Во последните неколку години компаниите сè повеќе се фокусираат на етичките и социјалните проблеми и инвестираат поголеми суми пари за да ги решат еколошките проблеми, кои исто така ги засегаат нивните потрошувачи. Ова е особено важен фактор за купувачите на луксузни добра, за кои одржливоста ќе биде важен критериум во иднина при изборот на производите и искуствата што ќе си ги дозволат, заклучија говорниците на вториот панел „Одржливост и етика во луксузната индустрија“ на конференцијата „Иднината на луксузот“ во организација на „Блумберг Адрија“.
Аница Раденовиќ, директорка за развој на брендови во „Фешн компани“ (Fashion Company) и бренд-менаџерка во „ПВХ груп“ (PVH Group), вели дека одржливоста е полесна за имплементација во западниот свет, но таа станува сè поприфатена и во регионот.
„Мислам дека тоа не е поврзано само со луксузниот сегмент, туку со секој деловен сегмент што се приспособува на потребите на потрошувачите. Тие денес се случуваат многу брзо, мора да бидете проактивни, да се приспособите и да најдете начин да го привлечете нивното внимание“.
Крајниот потрошувач обрнува внимание на тоа, па дури е подготвен и да плати повеќе за производи што ги задоволуваат неговите стандарди. „Верувам дека секоја компанија што ќе се израмни во трката со променетите афинитети на потрошувачите ќе може да опстане“.
Маринко Укропина, стратег и консултант во областа на одржливоста на бизнисот, поранешен генерален директор на „СГС Адрија“ (SGS Adria), зборуваше за имплементацијата на паметни решенија преку неговиот приватен бизнис - имплементација на проектот „Смарт марина“. Како што појасни тој, тоа подразбира целосна дигитализација на сите операции на пристигнување на бродовите во Порто Монтенегро.
Како што оцени, дел од луксузот и одржливоста се паметните решенија, кои водат до следното ниво на луксуз со примена на вештачка интелигенција. Тој нагласи дека е важна подготвеноста на државата да се вмеша во тоа.
„Постојат системи за следење, вклучувајќи дијаманти, фармацевтски производи и нафта. Она што е важно е подготвеноста на државата да влезе во тоа - тие беа подготвени затоа што имаат корист. Бенефиција имаа и сите други засегнати страни“, рече тој и заклучи дека за одржливост се потребни повеќе страни.
Според него, многу е важно навреме да се информира јавноста за претстојните промени, како што е механизмот за приспособување на границата на јаглеродот (Carbon Border Adjustment Mechanism), бидејќи во спротивно тоа може да биде „голем удар за економијата“.
Душан Симиќ, гемолог и експерт во областа на трговијата со дијаманти, генерален директор на „Аналитичка гемологија и накит“ (AG&J), исто така ги спомена важноста на законските регулативи и иницијативата на државата за регулирање одредени области и казнување на оние што го прекршуваат законот. Тој посочи дека накитот е симбол на цивилизацијата и дека не станува збор за одржливост.
На темата одржливост се осврнаа главните говорници на конференцијата, кои го споделија своето искуство со публиката. Ашок Сом, професор што се занимава со темата луксуз, ги презентираше заклучоците од своето истражување, кои покажуваат дека трендовите во индустријата се менуваат - „додека индустријата е засегната од високата инфлација, дигитализацијата и геополитиката, потрошувачите сè повеќе се вртат кон искуствата, инклузивноста и одржливоста. Младите купуваат малку, а ако тие не влезат на пазарот, кој ќе влезе?“, додаде тој.
Познатиот дизајнер на накит Стивен Вебстер зборуваше за своето децениско искуство во сегментот луксуз. Во оваа пригода ги спомна трендовите на персонализација, важноста на етичките норми и, секако, уникатноста. „Ние не го менуваме светот, но за да го задржиме местото што го заземаме, автентичноста мора да остане“, рече Вебстер.
.webp){kind=icon}
