.webp){kind=icon}
Ниските каматни стапки и владиниот стимул што доведоа до рекорден профит од тргувањето на Волстрит за време на пандемијата можеби избледеа, но нестабилноста останува висока, што создава огромни богатства.
Еден од оние што искористи е Алекс Герко, основач на квантитативната трговска фирма XTX Markets. Неговата компанија со седиште во Лондон, на дневно ниво управува со акции, суровини, валути и фиксен приход од речиси 300 милијарди долари. Компанијата исплати дивиденда од скоро 1,3 милијарди фунти (1,6 милијарди долари) во март - над трипати повеќе во однос на претходната година, според извештаите поднесени до трговскиот регистар на Велика Британија.
Почнувајќи од 2020 година, повеќе од две милијарди фунти од тие дивиденди заминале кај компанија регистрирана на Кајманските Острови контролирана од Герко, помагајќи му да изгради богатство од шест милијарди долари, според индексот на милијардери на „Блумберг“.
Тим Моксон, портпарол на XTX, одбил да коментира за богатството на Герко.
Promo / DepositPhotos
Подемот на Герко (43), кој ја основа XTX пред седум години и поседува 75 отсто од компанијата, беше брз. Русинот, кој сега е британски државјанин, докторирал математика на Московскиот државен универзитет. Герко ја започнал својата кариера во тргување со акции во „Дојче банк“, а подоцна се префрлил на девизно работење. Напуштил во 2009 година за да се приклучи на хеџ фондот GSA Capital пред да ја отвори XTX.
Фирмата што тој ја изгради ги избегнува дискреционите трговци и наместо тоа настојува да автоматизира што е можно повеќе процеси користејќи статистички модели кои анализираат „илјади милијарди бучни опсервации“ на податоци за тргување.
Компанијата, чиј профит во 2021 година порасна за 42 отсто, на 667 милиони фунти, во однос на претходната година, се шири и има канцеларии во Њујорк, Париз, Сингапур, Мумбаи и Ереван. Во САД, Герко беше гласен поборник за забрана на плаќања со проток на нарачки, контроверзна практика во која маркет-мејкерите плаќаат посреднички услуги за трговија на нивните клиенти на мало.
XTX има изградено силна позиција кај девизните пазари и европските акции, вели Лари Таб, шеф за истражувања на структурата на пазарот во „Блумберг интелеџенс“.
„Тие се прошируваат и во американските акции, но пазарот е малку позатегнат“, додава тој.
Depositphotos
Неизвесноста околу пандемијата и руската инвазија на Украина доведе до бум на трговците на берзата. „Ситадел секјуритис“, фирмата за креирање пазари, основана од Кен Грифин, оствари рекордни 4,2 милијарди долари нето приход од тргување во првата половина на 2022 година, што е за 23 отсто повеќе од претходната година. Компанијата, која се натпреварува со XTX, беше проценета на околу 22 милијарди долари во јануарската рунда на финансирање.
XTX, која вработува повеќе од 170 луѓе, го шири богатството: околу 24 партнери во фирмата поделија добивка од 557 милиони фунти минатата година. Герко го води XTX со еден од извршните директори Зара Амролија, исто така поранешен член на „Дојче банк“.
Герко е основач и на непрофитната организација „Математичко образование за друштвена мобилност“ која обезбедува дополнителни образовни програми за средношколци. XTX, исто така, воспостави академска програма од 15 милиони фунти за студенти и истражувачи раселени поради рускиот напад.
Универзитетот Оксфорд неодамна објави дека XTX спонзорира нова програма за стипендии за кандидатки за докторат по математика, наречена „Маријам Мирзахани“, во спомен на животот на иранската математичарка која беше првата жена што освои Филдсов медал.
