За бизнисите и жителите на Давос постојат 51 недела нормален живот годишно. И таа недела во која планинскиот град со нешто повеќе од 10.000 жители се претвора во едно од најскапите места во светот. Поводот е, погодувате, Светскиот економски форум (СЕФ) кој веќе започна и ќе трае до 24 јануари.
Се проценува дека само една недела генерира просечен промет од околу 100 милиони евра за ова одморалиште на швајцарските Алпи. За организаторите, пак, форумот само минатата година донесе 440 милиони евра приход.
Но, има и трошоци. Голем дел од буџетот е наменет за обезбедувањето-вкупно девет милиони евра. Половина од трошокот е на товар на самиот организатор, Фондацијата СЕФ, четвртина е на товар на федералната влада, 21,67 отсто од трошокот го покрива кантонот Граубунден, во чии рамки се наоѓа самиот Давос, додека конкретно градот е одговорен за 3,33 отсто од буџетот.
Прочитај повеќе
Давос 2025: Трамп, глобални предизвици и зачувување на планетата
Светскиот економски форум во Давос почна денеска во сенка на инаугурацијата на Доналд Трамп за 47. претседател на САД.
20.01.2025
Давос во сенка на стравот од војна и мрачните очекувања за глобалната економија
Светскиот економски форум, институција која ја собира елитата со децении, објави два извештаи пред почетокот на конференцијата во кои се сумира невообичаено високо ниво на песимизам,
19.01.2025
Духот на Давос е присутен од 1971 година
Сè започна во 1971 година, кога германскиот инженер и економист, Клаус Шваб, го основаше СЕФ.
Професорот сакаше учесниците да имаат можност да избегаат од метежот и вревата на секојдневниот живот во средина погодна за размислување и дискусија.
Тој се надеваше дека Давос, кој, меѓу другото, беше инспирација за романот на Томас Ман, „Волшебната планина“, ќе им помогне на луѓето да се чувствуваат доволно опуштено за да разговараат искрено, а истовремено да го задржат чувството за заедница и меѓусебно почитување.
Ова стана познато како „духот на Давос“, кој продолжува да биде белег на собирите на овој форум.
Оттогаш, за време на СЕФ, во градот престојуваат околу 3.000 учесници на познатиот форум, што е речиси една третина од локалното население.
Во градот со само 10 средни хотели и 40 мали, најголема побарувачка има за сместување. Организаторите на СЕФ веќе имаат договори со големите хотели и преку нив се прават резервации. Секој кој не е доволно брз треба да размисли за опцијата за сместување преку „Ер-би-ен-би“ (AirBnb), па дури и во блиските градови Клостерс и Дорф.
Градоначалникот на Давос, Филип Вилхелм, минатата година изјави дека економијата на градот зависи од СЕФ, при што некои хотели наплаќаат до 53.000 долари за ноќевање во нивните луксузни апартмани.
„Многу компании и голем број луѓе се потпираат на приходите од СЕФ, при што некои тогаш генерираат околу 40 отсто од својот годишен приход“, рече Вилхелм.
Светските лидери можеби уживаат во луксуз, но повеќето други уживаат во функционалните, минималистички сместувачки капацитети во близина на главното шеталиште, кои се направени со молскавична брзина. Овие сместувачки капацитети, кои изгледаат и се чувствуваат како студентски домови, вклучително и кревети што се спуштаат од ѕидот, во оваа недела достигнуваат цени од неколку илјади долари, објасни колегата од „Блумберг“, Ед Стејпли, кој секоја година присуствува на форумот.
И богатите мислат на буџетот
Интересно е тоа што релативно едноставниот и буџетски хотел „Хилтон Гарден Ин“ (Hilton Garden Inn) беше најпопуларниот хотел за време на минатогодишниот форум, дури и за најмоќните гости.
Со повеќе од 750 локации ширум светот и просечна цена од околу 120 долари за ноќ, овој ланец не е баш синоним за ексклузивитет, но минатата година во Давос елитните директори кои присуствуваа на Светскиот економски форум се изборија за соба токму во овој хотел.
„Волстрит журнал“ (Wall Street Journal) известуваше за познати личности кои ја посетиле Швајцарија за конференцијата и престојувале во „Хилтон“, вклучувајќи го и зетот на претседателот Трамп, Џаред Кушнер, како и британските принцези Еугени и Беатрис.
Поексклузивниот и според многумина најдобриот хотел во Давос, „Штајгенбергер гранд хотел Белведере“ (Steigenberger Grand Hotel Belvédère), се чини дека е во центарот на сите случувања.
