.webp){kind=icon}
Основачите на листата на 50 најдобри ресторани и барови во светот за првпат го крунисаа и најдобриот хотел во светот - а тоа е „Пасалаква“ (Passalacqua) на езерото Комо.
Малиот хотел со 24 соби беше отворен во јуни 2022 година, по долгогодишна реставрација на неговата зграда од 18 век - која им била домаќин на славни гости како Наполеон Бонапарта, Винстон Черчил и Винченцо Белини, коj престојувал во 1800-тите. Брзиот метеорски подем во популарноста на хотелот меѓу џетсетот дојде главно понесен од харизматичните сопственици Паоло, Антонела и Валентина де Сантис, кои со многу љубов вложија труд во хотелот (цените во „Пасалаква“ започнуваат од околу 1.800 долари по ноќевање за следната летна сезона).
„Ако можете да замислите, можете и да го направите! Еве сме!“, рече Валентина де Сантис, видно трогната додека ја добиваше главната награда. „Немаме 'голем грб' зад нас, а сепак стигнавме дотука“.
Соба во „Пасалаква“
Извор: Passalacqua
Веднаш зад „Пасалаква“ на листата следуваат низа култни азиски хотели. Во првите пет се „Роузвуд Хонгконг“ (Rosewood Hongkong); „Четири сезони Чао Праја ривер“, Бангкок (Four Seasons Chao Praya River); „Апер хаус“, Хонгконг (The Upper House) и „Аман“, Токио (Aman). Потоа следува „Ла Мамунија“ (La Mamounia) во Маракеш - што е успех за градот, кој сè уште се соочува со последиците од разорниот земјотрес на 8 септември.
И покрај тоа што меѓу 10-те најдобри доминира Азија, преостанатиот дел од списокот во голема мера е насочен кон Европа - што ги натера гледачите на лајвстримот да се запрашаат дали ова е всушност избор на 50-те најдобри хотели во Европа - при што 21 од 50-те места се резервирани за објекти токму од Стариот Континент. Освен два хотела во Њујорк, „Аман“ и „Еквинокс“ (Equinox), ниту еден друг хотел во САД не е присутен на листата. Исто така забележително е што независните хотели далеку ги надминаа брендираните субјекти; „Мериот“ и „Хилтон“ немаат ниту еден хотел на листата, но „Аман“ и „Четири сезони“ имаат по четири претставници. „Мејбурн“ (Maybourne Hotel Group) и „Еткер“ (Oetker Collection) имаат по три. Станува збор за два помалку познати бренда, кои уживаат популарност меѓу луксузните потрошувачи.
Објавувањето на листата, кое се одржа под помпезните средновековни сводови на лондонскиот Гилдхол, го означи првиот список од тимот „50 бест“ (50 Best) фокусиран на хотели, кој досега беше познат по своите глобални и регионални списоци на ресторани и барови - сите составени од британската компанија „Вилијам Рид“ (William Reed Business Media). Во својата 21 година, листата за 50 најдобри ресторани на светската мапа промовираше нови дестинации како Копенхаген и Лима - претворајќи ги од споредни кулинарски локации во топ приоритети на гастрономските патници.
Aman New York
Извор: Aman
„Постојат повеќе аспекти за она што ја прави оваа листа успешна“, објаснува Вилијам Дру, директор за содржини во „Вилијам Рид“, додавајќи дека списокот на хотели се подготвувал речиси една деценија. „Важно е дека носи бизнис за хотелите, а на помалку емпириско ниво, дека поттикнува откритија - културни откритија - поттикнувајќи патувања во нови делови од светот што можеби во друг случај луѓето не би ги направиле“.
Ова е особено точно кога станува збор за 50-те најдобри ресторани. Но, кога станува збор за годинешната листа на хотели, потенцијалот за откривање нови дестинации се чини остана нереализиран.
Покрај „Ла Мамунија“ (бр. 6), Маракеш има уште еден претставник, „Ројал Мансур“ (Royal Mansour) (бр. 23); што може да донесе благодат за градот ако признанијата ја поттикнат желбата на патниците да му дадат доверба на Црвениот Град, кој во голема мера беше поштеден од штетата од земјотресот и во голем дел се потпира токму на својата туристичка економија. Шри Ланка, слично, може да има корист; иако со 38-то место на листата „Амангала“ (Amangalla) не котира многу високо, но заслужено го насочува вниманието кон земјата во која туризмот има тешкотии да се вкорени, и покрај огромното гостопримство, кујна и културна привлечност.
Процесот со кој „Ворлдс 50 бест“ (World’s 50 Best) ја составува својата ранг-листа се заснова на искуство од прва рака на 580 скаути што улогите ги добиваат од раководителите на регионалните оддели познати како претседатели на академијата. Секој од овие скаути гласа за најдобрите седум хотели во кои престојувале во последните 24 месеци, по редослед на допаѓање (за наредните гласања временската рамка ќе се намали на 18 месеци). Скаутите можат да работат во индустријата како хотелиери, персонал, туристички агенти или новинари или да се сметаат за експерти едноставно затоа што имаат начин на живот исполнет со патувања.
The Capella Bangkok
Извор: Capella Bangkok
Покрај 50-те најдобри хотели, специјални награди добија уште и шест објекти. Меѓу нив, „Сонева Фуши“ (Soneva Fushi) на Малдивите беше прогласен за најдобар хотел на 20 метри од плажа, а „Капела Бангкок“ (Capella Bangkok) беше прогласен за најдобар нов хотел, признание за највисоко рангиран хотел отворен во текот на временската рамка за гласање од две години, од мај 2021 до мај 2023 година.
