Украински стартап доби милион евра, еден од сопствениците е на фронтот

И покрај војната во Украина, која веќе навлезе во втората година, стартап-системот во земјата се покажува тврдоглаво отпорен и не подлегнува на воените предизвици. Напротив, неколку поголеми стартап-компании се фокусираат кон ширење на странски пазари, за што секако им е потребно соодветно финансирање.

Последен таков пример е стартапот „Финмап“ (Finmap), платформа за управување со готовински текови со седиште во Украина, кој успеа да обезбеди финансирање од еден милион евра. Главниот инвеститор во целата приказна е „СМОК венчрс“ (SMOK Ventures), чиј основачки партнер Борис Мусилак вчера објави за последниот потфат.

„Исклучително сум возбуден што можам да ја објавам нашата прва инвестиција во Украина. 'Финмап.онлајн' (Finmap.online) е стартап што обезбедува алатка за управување со готовински тек за мали и средни претпријатија“, напиша Мусилак на својот профил на Линкедин.

Според него, приказната за „Финмап“ е многу повозбудлива од самата заработка на нејзините основачи.

„Александар и Иван (двајца од тројцата коосновачи на стартапот) првпат ги сретнав во ноември 2021 година, кога тие сè уште ја подготвуваа првата рунда финансирања. Иако бев импресиониран од нивната посветеност и раст, тогаш не можев да инвестирам поради формалните ограничувања на мојот претходен фонд, насочен на Полска“, почнува да раскажува Мусилак.

„Сите знаеме што се случи во февруари 2022 година. За ’Финмап’, руската инвазија не значеше само губење на рускиот пазар (кој тие целосно го отсекоа) и поголемиот дел од домашниот украински пазар (кој во основа престана да функционира поради војната), туку еден од неговите коосновачи, Иван, ѝ се придружи на украинската војска во борбата против рускиот агресор“, вели Мусилак и истакнува дека повеќето претприемачи, дури и тие екстремно издржливите, би се откажале во овој момент.

„Но не и Алекс. Наместо затворање, тој упати повик за агресивно проширување на европските пазари. Денес 'Финмап' дури една третина од приходите ги остварува на странски пазари, а тоа е раст од 300 проценти на годишно ниво, и тоа за време на војна“, додава Мусилак.

Повеќе нови пазари се во фокусот на „Финмап“

Фокусот на стартапот сега се неколку странски пазари, како Полска, Турција, Шпанија и Латинска Америка. Успехот на рундата финансирање на „Финмап“ на некој начин е доказ за решеноста на основачите да изградат успешен финтек-бизнис, а во исто време да се борат за иднината на својата земја, со оглед на тоа дека еден од коосновачите е речиси постојано на бојното поле.

„Алекс и Иван се токму такви претприемачи што сакам да ги поддржувам како 'СМОК венчрс'. Отпорни, бестрашни, никогаш не се откажуваат и секогаш размислуваат за доминација во светот. Многу сум горд што можам да објавам дека мојот фонд ја предводеше најновата рунда на 'Финмап', проследена со други неверојатни фондови и луѓе“, забележува Борис Мусилак.

Во големото друштво, покрај главниот инвеститор „СМОК венчрс“, се приклучуваат и чешката „Престо венчрс“ (VC Presto Ventures), инвестициската компанија „Капитал џенетикс“ (Capital Genetics), извршниот директор на ТБИ (TBI bank), Петр Барон и други.

Поголемиот дел од собраните финансиски средства ќе се користи за проширување на компанијата. Нејзините основачи во Турција гледаат повеќе можности за развој и напредок, а Полска ја сметаат за сигурен пазар на некој начин, бидејќи уште пред војната имале многу клиенти на тој пазар.

Првичната мобилна апликација на „Финмап“ беше објавена во 2022 година, а овозможува брзо и лесно внесување финансиски податоци и управување со личните средства на претприемачите. Досега над 2.500 бизниси ја користат оваа апликација за секојдневно финансиско управување. Во текот на минатата година бројот на странски клиенти се зголеми тројно, од 11 на 36 проценти, додека украинските претприемачи сè уште го сочинуваат мнозинството клиенти, дури 64 отсто.

Финтек-стартапот е основан во 2019 година, а првите инвестиции ги доби во 2020 година, во форма на државен грант даден од Украинскиот стартап-фонд (УСФ), кој го финансираше проектот со 50.000 американски долари.

Извршниот директор на банката ТБИ, Петр Барон, дебитира со инвестиција во проектот на почетокот на 2022 година и продолжи со својата поддршка во оваа најнова рунда, за што исто така веднаш објави на својот профил на Линкедин.

Покрај планираното освојување нови пазари, „Финмап“ најавува и нови области во кои може да се прошири, како што се алатките за фактурирање.

Напредокот на стартап-екосистемот во Украина

Украинскиот стартап-екосистем напредуваше пред војната и постигна голем раст, со тоа што украинските стартапи собраа 832 милиони долари од финансирање од приватни инвеститори во 2021 година. Ваквиот тип финансирање постојано растеше пред војната и има повеќе од 50 фирми што продолжуваат да работат во земјата, пишува „Тех кранч“ (Techcrunch).

Според истражувањето на самата украинска технолошка индустрија, денес во Украина има околу 228.000 члена на технолошката индустрија, а главните технолошки центри се наоѓаат во Киев, Лавов, Харков, Днипро и Одеса. Во текот на минатата година дури 57.000 беа принудени да се преселат во странство, а околу 7.000 се приклучија во редовите на вооружените сили или единиците за територијална одбрана и денес се борат на фронтот против агресорот.

Како знак на неверојатната отпорност на Украинецот на бојното поле, но и надвор од него, во првите 10 месеци од 2022 година извозот на ИТ-услуги на Украина порасна за 9,9 проценти во однос на истиот период од претходната година и донесе повеќе од шест милијарди долари приход, што е за 542 милиони долари повеќе од приходите остварени во 2021 година.

И „Тех Јукреин“ (TechUkraine) и „Имрџинг Јуроп“ (Emerging Europe) објавија резултатите од истражување за стартап-екосистемот на Украина. Според нивните анализи, и покрај тековната војна, украинските стартап-компании покажале огромна цврстина. Иако некои украински стартапи се преселиле, сепак огромното мнозинство задржало барем дел од своите операции или од тимот во Украина. А, повеќе од половина продолжуваат со својата работа исклучиво од Украина.

Но над 90 проценти од украинските стартапи велат дека им е потребна финансиска поддршка за да ја преживеат војната. За среќа, пошироката технолошка индустрија во последната година се обедини околу Украина.

„Гугл“ (Google) испорача грант за 25 стартапи за да им помогне да продолжат со работа и да растат. За првпат, како дел од „Хоризонт Европа“, ЕУ ќе вклучи целна поддршка за Украина од 13,5 милијарди евра за истражување и иновации, кои државата ќе треба да ги потроши оваа година. Украинската влада исто така има низа неповратни грантови и друга поддршка за својот технолошки сектор и покрај тоа што мора да ја финансира војната.

Само во последната година се појавија два нови стартапа. Украина сега се гордее со најмалку шест стартапи чија вредност е поголема од една милијарда долари, а тоа се „Гил лаб“ (GitLab), „Грамарли“ (Grammarly), „Џенезис“ (Genesis), „Битфури“ (Bitfury), „Пипл.аи“ (People.ai) и „Фајрфлај аероспејс“ (Firefly Aerospace).