Хотелот организира 300 настани за време на СЕФ, опслужувајќи околу 2.500 делегати, додека сместувачкиот капацитет на хотелот вклучува 126 соби. Во редовни услови хотелскиот персонал брои 80 вработени, но за време на форумот оваа бројка се зголемува на 300. Цената за соба вон оваа недела во просек изнесува околу 300 евра.
Слична е цената и во хотелот „Амерон“ (Ameron). Тамара Хендерсон, менаџерка на хотелот, објаснува дека за Форумот го реконструираат целиот хотел и испорачуваат 1.000 оброци дневно.
За тие кои се помалку среќни или брзаат, „Ер-би-ен-би“ е можно решение, но дури и тоа не доаѓа со поприфатлива цена. Многу жители ги напуштаат своите домови за да сместат дел од илјадници гости за кои нема доволно хотелски соби, а тоа дебело го наплатуваат.
На пример, стан со три спални соби, на осум минути пешачење од конгресниот центар, може да чини од 3.800 швајцарски франци (околу 4.000 евра) до 12.000 евра за цела недела.
Истражувањето на интернет за оваа статија покажа дека за време на СЕФ е речиси невозможно да се најде поевтино сместување во Давос од долната граница за „Ер-би-ен-би“ спомената погоре.
СЕФ „распродажба“
Инфлацијата на цените на локалните услуги и сместувањето може негативно да влијае на жителите и малите претприемачи кои не се директно вклучени во СЕФ.
СЕФ, исто така, ги ревитализира продавниците кои инаку се празни цела година или кои имаат само неколку слики на излозите. Жителите ги нарекуваат „псевдогалерии“. На пример, има неколку ресторани кои се отворени само за време на состанокот на СЕФ. Рестораните и пекарите работат 24 часа
Не се само сопствениците на станови зафатени од „златната треска“ во Давос. Компании и организации од целиот свет преземаат пекари, книжарници, оптички дуќани и други објекти. За време на СЕФ овие простории служат и како привремени канцеларии и како платформи за рекламирање.
Фото: Холи Адамс/„Блумберг“
Според извештајот на весникот „Ноје цурхер цајтунг“ (Neue Zurcher Zietung), на шеталиштето во Давос десет дена пред почетокот на СЕФ минатата година на излогот на продавницата за женска мода „Либлингсштук“ (Lieblingsstück) бил поставен постер на кој пишува „СЕФ распродажба“ (WEF Sale), рекламирајќи попусти до 70 проценти. Причината? Продавницата е изнајмена на странска компанија за време на форумот и дотогаш мора да биде испразнета. Истиот извор наведува дека иако СЕФ за многумина е „златна кокошка“, не се сите среќни поради „замрзнатите“ цени за време на еднонеделната треска.
Кога сме веќе кај рестораните, најважно е да знаете дека резервирањето во кој било ресторан во текот на оваа недела е подвиг со повеќе маневри.
Нашиот инсајдер го препорачува „Pot-au-feu“, кој ги нуди најдобрите шницли и дивеч, како и извонредно месо и фонду со сирење. Неодамна реновираната „Џентиана“ (Gentiana) е лидер за фонду и бургундски полжави, а тука е и „Стал Валар“ (Stall Valär), простран ресторан и бар со локални швајцарски јадења и совршен телешки тартар.
Со оглед на тоа колку е сè зафатено и преполно, алтернативата е да се снабдите со залихи на храна. Локалниот супермаркет „Коп“ (Coop) може да ви биде најдобар сојузник, без разлика дали ви требаат тестенини, швајцарско чоколадо или козметика, сето тоа ќе го најдете таму. И во обид да се искористи „златната треска“ во Давос, пекарите се отворени 24 часа.
Адријан Вебер, сопственик на пекарата „Вебер“ (Weber), вели дека мора да ангажираат 80 отсто повеќе работници за да ја задоволат побарувачката.
Коктел за добредојде од минатата година на СЕФ.
Фото: Стефан Вермут/„Блумберг“
Вистинската моќ често лежи во неформални ситуаци,- приватни задкулисни состаноци и спонтани собири. Затоа, баровите често се местата каде што се одржуваат најдобрите „средби“. Познатиот пијано бар „Тоник“ (Tonic Piano Bar) во хотелот „Европа“ (Europe) обично до раните утрински часови е преполн со доушници и преговарачи од Давос, додека пијанистот исполнува музички желби. Забавата продолжува во „Шале Бело“ (Chalet Bello), „Тихуана бар“ (Tijuana Bar) и клубот „Постли“ (Pöstli Club), секако, ако успеете да влезете.
.webp){kind=icon}