Меѓу специјалните признанија имаше и награда за одржливост, која отиде за „Сингита“ (Singita Lodges Kruger) во Јужна Африка - каде што зачувувањето и социјалното јакнење се врвни приоритети; хотелот добива готвачи од сопственото кулинарско училиште, кое обучува младинци од загрозените категории на локалното население, а за најдобар бутик хотел награда доби „Њут“ (The Newt) во Сомерсет поради највисокото рангирање како независен хотел со 50 или помалку соби.
Седмата специјална награда отиде во рацете на Сону Шивдасани, извршен директор на „Сонева“, и единствената личност што беше поединечно одликувана на церемонијата. (Наградата е за позитивна сила во глобалниот хотелски сектор.) Неговите три одморалишта, вклучувајќи ги „Сонева Фуши“ на бр.7 и „Сонева Јани“ на бр. 36, се храмови на одржлив луксуз; второто одморалиште, на Малдивите, има и надводни вили со свои тобогани и свои погони за рециклирање стакло, сите на мал приватен имот.
Апартман во „Ле Бристол Париз“
Извор: Oetker Collection
На прашањето дали тековните ефекти од пандемијата - како што е бавното отворање на границите во Азија - може да влијаат на рангирањето, Дру изрази верба во системот. „Уверен сум дека е доста изедначено и дека деловите од светот што побавно излегуваа од заклучување, малку фатија чекор“, рече тој. И навистина, Азија настапи спектакуларно.
Но, географската разновидност е предизвик. Дру вели дека силен акцент бил ставен на формирање жири со географска разновидност, за да се осигури дека листата има потенцијал да го одрази целиот свет, а не само главните градови што имаат најголем број меѓународни посетители. Сепак, тој призна дека тоа е амбициозна цел. „Никогаш нема да се изведе совршен, целосно правичен систем. Тоа не е можно да се направи. Ова е најдоброто што можевме да го постигнеме“.
На пример, само еден хотел во Јужна Америка е рангиран на листата: „Роузвуд Сао Паоло“ (Rosewood Sao Paulo). A од сите неверојатни високолуксузни сафари-хотели на африканскиот континент, беше препознаен само „Сингита“ (Singita Lodges Kruger). (Истото прашање на застапеност го погоди неодамнешното рангирање на хотели од „Ла лист“ (La Liste), каде што најдобро рангираниот „Белмонд Сипријани“ воопшто не беше рангиран во листата на 50-те најдобри во светот.) И покрај фактот што меѓународните патувања во Јапонија и Хонгконг продолжија дури во октомври 2022 година и јануари 2023 година, соодветно, тие дестинации се претставени со три места во првите десет, можеби укажувајќи на фактот дека дури и најпрошетаните професионалци за две години можат да опфатат мал број локации низ светот. Навистина, тие експерти за патувања ќе му дадат приоритет на она што е ново или спаѓа во групата за посети по пандемијата, она што е новитет, а достапно за нив - што веројатно објаснува зошто оваа листа повеќе се насочува кон најактуелните отколку кон најдобрите во целина.
Како да споредите шарено одморалиште на плажа во Сент Барт со урбана оаза чие лоби се наоѓа на 33-от кат на кулата Отемачи во Токио? Дру вели дека сложениот состав - или ако гледаме воопштено, мешавината од јаболка и портокали - е токму она што ја прави листата интересна. „Сакаме да има дискусија за тоа што е одличен хотел, бидејќи одговорот на сите е малку поинаков“, објаснува тој. „И сметаме дека тоа е позитивно. Токму тоа ја прави индустријата динамична и ја одржува во постојано движење, постојан развој“.
Во продолжение е целата листа на 50-те најдобри хотели во светот:
1. Passalacqua, Lake Como, Italy
2. Rosewood Hong Kong
3. Four Seasons Chao Praya River, Bangkok
4. The Upper House, Hong Kong
5. Aman Tokyo
6. La Mamounia, Marrakesh, Morocco
7. Soneva Fushi, Maldives
8. One & Only Mandarina, Puerto Vallarta, Mexico
9. Four Seasons Firenze, Italy
10. Mandarin Oriental Bangkok
11. Capella Bangkok (Nikka Best New Hotel Award)
12. The Calile, Brisbane
13. Chablé Yucatan, Chocolá, Mexico
14. Aman Venice
15. Singita Lodges Kruger National Park (Flor de Caña Eco Hotel Award)
16. Claridge’s, London
17. Raffles Singapore
18. Nihi Sumba, Indonesia
19. Hotel Esencia, Tulum, Mexico
20. Le Sirenuse, Positano, Italy
21. Borgo Egnazia, Savalletri, Italy
22. The Connaught, London
23. Royal Mansour, Marrakesh, Morocco
24. Four Seasons Madrid
25. Aman New York
26. Maybourne Riviera, Roquebrune-Cap-Martin, France
27. Rosewood Sao Paulo
28. Capella Singapore
29. Le Bristol, Paris
30. Park Hyatt Kyoto
31. La Reserve, Paris
32. Gleneagles, Auchterarder, Scotland
33. Hotel du Cap Eden Roc, Antibes, France
34. Cheval Blanc, Paris
35. Four Seasons Astir Palace, Athens
36. Soneva Jani, Maldives
37. The Newt, Bruton, UK (Best Boutique Hotel Award)
38. Amangalla, Sri Lanka
39. Hoshinoya Tokyo
40. Desa Potato Head, Bali
41. Eden Rock, St. Barth
42. The Siam, Bangkok
43. Badrutt’s Palace, St. Moritz, Switzerland
44. Atlantis The Royal, Dubai
45. Oberoi Amarvilas, Agra, India
46. Nomad London
47. The Savoy, London
48. Equinox New York
49. Six Senses Ibiza
50. Hôtel de Crillon, Paris
