Поранешната НБА-ѕвезда Тони Паркер ужива во работата на имотот Шато Ла Маскароне посветен на производството на неговото розе вино и на неговиот прв излет во светот на виното. Розето на четирикратниот шампион ќе биде достапно во мај, како што наведува Елин Мекој во текст за „Блумберг“.
Паркер, кој е попознат по своите вештини на кошаркарскиот терен, реши да го оствари својот младешки сон откако се повлече од него.
Во интервјуто тој вели дека за првпат пробал вино на 17 години, а на 19 години, откако преминал во Спарс, имал пари да купи „добро вино“. За време на едно од патувањата, Паркер го забележал тренерот Грег Попович како чита списание за вино и се зближил со него бидејќи делеле иста страст. Кога Попович го поканил на вечера во својот дом, тој извадил „бордо“ од 1982 година, која е година кога е роден Паркер. Попович, кој може да се пофали со сериозна колекција на вина, на тој начин станал негов ментор.
Тој вели и дека неговите соиграчи во тоа време биле заљубени во жестоки пијалаци и коктели, кои него воопшто не го интересирале. Сепак, денес многу играчи на НБА се вклучуваат во бизнисот со вино. Во текот на изминатите неколку години Ц.Ј. Меколум, Ченинг Фрај, Кевин Лав, Џејмс Харден и други создадоа свои брендови за вино.
Но бизнисот со вино не е резервиран само за НБА-ѕвездите. Вината што се во сопственост на познати личности се особено популарни во последниве години, а една од најважните причини за овие бизнис-модели е нивната популарност.
Живот со розови меурчиња
Веројатно меѓу првите се Стинг и неговата сопруга Труди Стајлер, кои уште во 1997 година го купија имотот Ил Палаџо - кој зафаќа околу 350 хектари земја, главно обрасната со шума, со лозја, маслинови градини и езера во Тоскана, Италија. Од средината на 16 век, Ил Палаџо одгледува вински култури, ги ферментира и ги амбалажира своите вина. Стинг и Труди вложија големи напори за да ја зачуваат таа традиција. Користејќи методи на органско земјоделство, тие оживеаја 11 хектари винова лоза од 2000 година, се наведува на официјалната веб-страница. Нивните вина, именувани по најпознатите хитови на познатиот пејач „Message in a Bottle“, „When We Dance“, „Sister Moon“ беа пуштени во продажба низ Европа и во САД во 2014 година. Вината чинат околу 10 фунти и може да се купат онлајн.
Кајли Миног, која го лансира својот асортиман на вина пред нешто повеќе од две години, продава повеќе од 7 милиони шишиња годишно, а нејзиното просеко оствари продажба од 7,7 милиони фунти во 2022 година. Со многу прифатлива цена од 12 фунти во малопродажните синџири и околу 110 фунти во престижните ресторани и клубови, со меурчиња со привлечна боја на пудра во стилизирано шише, нејзиното просеко розе е најпродавано во категоријата брендирано просеко розе во Велика Британија.
Кара Делевињ го лансира својот бренд просеко „дела вита“ со сестрите Клои и Попи во август 2020 година.
Станува збор за две вегански просека – „дела вита просеко супериор“ (Della Vite Prosecco Superiore - DOCG), достапно за 25 фунти, и „дела вита просеко тревизо“ (Della Vite Prosecco Treviso - DOC), кое се продава за 20 фунти. Тие ја добија највисоката класификација за вино во Италија.
„Хемптон вотер розе“ (Hampton Water Rosé), кое во 2018 година го лансираа Џон Бон Џови и неговиот син Џеси, во соработка со лозарот Жерард Бертранд, се продава по цена од околу 16 фунти. Станува збор за слатко суво розе.
„Пит, Перин и Петерс. Три П, три души, три сензибилитети и три страсни желби да се создаде нешто незаборавно. Занаетчиството, страста и креативноста се испреплетуваат во потрагата по убавина и неочекувано“, се наведува на официјалната веб-страница на шампањот „флер д миравал“ (Fleur de Miraval). Пит е, како што претпоставувате, Бред Пит, кој во авантурата со розовите меурчиња е заедно со две други семејства што се искусни во винскиот бизнис. Но сѐ почна во 2008 година, кога со неговата тогашна сопруга Анџелина Џоли го купи имотот Миравал во Прованса за 25 милиони евра, кој служеше како место за семеен одмор, а подоцна стана комерцијален потфат, произведувајќи мед, маслиново масло, линија за нега на кожа и музика од студиото „Миравал“, како и првото розе вино „миравал кот д прованс“ (Miraval Côtes de Provence), кое чини околу 18 евра, чии приходи достигнаа 50 милиони долари во 2021 година, како што се наведува во текстот во „Венити фер“. Подоцна, во текот на разводот, имотот стана сцена за борба со многу адвокати, понекогаш дури нарекувана и војна за розе, но тоа е друга приказна.
