Повеќето европски банки завршија со подобар резултат од претходно на стрес-тестот за тоа како би издржале посилен економски пад, што отвора можност за помирни исплати на дивиденди и откуп на акции.
Тестот опфати 70 банки во еврозоната и покажа дека во замислено сценарио на влошување на економската состојба, стапката на основниот капитал паднала за 4,59 процентни поени на 10,4 отсто, објави Европската банкарска управа (ЕБА). Ова е помал пад од она што беше покажано на сличен тест пред две години, кога беше пресметано дека ќе изнесува 4,85 процентни поени.
Најновиот тест се смета за најтежок досега, но банките очигледно имаат корист од силните биланси и скокот на приходите од зголемените каматни стапки. Банките веројатно ќе ги искористат овие резултати за да побараат од регулаторот да го задржи истото ниво или дури и да го зголеми нивото на исплати на дивиденди.
Повеќето банки покажаа подобар резултат во споредба со сличен стрес-тест од пред две години
Bloomberg
И покрај вкупните загуби од 496 милијарди евра што ги покажа тестот, европските банки „остануваат добро капитализирани за да продолжат да ја поддржуваат економијата дури и во време на сериозно (економско) нарушување“, соопшти ЕБА.
Во овој тест, повеќето од главните европски банки покажаа помала ерозија на стапката на основниот капитал отколку што беше случај во претходните такви сценарија. Така, кај „Дојче банк“ тој пад би бил 5,28 процентни поени во однос на 6,2 процентни поени претходно, или кај „Парибас“ (BNP Paribas) 3,92 процентни поени во однос на претходните 4,4 процентни поени.
ЕБА забележа дека две банки во стрес-тестот покажале „мал недостиг“ во капитални барања, а една со „поголем недостиг“ би ги исполнила потребните услови доколку се земат предвид новите сметководствени стандарди кои важат од оваа година.
Стрес-тестот ја зеде предвид состојбата на инфлација, глобална рецесија и зголемени каматни стапки, што би предизвикало пад на економијата за шест отсто во период од три години.
Инаку, ваквиот стрес-тест нема значење на преодна оценка за банките, туку се користи од Европската централна банка за утврдување на поединечните капитални барања и за ревидирање на плановите на банките за одржување на доволно ниво на резерви, што го вклучува учинокот на исплати на дивиденди.
„Неизвесноста во економијата покажува дека е важно да се остане внимателен и дека супервизорите и банките мора да бидат подготвени за евентуално влошување на економските услови“, наведува ЕБА.
.webp){kind=icon}
