Македонија се истакнува како лидер во 5Г-телекомуникациите во Централна и Југоисточна Европа, покажуваат податоците објавени деновиве од „Окла“ (Ookla), една од најпознатите светски платформи за мерење на брзината на телекомуникациите. Според податоците за вториот квартал, просечната брзина на 5Г-мрежите во Македонија изнесува 317,91 Mbps. Само во Бугарија измерената брзина била поголема од 200 Mbps, додека на трето место е Хрватска, со 192,13 Mbps.
Босна и Херцеговина, Србија, Косово и Албанија не се меѓу земјите за кои „Окла“ дава податоци, но објавеното соопштение сепак дава доста добра слика за состојбата на 5Г-технологијата во Источна Европа. На дното, според измерените брзини, се Полска и Унгарија.
„Во Централна и Источна Европа напредокот и пречките за развојот на 5Г-технологијата стануваат сè поочигледни“, коментира „Окла“. Полска, најголемиот пазар и земја што заостануваше зад другите со воведувањето на 5Г-мрежите, неодамна одлучи да го распредели т.н. Ц-појас на радиофреквенцискиот спектар, а тоа се оценува како „позитивен чекор напред“. И други земји ги приспособуваат своите мрежи и ги прераспределуваат фреквенциите, а дел од тој процес е исклучување на 3Г-мрежите. Тоа ги ослободува радиофреквенциите за нови технологии.
Така, словенечкиот оператор „А1“ ја исклучи својата 3Г-мрежа на крајот на јуни, додека „Телеком Словенија“ ја исклучи минатата есен. Словачки телеком и оваа година има намера да ја исклучи 3Г-мрежата, а претходно и операторот „ Оранж“ (Orange) најави исклучување на оваа услуга во Словачка и Полска. „Т-мобиле“ исто така ќе го исклучи 3Г во Полска до крајот на оваа година, според „Окла“.
Измерените брзини од поединечни оператори ја потврдуваат македонската доминација. Македонија е единствената земја во Централна и Источна Европа со два телекома во првите пет по измерени брзини. Покрај нив, во водечката десетка по два претставника имаат и Бугарија и Хрватска. Индивидуалните податоци покажуваат дека може да има значителни разлики под истиот бренд.
На пример, „А1“ е водечки телеком во однос на брзината на 5Г во Бугарија и блиску до врвот во Македонија, додека во Хрватска „А1“ е тој што го расипува просекот со најлоши резултати. Ова е уште повидливо во рамките на групацијата „Дојче телеком“. „Македонски телеком“ е на самиот врв по брзината, иако неговиот мнозински сопственик „Маѓар телеком“ е меѓу најлошите. Овие две компании, како и „Хрватски телеком“, се дел од групацијата „Дојче телеком“. Исто така, двете компании под капата на поранешниот „Франс телеком“ во Романија и Полска, денес под брендот „Оранж“, се на спротивниот крај на табелата за брзина.
„Окла“ објави и податоци за брзината на 5Г-мрежите во главните градови на земјите од Централна и Источна Европа. Очекувано, Скопје е на самиот врв, каде што просечната брзина на преземање е близу 500 Mbps, а македонскиот главен град не е доминантен само во однос на брзината на 5Г-мрежата. На глобалната листа со резултати за јули годинава, Скопје е на 25-то место, веднаш зад бугарска Софија, но и на повисока позиција од некои западноевропски метрополи како Париз, Амстердам, Лисабон, Берлин или Рим.
По Софија, која е на второ место по брзината на 5Г во регионот, доаѓа Загреб, со просечна брзина на преземање од речиси 250 Mbps. Следуваат Љубљана, Братислава, Букурешт, Будимпешта, Прага и на крајот Варшава.
Со ширењето на 5Г-технологиите, просечната брзина на комуникација веројатно ќе се намали. Една од причините за тоа е поголемиот метеж со зголемувањето на бројот на корисници на оваа технологија. Друга причина е обврската на операторот да покрива сè поголеми делови од територијата за кои пониските фреквентни опсези се поповолни, а тоа резултира со помали брзини.
.webp){kind=icon}
Во моментов нема коментари за веста. Биди прв да коментира...