Асови меѓу вината
Шампањот на Џеј Зи, „арман де брињак бај Џеј Зи“, чини 285 фунти. Секое шише од ексклузивното пенливо вино, наречено „ејс оф спејдс“ (Ace of Spades - Pik as), е рачно изработено од тим од осум луѓе во местото Шињи ле Роз, Франција. Брендот е создаден од семејството Катиер, кое има богата историја како елитна куќа за шампањ, со семејни лозја уште од 1763 година. Џеј Зи се вклучи во „Арман де Брињак“ во 2006 година, откако го бојкотираше својот претходен омилен луксузен шампањ „кристал“. Пред три години, тој 50 отсто од акциите во „Арман де Брињак“ му продаде на „Моет Хенеси“, одделот за вино и пијалаци на луксузниот конгломерат ЛВМХ (LVMH), во сопственост на Бернард Арно. Сумата не е позната. „Арман де брињак“, со цена од околу 285 фунти за неговиот основен брут, има репутација како шампањ за забава и е достапен и во шише од 30 литри познато како „мидас“ (Midas). „Арман де брињак ејс оф спејдс брут голд шампањ мидас“ се продава за 57.950 фунти. Се смета дека цената ја одредува ограниченото количество на производство, што е и стратегија со која ЛВМХ влијае на големата побарувачка и цена на своите производи и во другите категории.
Инаку, како што објави „Блумберг“ кон крајот на минатата година, куќата „Катиер“ ги поставува темелите за лансирање друг луксузен бренд, за кој одбија да дадат детали, освен дека сопственикот на „Ролс-Ројс“ сака бренд на шампањ што ќе одговара на темноцрвениот финиш на автомобилот „ролс-ројс дроптејл роудстер“. „Шампањ де Лози“ (Champagne de Lossy) засега има само онлајн страница.
За некои ѕвезди, сепак, влегувањето во винската сцена е начин да се направат себеси повторно актуелни, како што е случајот со рап-ѕвездата од 1990-тите Снуп Дог. Со австралискиот производител на вино „19 крајмс“ (19 Crimes), кој во 2021 година беше прогласен за иновација број еден во производството на вино на сите времиња, пред две години го создаде првото калифорниско вино во нивното портфолио. Виното „19 крајмс кали ред“ е уникатна мешавина со зрел, силен овошен вкус на „петит сира“, дополнета со светло, малку кандирано црвено овошје од „зинфандел“ со 5 проценти мерло. Инспирацијата за брендот има историски контекст. Имено, како што пишува на официјалната веб-страница на брендот, во 1788 година, егзилот во Австралија од Велика Британија бил казна по избор. Ако некое лице извршело некое од 19-те злосторства, тргнувало на мачно патување, каде што со месеци подоцна го чекала неизвесна судбина. Времињата биле тешки, но овие поединци биле уште посилни и ги совладувале пречките, за на крајот да добијат искупување, односно да формираат нов дом и да влијаат на обликувањето на новата култура и национален дух во Австралија. Виното чини 9 фунти и веќе неколку години е едно од најпродаваните црвени вина во малопродажните објекти низ светот.
Соработка со познатите е бизнис-модел на новозеландската компанија „Инвиво вајнс“ (Invivo Wines). Тие пред три години, во соработка со Сара Џесика Паркер, ги лансираа „инвиво Х СЈП розе“ (119,94 долари) и совињон бланк (131,94 долар). Вината во колекцијата „Инвиво Х, СЈП“ се прават по уникатна мешавина создадена од Сара Џесика Паркер и луѓето во „Инвиво“. Вината се најдоа меѓу 100-те најдобри вина на светот според „Вајн спектатор“ уште во првата берба! Потегот дошол по огромниот успех со ирскиот актер Греам Нортон, кој има свој бренд на совињон бланк, шираз, просеко и розе. Компанијата секоја година продава околу 15 милиони шишиња низ светот. Нортон првпат ги здружи силите со „Инвиво“ во 2014 година, а сега соработува со винарницата за да избере мешавини за својата линија.
Оваа винска колекција има освоено над 300 вински награди, се наведува на официјалната веб-страница на компанијата, која ја има и ТВ „Инвиво“, каде што љубителите на виното можат да дознаат повеќе за винските авантури и деталите од соработката со овие две ѕвезди.
ФАКТОРИ ШТО ВЛИЈААТ НА УСПЕХОТ НА ВИНАТА НА СЛАВНИТЕ
• Лична поврзаност: Потрошувачите често чувствуваат лична поврзаност со познатите личности. Со купувањето вино во сопственост на таква личност, тие чувствуваат емотивна поврзаност со производот.
• Маркетиншка моќ на славните личности: Името на славната личност може значително да ја подобри маркетиншката моќ на производот. Потрошувачите се склони да пробаат производ што е поврзан со славна личност на која ѝ се восхитуваат.
• Ексклузивност: Вината што се во сопственост на познати личности често се доживуваат како ексклузивни и луксузни. Тоа може да привлече потрошувачи што бараат посебно искуство или статус.
• Иновации и различност: Славните личности можат да донесат иновации и различности во светот на виното. Некои од нив се трудат да создадат посебни вкусови или да обезбедат уникатно искуство, со што го привлекуваат вниманието на љубителите на виното.
• Промоција преку социјалните медиуми: Славните личности често ги користат социјалните медиуми за да ги промовираат своите брендови, што им овозможува директен контакт со обожавателите. Овој тип директно ангажирање може да ја зголеми видливоста и да привлече потрошувачи.
.webp){kind=icon}
