Како „Енвидија“ го освои пазарот на чипови со ВИ и дали ќе потрае нејзината доминација?

Вртоглавиот пораст на акциите на „Енвидија“ (Nvidia) што ја направи компанијата највредна во светот извесно време е во застој. Инвеститорите станаа претпазливи за понатамошни инвестиции во производителот на чипови, сега кога е јасно дека развојот на вештачката интелигенција нема да се одвива без проблеми и дека нема да се потпира само на технологијата на „Енвидија“.

Засега, таа компанија продолжува да го води патот како снабдувач на основна опрема во златната треска со вештачка интелигенција. Приходите продолжуваат да растат брзо, додека нарачките за серијата чипови „Хупер“ (Hooper) и новиот наследник „Блеквел“ (Blackwell) се повеќе од бројни.

Нејзиниот континуиран успех зависи од тоа дали „Мајкрософт“, „Гугл“ и другите технолошки гиганти ќе најдат доволно комерцијални апликации за вештачка интелигенција за да остварат профит од нивните големи инвестиции во чиповите на „Енвидија“. Дури и ако успеат, не е јасно колку од најмоќните и најпрофитабилните чипови на компанијата ќе бидат потребни: во јануари, кинескиот стартап „Дипсик“ (DeepSeek) претстави модел на вештачка интелигенција за кој тврди дека работи подеднакво добро како оние направени од големите американски компании, но бара многу помалку ресурси за развој.

Откако „Дипсик“објави труд за можностите на новиот модел и како е развиен, пазарната вредност на „Енвидија“падна за 589 милијарди долари за еден ден, што е најголем пад во историјата на берзата. Закрепна во текот на следните недели, но на крајот на февруари сè уште беше под нивото на почетокот на годината.

Подолу анализа на факторите кои придонесоа за вртоглавиот успех на „Енвидија“и претстојните пречки со кои ќе се соочи компанијата.

Кои се најпопуларните чипови на „Енвидија“ за вештачка интелигенција?

Моменталниот најпродаван модел е „Хопер Х100“ (Hopper H100), именуван по пионерот на компјутерската наука Грејс Хопер. Тоа е подобрена верзија на графичката картичка која потекнува од персоналните компјутери и се користи од играчите на видео игри. Хопер е заменет на врвот на понудата со серијата „Блеквел“, именувана по математичарот Дејвид Блеквел.

И „Хопер“ и „Блеквел“ се засноваат на технологија која ги претвора кластерите на компјутери кои користат чипови „Енвидија“ во единествени единици кои можат да обработуваат огромни количества податоци и да вршат пресметки со голема брзина. Ова ги прави совршени за енергетски интензивните задачи за обука на невронски мрежи кои ја поткрепуваат најновата генерација производи со вештачка интелигенција.

Основана во 1993 година, „Енвидија“ е пионер во оваа област, со инвестиции кои датираат од пред повеќе од една деценија, кога визионерски оцени дека способноста за извршување на повеќе операции истовремено на крајот ќе ги направи нејзините чипови вредни надвор од светот на видео игрите.

Компанијата со седиште во Санта Клара, Калифорнија ќе го продава „Блеквел“ во различни варијанти, вклучително и како дел од суперчипот ГБ200, кој комбинира два „Блеквел“графички процесори со еден Грејс ЦПУ (Grace CPU), процесор за општа намена. (Грејс процесорот е исто така именуван по Грејс Хопер.)

Зошто чиповите за вештачка интелигенција на „Енвидија“ се посебни

Таканаречените генеративни платформи за вештачка интелигенција учат задачи како што се преведување текст, сумирање извештаи и генерирање на слики со тоа што ќе им се донесат огромни количества на постоечки материјал - со колку повеќе податоци се хранат, толку подобро работат. Ваквите платформи се развиваат преку обиди и грешки, правејќи милијарди обиди да се постигне знаење, додека трошат огромни количини на компјутерска моќ.

