Дали на брендовите ќе им треба сосема нова формула за успех во 2025-та?

Тешко е да се поверува дека во ова време од годината не носиме погламурозни вести кога станува збор за стилот, но според годишното истражување на „Мекинзи“ (McKinsey) за состојбата на модата, прогнозите за 2025 година се далеку од сјајни.

Испитаниците, лидери од светот на модата, се речиси исто толку песимистични како и минатата година. Само 20 проценти од нив очекуваат подобро расположение на потрошувачите, додека 39 проценти предвидуваат дополнително влошување. Она што најмногу загрижува е намалениот апетит за трошење - велат дури 70 проценти од модните експерти.

Иако модната индустрија е тешко да се предвиди, дури и во најдобрите времиња, наредната година ветува посебна доза драма и неизвесност. Регионалните разлики, кои минатата година беа во прв план, само ќе се продлабочат. На тоа додадете го сè поголемиот пораст на копии на производи и потрошувачи кои сè повнимателно ја мерат секоја пара.

За да одговорат на предизвиците, се очекува брендовите да ги отфрлат старите модели и да најдат нова формула за диференцијација и раст. Еве 10 клучни теми кои според истражувањето на „Мекинзи“ ќе го одредат правецот за модните брендови во 2025 година.

Подобар однос на цена и квалитет

Во ерата на штедење, односите на цена и квалитет стануваат сè поважни. Тоа значи раст на сегментите за препродажба и производи по намалени цени. Брендовите кои не ја следат оваа стратегија, ќе мора да објаснат зошто нивните производи заслужуваат да бидат поскапи, а тоа значи унапредување на купувачкото искуство, и тоа не само онлајн, туку и во продавниците.

Depositphotos

Личен однос со купувачот

Брендовите ќе вложуваат сè повеќе во обука и подобрување на продажните тимови. Продавачите играат клучна улога во поврзувањето со купувачите, бидејќи треба да ја покажат вистинската вредност на производите. Ова значи дека интеракцијата со купувачите ќе стане поважна од кога било, за да се создаде подлабока поврзаност со брендот.

Посилна улога на вештачката интелигенција за онлајн платформите

Со враќањето на купувачите кон физичката малопродажба, луксузните платформи кои работат исклучиво онлајн се соочија со предизвици. Во наредната година, се наведува, слични предизвици би можеле да доживеат и масовните онлајн платформи. Паметните играчи во е-трговијата, се вели, се фокусираат на нови начини на откривање на производи. Користењето на вештачката интелигенција (ВИ) за персонализација, содржина и пребарување може да им помогне на купувачите поефикасно да најдат брендови и производи - и да ги поттикне на купување.

Bloomberg Mercury

Сребрена генерација - купувачи кои повеќе трошат

Иако модната индустрија традиционално им даваше предност на помладите купувачи, т.н. сребрена генерација (постари од 50 години) станува сè позначаен дел од популацијата која троши на мода. Во текот на 2025 година, се верува, брендовите ќе имаат најмногу корист од обраќањето кон овие често занемарени купувачи.

Наоѓање јасно место во модниот екосистем

Покрај турбулентниот период за луксузните платформи за трговија преку интернет, и онлајн пазарите кои не се луксузни, се соочуваат со проблеми со деловните модели. Тие мора да најдат јасно место во модниот екосистем за да преживеат.

Bloomberg Mercury

Новите брендови имаат предност во однос на етаблираните

Брендовите кои се нови и флексибилни, познати како „предизвикувачи“, ќе преземаат сè поголем дел од пазарот. Овие брендови не работат според традиционалните правила и успеваат да привлечат купувачи со иновативни производи и креативни пристапи. Се наведува дека ова особено ќе биде изразено во категоријата спортска облека, каде етаблираните играчи губат пазарен удел во корист на помали, но иновативни конкуренти.

 

Мудро управување со резервите

Инвентарот останува предизвик за индустријата. Се смета дека трговците ќе го забрзаат реструктурирањето на своите синџири на снабдување за да дадат приоритет на локализацијата на производството и соработката со земји кои се геополитички усогласени. Акцентот е на подетално планирање, со брендовите кои сè повеќе ќе усвојуваат технолошки алатки и ќе ги прилагодуваат своите оперативни модели за да поддржат динамични синџири на снабдување.

Географијата сè поважна при набавката

Глобалната трговија се менува, бидејќи државите сега повеќе обрнуваат внимание со кого имаат политичка и економска усогласеност при набавката на производи. Поради повисоките трошоци во далечните земји, како и промените во трговските политики, поверојатно е дека модните брендови ќе се фокусираат на снабдување од земји кои се поблиску до нивните главни пазари и седишта. Во 2025 година, ова ќе биде уште поизразено.

Bloomberg Mercury

Индија и Јапонија во фокусот

Промената на потрошувачките навики во Кина, како и враќањето на меѓународните патувања, ќе ги наведе интернационалните брендови да побараат други азиски пазари. Индија ќе биде во центарот на вниманието, особено за брендовите од високата мода, додека се очекува дека луксузниот бум во Јапонија ќе продолжи и во 2025 година, поттикнат од силната меѓународна и домашна потрошувачка.

Одржливоста мора да остане приоритет

На крајот, иако купувачите покажаа помала волја да платат повеќе за еколошки прифатливи производи, климатските промени и растечките трошоци на природните ресурси значат дека одржливоста мора да остане приоритет за брендовите. Во наредните години, модната индустрија ќе мора да продолжи со напорите за намалување на своето негативно влијание врз животната средина.

Во моментов нема коментари за веста. Биди прв да коментира...

Остави коментар