.webp){kind=icon}
Поранешната сопруга на милијардерот Берни Еклстон основаше компанија за управување со богатството што го стекна по разводот со магнатот во мотоспортот. Со ова Хрватката Славица Радиќ, поранешна Еклстоун, се приклучи на редот на супербогатите жени кои решиле да ја преземат контролата над своето богатство.
Според податоците од регистарот, фирма именувана со нејзините иницијали била основана на крајот на минатата година. Шеесет и шестгодишната Радиќ се избори за една од најголемите спогодби за развод во британската историја во 2009 година, по повеќе од две децении брак со долгогодишниот извршен директор на Формула 1.
На нејзината фирма со седиште во Лондон неодамна и се придружи ветеранот на „ХСБЦ Холдингс“ (HSBC Holdings), Фредрик Небранд како главен инвестициски директор, велат неименуваните извори. Компанијата, која го промени своето име во „Елм Ков“ (Elm Cove) на крајот на 2023 година, е управувана и од Стефан Ле Маркуанд, раководител на одделот за инвестиции во лондонската „Хајверн“.
Радиќ не сакаше да го коментира нејзиниот деловен потфат, а спогодбата за развод и донесе повеќе од 700 милиони фунти (околу 815 милиони евра), со што стана една од најбогатите Хрватки.
Таа, инаку, беше важна алка во управувањето со богатството на Еклстоун, кое се зголеми додека беа во брак, особено откако поранешниот извршен директор на Формула 1 одлучи да продаде дел на приватни инвеститори, меѓу кои и инвестицискиот гигант „ЦВЦ Капитал Партнерс“ (CVC Capital Partners).
Таа го запознала Еклстоун во 1982 година на италијанското Гран При во Монца и помогнала во управувањето со семејната фондација основана од сега 93-годишниот претприемач, која до пред десет години имала имот вреден околу пет милијарди долари. Право на управување имаа и нивните ќерки Тамара (39) и Петра (35).
Берни Еклстон/Bloomberg Mercury
Еклстоун, кој ја контролира Формула 1 од 1970-тите, се повлече од функцијата извршен директор во 2017 година, откако „Либерти Медиа“ на Џон Мелоун ги купи правата за трки со мотори од ЦВЦ за околу 4,4 милијарди долари.
Радиќ и Еклстоун во тоа време веќе беа разведени поради „неговото неразумно однесување“, се наведува. Еклстоун, исто така, не успеа во залудниот обид да ги скрие финансиските детали за нивниот развод од британските даночни службеници како дел од истрагата што заврши во 2023 година.
Други жени меѓу супербогатите во светот, како Опра Винфри, кинеската претприемачка Ву Јаџун и канадската наследничка Алана Вестон, исто така основаа семејни инвестициски компании преку развој на нивната кариера или на други начини.
Според истражувањето на „Мекинзи“ (McKinsey), на почетокот на оваа деценија тие управувале со речиси една третина од инвестициските средства во Западна Европа, а до 2030 година се очекува тој удел брзо да расте. Меѓу 500-те најбогати луѓе во светот, според индексот на милијардери на „Блумберг“, 66 се жени, од кои 18 во Европа. Наследничката на „Лореал“ (L'Oréal), Французинката Франсоаз Бетенкур Мејерс, минатата година стана првата жена со богатство од повеќе од 100 милијарди долари.