„Блеквел“ обезбедува 2,5 пати подобри перформанси од „Хопер“ при обука на вештачката интелигенција, според „Енвидија“. Новиот дизајн има толку многу транзистори (мали прекинувачи кои им даваат на полупроводниците способност да обработуваат информации) поради што не може да се произведе конвенционално како една единица. Всушност, тоа се два чипови поврзани еден со друг преку поврзување што гарантира дека тие функционираат беспрекорно како еден, велат од компанијата.

За клиентите кои се тркаат да ги обучат своите платформи за вештачка интелигенција за извршување на нови задачи, предноста во перформансите што ја нудат чиповите „Хопер“ и „Блеквел“ е клучна. Овие компоненти се сметаат за толку важни за развојот на вештачката интелигенција што американската влада ја ограничи нивната продажба во Кина.

Како „Енвидија“стана лидер во вештачката интелигенција

„Енвидија“веќе беше лидер во графичките чипови, компонентите што ги генерираат сликите што ги гледате на екранот на вашиот компјутер. Најмоќните од нив се изградени од илјада процесорски јадра кои извршуваат повеќе симултани нишки. Ова им овозможува да произведуваат сложени 3Д прикажувања како сенки и рефлексии кои се карактеристика на денешните видео игри.

Инженерите на „Енивидија“ на почетокот на 2000 година сфатија дека можат да ги користат овие графички акцелератори за други цели. Истражувачите од областа на вештачката интелигенција сфатија дека ГПУ чиповите развиени од „Енвидија“претставуваат клучно технолошко решение што им овозможило да ги преведат теоретските концепти на вештачката интелигенција во практични апликации.

Што прават конкурентите на „Енвидија“?

„Енвидија“ сега контролира околу 90 отсто од пазарот на графички процесори на центрите за податоци, според истражувачката компанија ИДЦ (IDC). Доминантните даватели на облак- услуги како што се АВС (AWS) на „Амазон“, „Гугл клауд“ на „Алфабет“ и „Азур“ на „Мајкрософт“ се обидуваат да развијат сопствени чипови, како и ривалите на „Енвидија“, „Адвансд мајкро дивејсес“ (Advanced Micro Devices) и „Интел“ Intel.

Овие напори досега направија малку за да ја намалат доминацијата на „Енвидија“.

АМД (AMD), која многу експерти ја гледаат како најсериозен кандидат за закана за доминацијата на „Енвидија“ објави во јануари дека приходите во првите шест месеци ќе останат исти како и во втората половина од претходната година. Ќе се подобрат во втората половина на 2025 година, кога компанијата ќе има нов чип на пазарот. АМД не сакаше да објави годишна проекција за приходите, што предизвика шпекулации дека компанијата се бори да го добие потребниот пазарен моментум.

Колку е „Енвидија“ пред своите конкуренти

„Енвидија“ ги ажурираше своите понуди, вклучително и софтверот за поддршка на хардверот, со темпо што ниту една друга компанија сè уште не можеше да го достигне. Компанијата исто така дизајнираше кластер системи кои им помагаат на своите клиенти да купат H100 чипови на големо и брзо да ги распоредат. Чиповите како „Ксоон“ (Xeon) на „Интел“ се погодни за извршување на сложена обработка на податоци, но тие имаат помалку јадра и се побавни во обработката на големи количини на информации што обично се користат за обука на софтвер за вештачка интелигенција. „Интел“, некогаш доминантен снабдувач на компоненти на центри за податоци, се бореше да понуди акцелератори кои клиентите се подготвени да ги изберат наместо опремата на „Енвидија“.

Како се одржува побарувачката за чипови со вештачка интелигенција?

Извршниот директор на „Енвидија“, Џенсен Хуанг и неговиот тим постојано изјавуваат дека компанијата има повеќе нарачки отколку што може да произведе, дури и за постари модели. На претстојното објавување на финансиските резултати, инвеститорите ќе очекуваат компанијата да ги потврди овие оптимистички најави за побарувачката.

