ББА-анализа: Денешниот состанок на ЕЦБ нема да донесе изненадувања

На овонеделната седница не очекуваме изненадувања, туку очекуваме ЕЦБ да ја остави каматната стапка на сегашните нивоа. Инфлациските очекувања се закотвени и не се очекуваат поголеми изненадувања во наредните месеци. Иако има повеќе геополитички спорови, како оние во Црвено Море, кои можат да влијаат на враќањето на растот на инфлацијата, верувам дека влијанието врз инфлацијата во еврозоната е ограничено, имајќи предвид дека, освен поскапувањето на контејнерскиот транспорт, немаше зголемување на инфлаторните очекувања. Ова е поткрепено со падот на цените на производителите во изминатите пет месеци, чиишто пониски цени се прелеваат во крајните цени.

Што се однесува на состојбата на економијата на еврозоната, таа и понатаму страда според показателите за производство и услуги, но со силни показатели на пазарот на трудот, кој моментално дава отпор. Падот на побарувачката за кредити, заострувањето на условите за кредитирање и зголемувањето на каматните стапки од почетокот на 2022 година ги забавија економиите, но не ги турнаа во посериозна рецесија. Растот на каматните стапки забави, па каматните стапки на нефинансиските друштва не се зголемија во ноември 2023 година (последни податоци) на месечно ниво, додека во просек за кредитите на домаќинствата се зголемија само за 10 базични поени.

Што се однесува на понатамошните очекувања, првите кратења ги гледаме кон средината на годинава. Внимателниот став на централните банкари, како и одлуките „водени од податоци (data driven)“ ќе доведат до постепен надолен тренд до крајот на 2024 година, каде што очекуваме стапката на рефинансирање да достигне ниво од 3,75 отсто, а стапката на депозити до 3,25 отсто, што и во двата случаја е за 0,75 процентни поени под сегашното ниво. Тоа би значело дека шестмесечниот Еурибор до крајот на годината ќе падне на 3,3 отсто. Пазарите на капитал се поамбициозни, така што краткорочните каматни стапки на еврото имплицираат дека ЕЦБ би можела да ја намали стапката на депозити до 2,5 отсто до крајот на годината. Истото тоа го подразбираат и долгорочните приноси, на пример приносот на германските 10-годишни обврзници е малку над 2,3 отсто, што е за 0,6 процентни поени под минатогодишниот врв.