува ВВД (WWD).

Модните детали може да направат да се чувствувате како да сте во луксузен ресорт во Тајланд Foto: Lauren DeCicca/Getty Images

Дизајнерите се свесни дека телевизиската серија – чија седма епизода во САД привлече рекордни 4,8 милиони гледачи – може да биде одлична платформа за промоција на облека. Костимографката Алекс Бовард, задолжена за костимите во сите три сезони, креираше препознатливи и естетски доследни стајлинзи што инспирираат голем број обожаватели низ светот со секоја нова епизода.

Бовард истакнува дека облеката во серијата не е само естетски избор туку и одраз на личноста на ликовите. „Не работиме во стилот на тивкиот луксуз“, рече таа за „Вог“ (Vogue), што значи дека облеките често се изразени и емоционално силни, всушност „гласен“ луксуз.

 

Гламурот и сјајот на луксузниот одмор ги красат најбараните парчиња

Креирањето на изгледот на ликовите вклучува комбинирање престижни брендови со уникатни старински парчиња и локални ракотворби за да се постигне автентичен и визуелно богат резултат. Бовард при осмислувањето се потпира на реални извори како Инстаграм (Instagram), други социјални мрежи и каталози на луксузни одморалишта. Препознатливи се колоритот и текстурата карактеристични за тропските дестинации. Покрај луксузните брендови, користени се и уникатни парчиња, како кафтаните од Јужна Америка, рачно изработени парчиња од Бангкок и фустани по мера – како оној за Сриталу (во втората епизода).

Сцените со парчиња од луксузните брендови изобилуваат, а самите производи станаа култни. Џеклин носеше светкав мини-фустан што привлекува внимание од брендот „Валентино“ (Valentino), Саксон покажува наклонетост кон додатоците со вез од брендот „Сматерс и Бренсон“ (Smathers & Branson). Ќе се сетите повторно и на Викторија Ратлиф и нејзината торбичка од „Гучи“ (Gucci) со рачка од бамбус...

Најбараните парчиња во третата сезона на серијата се кошулата со принт од крокодил од брендот „Томболо“ (Tombolo), која ја носеше Локлан, помладиот брат од семејството Ратлиф, фустанот со шема и врзување околу вратот од брендот „Цимерман“ (Zimmermann), кој го носеше неговата сестра Пајпер, како и зеленото бикини од брендот „Хунза џи“ (Hunza G), кое го носеше Клои. Според пишувањето на „Гардијан“ (The Guardian), сите овие парчиња веќе се распродадени на интернет.

 

Во серијата особено се забележуваат следните брендови, а некои од нив креираа посебни колекции само за „Белиот лотос“:

• „Долче и Габана“ (Dolce & Gabbana) – елегантни парчиња, како розов фустан со шал за ликот на Тања

• „Валентино“ – посебна колекција „Ескејп“ (Escape) осмислена токму за третата сезона

• „Ботега Венета“ (Bottega Veneta), „Гучи“ (Gucci), „Прада“ (Prada), „Лоев“ (Loewe), „Луј Витон“ (Louis Vuitton), „Пако Рабан“ (Paco Rabanne), „Армани“ (Armani), „Етро“ (Etro) – од фустани до торби

• „Жакемус“ (Jacquemus) – дизајнира розов фустан и фустан со точки за ликот на Клои

   

Сите сакаат дел од „Белиот лотос“

За модниот стил од серијата да стане подостапен за обожавателите низ светот, Бовард во февруари годинава соработуваше со брендот „Ејч енд ем“ (H&M), кој лансира колоритна колекција инспирирана од третата сезона на популарната серија. „Идејата беше дека, иако не може секој да си дозволи престој во луксузен хотел, секој може да си дозволи да изгледа гламурозно и да има дел од стилот на ‘Белиот лотос’ во својата гардероба“, рече таа.

H&M press

Колекцијата, која беше достапна во избрани продавници на „Ејч енд ем“ и онлајн, опфаќа 25 парчиња облека и модни додатоци креирани за совршено стилизиран изглед за одмор. „Колекцијата е осмислена така што овозможува лесен премин од дневни во вечерни комбинации, обезбедувајќи разновидност и удобност за време на летувањето“, изјави креативната советничка на „Ејч енд ем“, Ан-Софи Јохансон.

Телевизиските серии секако имаат долга и богата историја на влијание врз продажбата на модни брендови. Серијата „Сексот и градот“ во 1990-тите ги крена во облаци дизајнерите Маноло Бланик и Џими Чу.

„Белиот лотос“ исто така не е првата серија што директно соработува со модни брендови. Во 2009 година, њујоршката дизајнерка Ана Суи создаде колекција за „Таргет“ (Target), инспирирана од гардеробата од серијата „Озборувачка“ (Gossip Girl), додека „Банана рипаблик“ (Banana Republic) во 2011 година соработуваше со серијата „Мед мен“ (Mad Men) – а годинава и со „Белиот лотос“. Колекцијата, лансирана во март, вклучуваше 24 парчиња за мажи и жени, како и додатоци што ги спојуваат лежерната елеганција и духот на патувањето од серијата.