„Мајкрософт“, „Амазон“, „Мета“ и „Гугл“ објавија дека планираат да потрошат стотици милијарди долари на вештачка интелигенција и центрите за податоци што ја поддржуваат. Неодамна имаше шпекулации дека проширувањето на центрите за податоци за вештачка интелигенција веќе покажува знаци на забавување. „Мајкрософт“ откажа некои закупи за капацитет на центрите за податоци во САД, според инвестициската банка „ТД Ковен“ (TD Cowen), предизвикувајќи поширока загриженост за тоа дали има повеќе капацитет за компјутерска вештачка интелигенција отколку што и треба на компанијата на долг рок.

Зошто кинескиот стартап „Дипсик“ предизвика толку голема загриженост?

Лансирањето на новиот модел со отворен код Р1 Еј-ај (R1 AI) на „Дипсик“ ги натера конкурентите панично да се распрашуваат за тоа како ги постигна резултатите на американските ривали користејќи само дел од нивните ресурси. „Дипсик“ го оптимизира својот модел на вештачка интелигенција користејќи реални податоци, пристап познат како заклучување, кој одзема помалку време и помалку интензивни податоци од методите за обука за вештачка интелигенција што ги користат другите компании. „Енвидија“, компанијата која веројатно има најмногу да загуби, го пофали моделот на „Дипсик“ како „голем напредок во вештачката интелигенција“ - што беше постигнат без да се прекршат контролите за извоз на технологија во САД.

Овие ограничувања забрануваат испорака на најсофистицираните „Енвидија ГПУ чипови“ во Кина, а реакцијата на компанијата очигледно ги смири скептичните аналитичари кои се сомневаа во можноста кинескиот стартап всушност да го постигне најавениот технолошки пробив.

Сепак, „Енвидија“ изјави дека нејзините чипови ќе играат значајна улога дури и ако има промена во начинот на кој се градат моделите со вештачка интелигенција. „Заклучувањето бара значителен број графички процесори на ‚Енвидија‘ и мрежа со високи перформанси“, велат од компанијата.

Како АМД и „Интел“ се споредуваат со „Енвидија“ во чиповите со вештачка интелигенција?

АМД, вториот најголем производител на компјутерски графички чипови, ја претстави верзијата од 2023 година на својата линија „Инстикт“ (Instinct) насочена кон пазар доминиран од производите на „Енвидија“. Новата, подобрена верзија, МИ 350 (MI350), ќе биде испорачана на клиентите во средината на годината. Извршниот директор на АМД, Лиза Су изјави дека ќе има 35 пати подобри перформанси од својот претходник. Компанијата предвидува дека приходите во првите шест месеци од 2025 година ќе бидат приближно исти како и во претходните шест месеци. Иако АМД сега генерира повеќе од 5 милијарди долари годишен приход од чипови за забрзување кои помагаат во развојот на модели со вештачка интелигенција, продажбата на „Енвидија“во таа категорија надминува 100 милијарди долари годишно.

Минатиот месец, менаџментот на „Интел“ им кажа на аналитичарите и инвеститорите дека компанијата „нема значајна улога на пазарот на центри за податоци за вештачка интелигенција базиран на облак“. Бидејќи чипот со кодно име „Фалкон Шорс“ (Falcon Shores) не доби поволни повратни информации од потенцијалните клиенти, компанијата нема да го лансира на пазарот според планираното и ќе го користи само за внатрешно тестирање. Коментарите дадени од привремениот извршен директор Мишел Џонстон Холтхаус сугерираат дека компанијата е подалеку зад „Енвидија“ отколку што се стравуваше, што е во спротивност со пооптимистичките тврдења што претходно ги изнесе соборениот извршен директор Пет Гелсинџер.

Сепак, ниту еден од ривалите на „Енвидија“ не сметаше на пробивот што компанијата тврди дека „Блеквел“ќе го донесе. Предноста на „Енвидија“не е само во перформансите на нејзиниот хардвер. Компанијата измисли јазик за своите графички чипови - CUDA, кој им овозможува да се програмираат за видовите на пресметковни операции кои се основата на апликациите за вештачка интелигенција.

Широката употреба на оваа софтверска алатка придонесе за континуирана зависност на индустријата од хардверот „Енвидија“.

Во моментов нема коментари за веста. Биди прв да коментира...

Остави коментар