Светот е изложен на ризик од криза бидејќи владите, домаќинствата и финансиските институции се пренатрупани со долгови, навика за која S&P Global Ratings предупредува дека може да ја зголеми вкупната задолженост до 366 проценти од глобалниот бруто домашен производ до 2030 година.
„Тоа би значело нагло зголемување од 300 илјади милијарди долари или 349 проценти од глобалниот БДП колку што изнесуваше светскиот долг заклучно со јуни 2022 година. Задолженоста се зголемува малку побрзо кај развиените економии отколку растечките“, напишаа во извештајот Тери Чан и Александра Димитријевиќ од S&P.
„Побарувачката за заеми, а со цел да им се помогне на потрошувачите со инфлацијата, да се ублажат климатските промени и да се обнови инфраструктурата ќе продолжи“, напишаа тие, додавајќи дека за да се ублажи ризикот од финансиска криза, можеби ќе бидат потребни компромиси помеѓу трошењето и штедењето.
Зголемените каматни стапки во текот на изминатата година поради борбата на Федералните резерви и Европската централна банка со инфлацијата ги направија должничките оптоварувања потешки. Претпоставувајќи дека околу 35 проценти од светскиот долг има променлива каматна стапка чувствителна на монетарната политика, минатогодишниот циклус на зголемување на каматите додаде уште 3 илјади милијарди долари во трошоци за сервисирање на долгот, според S&P.
„Не постои лесен начин да се задржи глобалниот долг надолу“, напишаа Чан и Димитријевиќ.
.webp){kind=icon}
