Римац го претстави концептот за автономен автомобил

Мате Римац, производителот на електрични хиперавтомобили и компоненти, поддржан од „Порше“ и сопственик на „Бугати“, заврши уште еден проект: автономно такси со две седишта, кое сака да го постави на јавните патишта во 2026 година. При грандиозната презентација, која ја придружуваа политичари, инвеститори и новинари, имаше еден мал проблем - роботаксито не работеше, односно не сакаше да излезе на сцената откако Римац го покани преку апликација.

„Имаме долг пат зад нас, направивме грешки, пробивме некои рокови, но и постигнавме работи за кои можевме само да сонуваме. Денеска го претставуваме нашиот најамбициозен проект. Сакаме да понудиме најдобро и најбезбедно возење, кое ќе донесе придобивки не само за луѓето што се возат туку и за градовите, односно за општеството, за да го постигнеме тоа, развивме комплетен екосистем составен од три дела. Првиот е самото возило, вториот е апликацијата, а третиот е инфраструктурата“, рече Римац.

Возилото нема педали и волан/Извор: Римац

Компактното концептно возило што „Римац груп“ го претстави денеска во Загреб нема педали и нема волан, а има лизгачки врати дизајнирани да не го попречуваат сообраќајот при качување и симнување на патници на градските улици. Римац ја нарече својата услуга за урбана мобилност „верн“, именувана по најпродаваниот авантуристички романописец Жил Верн. Станува збор за електричен двосед со батерија од 60 kW, која треба да му обезбеди околу 14 часа градско возење. Ќе се потпира на софтвер сличен на постојните апликации за такси и специјална инфраструктура наречена „Мадершип“ (Mothership), која ќе биде достапна во секој град. Станува збор за станици каде што „верн“ ќе се полни, чисти и генерално ќе се одржува.

Мате Римац/Извор: Римац автомобили

„Првиот ‚Мадершип‘ ќе се гради во Загреб, блиску до оваа постојна фабрика“, рече Римац, додавајќи дека наскоро треба да започне процесот на изградба на производствени капацитети за роботаксијата. „Локацијата на фабриката ќе биде во јужниот дел на Загреб. Возилата ќе се склопуваат, калибрираат и тестираат таму“, рече тој.

Компанијата во последните неколку години соработуваше со „Мобилај глобал“ (Mobileye Global Inc.) и ќе ја користи платформата за автономно возење на овој провајдер на софтвер и сет од камери, радари и лидарски систем. По Загреб во 2026 година, проектот треба да се прошири и во други градови. Како што истакнуваат од компанијата, тие прво треба да се прошират во Велика Британија и Германија, а потоа и во земјите од Блискиот Исток. Тие нагласуваат дека веќе имаат потпишано договори со 11 града и преговараат со уште 30 низ светот, а целта им е да стигнат до над сто града.

Соосновачот и главен директор за дизајн на „верн“, Адријано Мудри, рече дека морале да ја уредат надворешноста за да одговара на голем број сензори, а отсуството на контролори и возач им дало слобода при внатрешниот дизајн.

„Зошто двосед? Бидејќи податоците покажуваат дека во девет од десет патувања, возилото го користат само едно или две лица. Затоа, можеме да ги задоволиме повеќето патувања со двосед и да создадеме уникатен внатрешен простор во возило со компактна големина. Внатрешноста на ’верн’ има повеќе простор отколку во ‚ролс-ројс’“, се пофали Мудри, истакнувајќи дека секое возило ќе има 43-инчен екран и 17 звучници.

Адријано Мудри/Извор: Римац автомобили

Посебно внимание им е посветено на корисничкото искуство и персонализацијата на возилото, кое ќе може да се чува подолго време, а ќе понудат и посебен модел за претплата.

На отворањето пред присутните се обрати и премиерот Андреј Пленковиќ, кој во своето отворање истакна дека Римац се борел против скептицизмот и предрасудите, како и секој иноватор што бил пред своето време.

„Довербата му ја дадовме на овој проект, кој е особено важен за една млада земја што ја бара својата нишка во глобалната конкуренција. Проектот го поддржавме значително финансиски, со 180 милиони евра, бидејќи сметаме дека е дел од решението за таа иднина“, рече Пленковиќ, повлекувајќи паралели меѓу Римац и големите иноватори од хрватската историја како Вучетиќ и Тесла.

Повеќе простор за патниците отколку во „ролс-ројс“/Извор: Римац

Меѓу инвеститорите во „Римац груп“ се „Порше“, „Софтбенк вижн фонд 2“ (SoftBank Vision Fund 2) и „Голдман Сакс“ (Goldman Sachs Asset Management). Нејзиниот 36-годишен основач ја презеде мнозинската контрола над „Бугати“ во 2021 година, а минатата недела го претстави новиот модел „турбилон“ (tourbillon), вреден 3,8 милиони (4,1 милиони долари), кој ќе го наследи 16-цилиндричниот „широн“ (chiron). Во спарување на В-16 мотор со три електрични мотори, „турбилон“ ќе забрзува од нула до 100 километри на час за две секунди.

Римац ја темпираше промоцијата пред „Тесла“ да го покаже роботаксито во август. Мате Римац честопати правеше споредби со извршниот директор на „Тесла“, Илон Маск, а двајцата повеќепати меѓусебно ги мереа перформансите на нивните автомобили во последните неколку години на социјалните мрежи. Двајцата седнаа еден до друг на вечера во Менхетн во март 2022 година.

„Ова беше забавно... и напнато“, напиша Римац потоа на Фејсбук.