На крајот од рачната масажа, кога масерката ќе ме истегне и ќе ми го притисне секој зглоб, обично ме обземаат емоции. Но не затоа што третманот е при крај. Едноставно има нешто во тој личен однос дека некој ви посветува толку многу внимание и внимава на секој детаљ, што предизвикува огромно чувство на благодарност. Има ли нешто попријатно за негувателот на мали деца од чувството дека грижи за нив?
На мојата последна масажа не го доживеав тој емотивен момент. Прво, терапевтот не ми ги ни масираше рацете, а второ, ме масираше робот.
Излегува дека масажата од робот повеќе е забавна отколку релаксирачка, барем на почетокот, а цената е малку поповолна во споредба со рачната масажа. Но ако ова ви звучи како научна фантастика, верувајте ми дека не е. Овој тип на масажа, изведен од робот по цена од 75 американски долари за 30 минути, може да се закаже во хотелот „Лоте Њујорк палас“ (Lotte New York Palace), првиот партнер за автоматизирани услуги за масажа на компанијата „Ејескејп“ (Aescape).
Замислата на „Ејескејп“ е на успешниот претприемач Ерик Литман, кој потроши околу седум години создавајќи го робот-масажерот. Тој изјави за „Блумберг“ дека до крајот на годината ќе достави 200 роботски масажери во хотели и спортски сали, вклучувајќи и најмалку 10 локации, со планови за понатамошно производство во 2025 година.
Неговиот бизнис-план е да земе дел од колачот на глобалната велнес-индустрија, која се проценува дека во ноември 2023 година вредела 5,6 трилиони долари, со автоматизирани услуги обезбедени од роботи. „Ние сме првиот комерцијален пример за роботска масажа што го знаеме, каде што роботите директно доаѓаат во контакт со човечките тела, на целосно автономен начин“, вели Литман. Тој го споредува искуството со возење во автоматизирано возило. „Првпат кога ќе влезете во такво возило, можеби ќе бидете малку нервозни гледајќи го воланот како се движи сам“, вели тој. „Но тогаш сфаќате дека тоа е исто како да ве вози искусен, безбеден возач. По вториот или третиот пат, едноставно заборавате дека сте во автоматизирано возило“.
Искуство со роботска масажа
Масерот на „Ејескејп“ изгледа малку како хируршки робот, со бели арматури што се обвиткуваат околу темносина маса за масажа. Над него, во сребрена метална рамка, има два цилиндра со мали рефлектори и сензори за скенирање на телото. Целото искуство на масажа изведена од робот во хотелот е речиси бесконтактно. Откако се пријавив на рецепција во спа-центарот на осми кат и го потпишав формуларот за прифаќање лична одговорност за ваков вид масажа, на таблет, рецепционерката ме одведе во просторијата.
Bloomberg Mercury
Ми беше кажано да изберам соодветна големина на облека за масажа од асортиманот на „Ејескејп“, специјално дизајнирана да го намали триењето помеѓу рацете на роботот и човечката кожа, да ги заштити интимните делови на телото и да им помогне на сензорите прецизно да го скенираат телото. Кога легнав на масата за масажа, под отворот за лице имаше таблет со кој ја почнав масажата. Нема вовлекување под покривка, нема чекање масерката да тропне на вратата, нема незгодни воведи.
Следните 30 минути ги гледав двете топчиња како се движат низ дигитализиран дијаграм на моето тело, паралелно со рацете на роботот, пулсирајќи со светлата за суптилно да го пренесат вообичаеното „вдишување“ и „издишување“. На левата страна на екранот збир на опции со различни функции што ги нуди програмата ми кажува што прави машината: почетни допири и загревање на мускулите, истегнување на одреден дел од телото, мускулна релаксација.
На десната страна на екранот лента го покажува нивото на притисок што нуди персонализирање: притиснете ја стрелката нагоре за да го зголемите притисокот или стрелката надолу за да го намалите. Роботот масер ги прифати моите наредби речиси веднаш и го смени притисокот и беше попријатно отколку кога ме масира масер.
Се разбира, постојат ограничувања за овој тип масажа. Масажата без притисок на палецот или способноста роботот масер да чувствува одредени точки на напнатост не можеше да се фокусира на јазлите што хронично ги имам во моите раменици. Тоа ги направи неговите најубедливи движења долги лизгачки движења, обично направени со лактот или задниот дел од раката, кои по форма се слични на заоблените додатоци на роботот. „Ејескејп“ е исто така ограничен на масажа на грбот. Рацете не се сметаат. Затоа ја пропуштив мојата омилена масажа на раце.
Генерално, движењето беше мазно и правилно насочено, удирајќи во моите мускули со малку или без вибрации. Тоа е многу подобро од раце или софистициран стол за масажа, дури и ако зуењето звучи како потсетување на стоматолошки апарати.
