Во последните неколку години, фотографите на „Флајинг дрес фото“ (Flying Dress Photo) на грчкиот остров Санторини го минуваат летото фотографирајќи го истиот кадар одново и одново: туристи позираат додека носат луксузни сатенски тоалети кои се веат на ветрот додека во позадината, на летното сонце блескаат бело варосаните куќи со сини куполи кои се препознатливо обележје на овој остров. Со просечно осум фотосесии со развеани фустани дневно, секоја по цена од над 550 евра од час за едно лице, овој мал бизнис - чиј модел целосно се заснова на еден тип на фотографија од летување, која е многу атрактивна за на Инстаграм, може да донесе продажби од речиси половина милион долари за само четири месеци.
А ова е и прилично конзервативна проценка: клиентите имаат тенденција да трупаат и дополнителни услуги, кои вклучуваат превоз до и од локацијата на снимањето (90 евра), шминка и стилизирање на косата (300 евра) и личен асистент кој ќе помогне фустанот да се развее што поатрактивно ( 50 евра). Фустаните им се даваат на клиентите, а ако некој сака да се слика со повеќе од еден, тоа ќе чини дополнителни 120 евра. За еден клиент кој го резервира целосниот пакет, сесијата чини вкупно 1.500 евра.
Од Санторини до Дубаи, Аруба, Монтего Беј и Кападокија, овој вид на бизниси се шират за да ги задоволат желбите на туристите кои сакаат да се „расфрлаат“ со раскошни фотографии од својот одмор.
А не се само фото-студијата за развеани фустани чиј бизнис „расцвета“ по пандемијата. Платформата за резервации на фотографии со седиште во Канада, „Флајтографер“ (Flytographer), објави месечна продажба од милион долари во мај - првпат кога компанијата прекрши седум цифри во еден месец, во споредба со 400.000 долари во продажба во истиот период во 2019 година. „Флајтографер“ обезбедува пристап до локални фотографи во повеќе од 300 градови. Неговите топ-три најпопуларни локации оваа година се Париз, Мауи и Хонолулу.
„Луѓето направија пауза од патувања и многу работи ставија на чекање“, вели Никол Смит, главна извршна директорка на „Флајтографер“. „Ова е година кога многу луѓе конечно се решија да го направат своето патување од соништата и сакаат да се уверат дека ќе го доловат во целиот негов сјај“.
Резервирањето на фотографии преку „Флајтографер“ започнува од 385 долари на час, вели Смит, и добивате сет фотографии во рок од пет дена. Слична компанија од Индонезија, „Свит ескејп“ (Sweet Escape), има 8.000 фотографи распространети низ 500 градови, кои наплаќаат од 130 до 300 долари за фотографирање по час. Нејзиниот основач, Дејвид Сунг, вели дека бизнисот е речиси вратен на нивоата пред пандемијата, особено сега кога азиските патници, неговата најголема демографска група, почнуваат повторно да шетаат низ светот.
Додека „Флајтографер“ и „Свит ескејп“ продаваат слики што можат да бидат одлични празнични честитки - Смит вели дека 95 отсто од нејзините клиенти се мајки - компаниите кои се фокусираат на фотографирање во развеани фустани се насочени кон поелитна клиентела.
„Имавме луѓе кои патуваа само за да имаат сопствена фотографија [во развеан фустан]“, вели Крисан Хантер, родум од Монтего Беј, која го основала фото сервисот за развеани фустани „Хер дрес Јамајка“ (HerDress Jamaica) во август 2020 година. „Доаѓаат на три дена, а потоа си одат дома." Тоа често се случува при некои важни животни настани, вклучително и сесии на трудници, вели таа, а повеќето сесии се организираат во главните туристички области на Јамајка како Монтего Беј, Очо Риос и Негрил.
Како и Flying Dress Photo, HerDress Jamaica не беше во можност да ги открие бројките за продажба. Грчката компанија има вработени фотографи, додека операцијата на Хантер ги дели приходите со фотографот и сите други ангажирани лица, од кои сите наплаќаат за нивните услуги по пазарни цени.
И покрај високите цени, клиентите гледаат вредност во фотографиите, која не се сведува само на популарноста на нивните објави на социјалните мрежи.
Сандра Аптон, експерт за различност, правичност и инклузивност и основачка на „Аптон консалтинг груп“ (Upton Consulting Group), вели дека нејзината фотографија, направена во Грција во 2022 година, била начин да се одбележи важна животна одлука. „Тоа беше точно една година од кога ја донесов големата одлука да ја рестартирам мојата сопствена консултантска фирма“, нагласи таа.
Леа Фрејзиер, извршна директорка на агенцијата за креативен маркетинг и комуникации „Тинк три медија“ (Think Three Media) со седиште во Далас, на почетокот ги сметала сликите за несериозни - но потоа и самата направила сесија на Бали. Таа резервирала сесија на лулашка свртена кон густата и неверојатна џунгла, мислејќи дека може да ги инспирира другите да патуваат низ островот. „Тоа дефинитивно поттикнува разговор“, вели Фрејзиер. „Имаше толку многу луѓе кои ми рекоа: „Заинтересиран сум да одам на Бали, како го направи тоа?“
.webp){kind=icon}
