Револуција: „Опен еј-ај“ создава агент за вештачка интелигенција

„Опен еј-ај“ (OpenAI) се подготвува да лансира нов „агент“ со вештачка интелигенција (AI) наречен Оператор, кој може да користи компјутер за да извршува задачи во име на корисникот, меѓу кои пишување компјутерски код на пример, но и такви како што е резервирање некое патување, објави неодамна „Блумберг“.

И оваа компанија е дел од пошироките напори на другите што се занимаваат со развој на вештачка интелигенција, да се создадат агенти или софтвер за вештачка интелигенција, кој ќе може да врши повеќестепени задачи за корисниците, но со минимален надзор. „Антропик“ (Anthropic) претстави сличен агент, кој може да ги обработува активностите на компјутерот на корисникот во реално време и да работи во негово име. „Мајкрософт“, кој го поддржува „Опен еј-ај“, исто така неодамна лансира сет агенти наменети да испраќаат имејл и да управуваат со архивски датотеки, наведува „Блумберг“.

„Опен еј-ај“, според повеќе извори, работел на неколку истражувачки проекти поврзани со агенти. Оној што е најблиску до лансирање всушност завршува задачи во прелистувач, најверојатно преку платформата на „Опен еј-ај“ и е речиси подготвен за тестирање. Веројатно за тоа зборуваше и самиот Сем Алтман, кој за крајот на месецов најави некои новини од неговата компанија.

Програмер најде знаци дека Оператор е речиси подготвен

Кајл Вигерс ги пренесува тврдењата на Тибор Блахо, програмер познат по откривањето  нови информации за развојот на различни платформи. Овој пат тој тврди дека нашол знаци во заднината на веб-страницата што укажуваат дека Оператор е речиси подготвен.

ЧетГПТ за „Опен еј-ај“ за мекОС (macOS) доби опции што моментално се скриени за дефинирање кратенки за активирање или деактивирање (Toggle Operator) и присилно запирање на операторот (Force Quit Operator), рече Блахо, додека „Опен еј-ај“ додаде на својата веб-страница референци за Оператор што сè уште не се јавно видливи.

Скриена табела

Според Блахо, веб-страницата на „Опен еј-ај“ содржи и табели што не се јавни и кои ја оценуваат ефективноста на Оператор во споредба со другите системи за вештачка интелигенција дизајнирани да контролираат компјутери. Ако податоците се веродостојни, тоа покажува дека Оператор не е целосно доверлив, бидејќи неговиот успех значително варира во зависност од задачата.

На тестот „ОС ворлд“ (OSWorld), кој симулира реална компјутерска средина, ЦУА (OpenAI Computer Use Agent CUA) - најверојатно моделот на вештачка интелигенција што стои зад Оператор - постигна 38,1 проценти. Тоа е повеќе од моделот за компјутерско управување на „Антропик“, но значително помалку од 72,4 проценти, колку што постигнуваат луѓето. Сепак, „опен еј-ај ЦУА“ ги надминува луѓето на тестот „Веб војажер“ (WebVoyager), кој ги оценува навигациските способности на вештачката интелигенција. Меѓутоа, на друг веб-тест, „Веб арена“ (WebArena), заостанува зад човечките резултати, пренесува „Техкранч“ (TechCrunch).

Ако податоците се точни, Оператор исто така не успева да ги извршува задачите што луѓето обично ги извршуваат без проблеми. Во тест каде што беше неопходно да се создаде сметка со давател на услуги во облак и да се стартува виртуелна машина, тој беше успешен само во 60 проценти од случаите. Се покажа уште полошо кога креираше биткоин-паричник, каде што неговата успешност беше само десет отсто.

Во моментов нема коментари за веста. Биди прв да коментира...

Остави коментар