.webp){kind=icon}
Германскиот автомобилски клуб АДАК (ADAC) лани тестираше 95 автомобили и внимателно ги разгледа нивните емисии на јаглерод диоксид (CO2) и на загадувачки материи. Резултатите покажаа дека електричните автомобили доминираат, но дизелите исто така високо котираат кога станува збор за возила што придонесуваат за намалување на загадувањето.
ЕУ има големи цели - официјално е најавен крајот на моторите со согорување и од 2035 година во Европа ќе може да се продаваат само нови автомобили без емисија на CO2. Еколошкото рангирање на автомобилите тестирани од АДАК во 2022 година докажува дека веќе практично нема начин да се заобиколат електричните автомобили за ефикасно да се избегнат емисии на CO2 и на други загадувачи.
„За АДАК, сепак, е-автомобилите не се автомобили со нулта емисија: на крајот на краиштата, при производството на електрична енергија, исто така има емисии на CO2 и други загадувачи што се вклучени во пресметката“, укажуваат од автомобилскиот клуб.
Екотест на АДАК: 95 кандидати на тест-клупата
Сепак, еколошко возење е можно и со некои дизел и бензински мотори. Тоа го покажува листата на најдобрите на АДАК-екотест од 95-те кандидати, во кои се опфатени повеќето типови на погони достапни на пазарот. Покрај конвенционалните дизели и бензински мотори, имаше 26 автомобили со чисто електрични погони, две возила со ТНГ (автогас), четири целосни хибриди и единаесет плагин-хибриди.
Мерењата во АДАК-екостестот се фокусираат на две различни компоненти. Од една страна, се мери емисија на загадувачите како јаглерод моноксид CO, честички или азотни оксиди (NOx). Во превисока концентрација, тие се штетни за здравјето. Зголемените отчитувања на азотен оксид беа причина за некои забрани за возење дизел во некои германски градови.
Од друга страна, се проверува емисијата на стакленички гасови CO2. Јаглерод диоксидот дејствува како стакленички гас во атмосферата и е главен придонесувач за климатските промени.
Колку помалку од двата типа емисии ослободува, толку повеќе поени може да собере возилото: максимум 50 поени во категоријата загадувачи, 60 за CO2. Покрај тоа, вредностите се претвораат во јасен рејтинг со ѕвезди: една ѕвезда значи лошо, пет ѕвезди значи одлично.
Но зошто автомобилите со батерии без емисија на штетни гасови воопшто имаат вредност за CO2 и за емисиите на загадувачки материи? Перформансите во АДАК-екотестот не се одредуваат само со директни мерења на издувните гасови. Всушност, она што исто така е важно е колку енергија е потребна за да се произведе горивото – дали за струја, бензин или гас.
„Тесла модел 3“ на врвот на листата на најеколошки автомобили
„Тесла модел 3“ (tesla model 3) во основната верзија се најде на врвот на листата на најеколошки автомобили за 2022 година. На листата 2021, „тесла“ стигна само на средина со „модел ипсилон“ (model Y), а сега отиде на врвот со „модел 3“ (model 3).
„Фактот дека седанот со средна големина ’модел 3’ се покажа толку добро во тестот за 2022 година се должи на неговото високо ниво на ефикасност. Малата потрошувачка од 16,8 киловат-часа (kWh) на 100 километри резултира со емисии од 84 грама CO2 на километар според методологијата на АДАК-екотестот, што е најниска вредност од сите наведени модели. Економичноста е една од причините зошто ’модел 3’ се продава толку добро, бидејќи од тоа зависи и можниот опсег на автомобилот“, посочуваат од АДАК.
Depositphotos
За споредба, „БМВ И4“ (BMW i4 eDrive40) има подолг опсег поради својата поголема батерија, но троши во просек 19,5 киловат-часа на сто километри (со загуби при полнење). Меѓутоа, за е-автомобил со високи перформанси, дури и оваа вредност е сепак доста добра. Тоа го прави „баварецот“ единствениот модел од германски производител што се најде во топ 10.
Второто место во таблата на АДАК го делат електричниот „киа ниро“ (Kia Niro EV), како претставник на компактната класа, и „дачија спринг“ (dacia spring) како мал автомобил. Двете возила добија цели пет ѕвезди на ADAK-екотестот, бидејќи нивната потрошувачка беше само еден киловат-час (kWh) поголема од онаа на значително поголемиот „тесла модел 3“.
Кој се најде на дното?
Гледајќи на другиот крај на листата, тука е „субару форестер“. „Субару“ користи комбинација од погон на сите тркала, со благ хибриден боксер мотор, така што вградениот електричен мотор треба да го поддржува погонот и да заштеди гориво.
„Но токму тоа не функционираше: 9,1 литри ’супер’ на 100 километри е премногу - соодветната вредност од 243 грама CO2 на сто километри е втора највисока на листата. Тоа е доволно само за два од можни 60 поени во рејтингот на CO2. Бидејќи емисиите на јаглерод моноксид, исто така, нагло се зголемуваат на автопатот, ’форестер’ е на последно место“, укажуваат од АДАК.
Depositphotos
„Џенезис Г70“ (Genesis G70 2.0T) има највисоки емисии на CO2. Автомобилот на „Хјундаи“ се однесува спортски на патот, но дволитарскиот турбобензинец исто така голта 9,4 литри гориво на сто километри, што значи емисии од 246 грама CO2 на километар. Доволно е за претпоследното место, бидејќи ги чисти издувните гасови малку подобро од „субару“.
Најеколошко возило со мотор со чисто согорување е „тојота ајго“ (toyota aygo X 1.0), со многу солидни 82 поена. Пет места пред тоа, на 20-то место, е „хонда сивик“ (honda civic), првиот целосно хибриден бензински мотор со врвна вредност во однос на избегнувањето загадувачи.
Екотестот потврдува дека сегашните дизели што го исполнуваат задолжителниот стандард за емисии „еуро 6д“ (еuro 6d), со исклучок на „мазда ЦХ-5“ (mazda CX-5), постигнуваат многу добри вредности за емисиите на загадувачи и во просек сè уште се подобри во оваа категорија отколку електричната конкуренција.
Додека два автомобила со погон на природен гас сè уште ги заземаа првите две места на листата за 2021 година, годинава немаше претставници. Причината е што нема повеќе нови производи, „Шкода“ ги исфрли своите ТНГ-модели, а „Фолксваген“ исто така објави дека повеќе нема да развива автомобили со природен гас.
Тековната студија ЛЦА, во која се споредуваат климатските влијанија на различните типови на погон, исто така покажува дека гасот (особено од биометан) е најчист од сите конвенционални горива. Друга алтернатива би бил водородот, но претставниците со овој погон, како „тојота мираи“ (toyota mirai) или „хјундаи нексо“ (hyundai nexo), сè уште се апсолутна реткост и затоа не се во програмата за тестирање за 2022 година.