„Ејескејп“ вели дека за 30 минути масажа со робот го добивате истиот ефект како со 60-минутната масажа со човечки масер. Причината е: затоа што роботот може да ги користи двете раце симетрично со еднаков притисок наместо да работи само на едната страна. И навистина, се чувствував изненадувачки опуштено неколку часа по масажата. Мојата подготвеност да експериментирам со поголем притисок на одредени места можеби има врска со тоа. Веројатно не би се осмелила да ризикувам со масер.
(Не)соодветна замена за човечко суштество
„Ејескејп“ вели дека неговите сензори можат да соберат повеќе од милион податоци за вашата анатомија во секој момент за време на масажата, користејќи ги податоците за да се движат во ритам со вашиот здив и да се приспособат на секое треперење. Литман вели дека во иднина тие скенирања на телото, заедно со вашите барања, ќе бидат зачувани во личен профил, за да можете да продолжите каде што сте застанале на друга локација или да поминете низ „патување со содржини со повеќе масажи“ приспособени на вашата цел за фитнес и релаксација додека патувате низ светот. А што се однесува до мојот јазол во рамото, решението на проблемот е што следниот пат ќе можам да му наредам на роботот масажер да остане на одредено место подолго.
Тристина Дамико, лиценцирана терапевтка за масажа и директорка на бањата во „Арч аменитес груп“ (Arch Amenities Group), која управува со 80 спа-локации во САД, вклучувајќи ги и „Лоте Њујорк палас“, хотелот „Бруклин бриџ“ и „Вакарат хотел“ – вели дека „Ејескејп“ бил очигледен избор за бањата во „Лоте Њујорк палас“.
„Хотелот ’Лоте палас’ има повеќе од 900 соби“, вели таа за „Блумберг“. „Деловните луѓе ја поминуваат целата работна недела во хотелот, цело време. Тие имаат состаноци секој ден и имаат многу малку време за вистинско искуство со спа“.
Bloomberg Mercury
„Она што е убаво за ’Ејескејп’ е тоа што можете да направите масажа за половина час. И нема користење масло или крем, па не мора да се туширате или да ја миете косата. Можете само да ја облечете облеката по масажата и да одите назад на работа“, вели таа.
Според мое лично искуство, фротирската крпа за еднократна употреба на отворот на лицето, на масата за масажа, остава траги на мојата кожа на лицето, кои се гледаат со часови, но кога ѝ го кажав тоа, Дамико ми одговори дека дури и за тој проблем, бањата има решение, крпите да ги заменат со помеки платнени, кои не оставаат траги.
Се разбира, робот не може да го замени чувството како кога друго лице навистина ги зема предвид вашите потреби. Исто така, нема да ве праша кои ароматични масла за масажа ви се допаѓаат или да ви понуди ритуал за натопување на стапалата пред третманот. Но, тоа не е поентата.
Литман ја гледа оваа услуга како погодност: таа е поудобна од традиционалната рачна масажа. Тоа е начин да се одржи велнес-рутина и да се обезбедат редовни масажи, каде и да сте. И што е клучно, може да им помогне на хотелите да го надминат проблемот со понудата и побарувачката. „Ние обезбедуваме услуга за категорија што има многу реални проблеми со работната сила“, вели тој, цитирајќи го истражувањето на велнес-центарот спроведено летово.
„Сè помалку луѓе дипломираат на училишта за масажа, а сè повеќе луѓе сакаат велнес-услуги. Автоматизацијата едноставно ќе стане решение“. Тој додава дека „Ејескејп“ им дава можност на малите бутик-хотели и помалите објекти да го претворат недоволно искористениот простор во импровизиран спа-центар, без потреба од дополнителен персонал; и можат да закажат масажи во секое време. „Изнајмувањето на нашите маси за масажа чини само околу 250 долари на ден“, додава тој. „Тоа значи, во зависност од околината, доволни се само неколку масажи дневно за покривање на киријата и сè друго е чист профит“.
Роботот масер изгледа „зрел“ за хотели со слободен простор, како и за салони за масажа на аеродроми, кои со години ги удвојуваат велнес-погодностите, но ретко вклучуваат дури и стандардно столче за масажа. Оваа понуда особено ќе им одговара на оние што сакаат да останат во форма, но не можат да си дозволат голема сума пари за масажа или на оние што не се чувствуваат удобно да бидат рачно масирани од некоја личност.
Би била среќна повторно да ги користам услугите на робот масер доколку наидам на нив за време на моите патувања. Придобивките се јасни, а цената, која започнува од 60 долари за 30 минути на разни локации, е многу поприфатлива од услугите на човечки масер. Триесетминутна масажа на грб и рамена кај масер во хотелот „Палас“ чини двојно повеќе. Во други луксузни хотели лесно ќе потрошите 250 долари за еден час рачна масажа.
Едно нешто што го прави роботот малку повеќе сличен на човек е тоа што неговите раце се топли. Меѓутоа, кога рецепционерката ме праша, по третманот, дали можам да се опуштам и да заспијам, мојот одговор беше апсолутно НЕ. Командите на екранот, кои ги пробував, беа премногу возбудливи и забавни за целосно да се опуштам. „Можеби следниот пат“, ѝ одговорив.
.webp){kind=icon}
