.webp){kind=icon}
По 12 години развој, во масовно производство се впушта нова категорија на технологија за батерии за зголемување на опсегот за електричните возила. Од „Сила“ (Sila Inc), компанија за материјали за батерии со седиште во Силициумската Долина, чии финансирања надминуваат 930 милиони долари, велат дека го финализирале процесот на масовно производство за првите аноди базирани на силициум.
„Компанијата својот нов материјал го нарекува титан силициум“, рече главниот извршен директор Џен Бердичевски. Се очекува новата фабрика да започне со производството кон крајот на следната година. Од „Сила“ велат дека анодите на титан веднаш ќе го зголемат максималниот опсег на возилата за 20 проценти.
Нивен прв клиент е „Мерцедес“ (Mercedes), кој почнувајќи од 2025 година ќе ги користи титан-анодите во својот „EQG SUV“ со долг досег, електричната верзија на Г-класата на производителот. Бердичевски вели дека „Сила“ ќе може да направи доволно материјал за да може до 2026 година да ги задоволи потребите за 200.000 електрични возила годишно, а се планира до 2028 година капацитетот да се зголеми на материјал за еден милион возила годишно.
Bloomberg
„Ние сега сме подготвени да преземеме повеќе производители на автомобили. Постојат три работи што им се важни на клиентите, а тоа се опсег, опсег и опсег. Ние сме тука и подготвени сме за тоа“, рече Бердичевски.
„Сила“ не е единствената компанија во трката да се пофали со силициумските аноди. „Тесла“ (Tesla Inc), чии возила со долг досег сочинуваат половина од продажбата на електрични возила во САД, јавно зборуваат за развојот на сопствените силициумски аноди барем од 2020 година.
Во Сиетл „Груп 14 технолоџис“ (Group14 Technologies) обезбеди 650 милиони долари и договор за снабдување на „Порше“ (Porsche), додека „Уан Д батери“ (OneD Battery Sciences), со седиште во Калифорнија, работи со „Џенерал моторс“ (General Motors). Не е јасно кој ќе биде прв што ќе ја зголеми и унапреди оваа технологија.
Нова хемија
Откако литиумјонските батерии беа измислени во 1980-тите, анодите се изработуваат од графит, кој речиси целосно се вади и преработува во Кина. Анодата на батеријата служи како резервоар за литиумските јони. Кога батеријата е полна, јоните го исполнуваат просторот меѓу слоевите графит. Кога батеријата е испразнета, јоните се движат кон другата страна на батеријата, наречена катода. Најновото достигнување во хемијата на батериите е постигнато на катодната страна.
Во првите неколку години од производство титан ќе се продава по поскапа цена, со цел да се користи во врвните возила со долг досег. Штом анодите базирани на силициум ќе се произведуваат со полн капацитет, Бердичевски вели дека ќе чинат значително помалку од графитот и се очекува тие брзо да станат норма во индустријата.
Седумдесет илјади варијации
„Сила“, која е основана во 2011 година, испробала повеќе од 70.000 варијанти на својата формула пред да го добие производот титан, за кој Бердичевски вели дека може да се користи за 100 проценти силициумски аноди.
Bloomberg
Клиентите на производителите на автомобили може да одберат количество силициум што ќе го користат во своите батерии во зависност од нивните цели за опсег и во зависност од цената. Бердичевски не ги прецизира концентрациите на силициум што ги користи „Мерцедес“ во тест-возилата за својот „EQG“, но, според најавите, теренецот ќе има густина на енергија што би обезбедила речиси двојно поголем опсег на возење отколку што биле батериите со иста големина во 2020 година.
Индустријата се движи брзо. На „Сила“ и „Груп 14“ од американското министерство за енергетика во октомври им беа доделени по 100 милиони долари за да се забрза изградбата на нивните фабрики. „Тесла“ во 2020 година соопшти дека работи на силициумски аноди за својот нов формат на батерии, а регулаторните поднесоци за таа година покажуваат дека ја купи „Силлајон“ (SiILion Inc), снабдувач на батерии со седиште во Колорадо, кој работи на силициумски аноди со висока концентрација. Засега е нејасно до каде е напредокот на „Тесла“.
Инаку, се очекува да има доволно побарувачка за различни пристапи. Откако ќе се постигне паритет со трошоците за графитот, Бердичевски вели дека усвојувањето на силициумските аноди ќе биде ограничено само со тоа колку брзо ќе може да се произведат. Тој очекува дека до 2030 година една третина од електричните возила во светот ќе имаат аноди базирани на силициум. До 2035 година, како што вели тој, сите ќе го направат тоа.
