Може ли рецесијата да ѝ стави крај на работата од дома?

На деновите на работа од дома можеби веќе им се гледа крајот.

Во тековната борба меѓу работниците кои сакаат флексибилност и шефовите кои се залагаат за враќање во канцеларија, претстојната рецесија може да го промени балансот на моќта.

Силниот пазар на труд во пандемијата значеше дека вработените се чувствуваат во добра позиција да бараат поволности или да ги напуштат своите работни места за подобри понуди. А компаниите, загрижени за задржување на кадарот, не сакаа да заземат силен став за враќање во канцеларија. Но, економскиот пад се заканува да ја наруши таа динамика.

„Компаниите ќе можат да ја искористат рецесијата и фактот дека нема многу достапни работни места за да ги преместат вработените во канцеларија“, вели Линдзи Дастон, главен оперативен директор во Find My Profession, компанија која е давател на услуги за кариера.

Илон Маск веќе бара од вработените во „Тесла“ (Tesla Inc.) да се појавуваат на работа 40 часа неделно, а директорите на банките во фирми како „Голдман сакс“ (Goldman Sachs) се залагаат за широко распространето враќање во канцеларија. 

Официјалната рецесија во САД сè уште не пристигнала. И пазарот на труд останува тесен, со невработеност блиску до петдецениско најниско ниво. Сепак, списокот на компании кои најавуваат отпуштања и паузи за нови вработувања продолжува да расте бидејќи тврдоглаво високата инфлација ги поттикнува Федералните резерви (ФЕД) да ги зголемат каматните стапки.

Bloomberg

 

Благодет за работодавците

Според Ден Корнфилд, професор по социологија, политички науки и американски студии на Универзитетот Вандербилт, рецесиите се благодет за моќта на работодавците над вработените. Тој вели дека американските работници ќе се вратат во канцеларија ако се доволно очајни.

Тековните преференци на вработените се јасни - тие сакаат да работат од дома. Неодамнешното истражување на „Мекинзи“ (McKinsey) покажа дека 58 отсто од Американците имаат можност да работат од далечина барем еден ден во неделата, а 35 отсто можат да го прават тоа секој ден. Меѓу оние на кои им е дадена шанса да работат од дома, 87 отсто ја користат. Во меѓувреме, флексибилниот работен аранжман е меѓу топ трите мотиватори за наоѓање нова работа.

Тука за да остане

Постои аргумент дека работата oд далечина е премногу вградена во очекувањата на вработените, особено за генерацијата З (Gen Z), за да биде елиминирана со рецесијата.

„Не очекуваме дека тоа ќе го намали нивото на флексибилност што го обезбедуваат работодавците“, вели Лорен Мејсон, виш директор за човечки ресури.

Давањето флексибилност за вработените е обично бесплатно за работодавците и може да им заштеди пари на канцелариски простор ако го прекинат закупот, објаснува таа. Дури и ако е задолжително одредено ниво на работа со присуство, нема смисла да се бара целосно враќање од пет дена, смета Ник Блум, професор по економија на Универзитетот Стенфорд.

„Овде се појавуваат вистинските проблеми, со стапки на усогласеност од под 50 отсто и мал или никаков бенефит“, додава тој.

Млади работници

Принудата на работа со присуство се смета и за брз начин за отуѓување на помладите работници. Овие вработени го ценат балансот помеѓу работата и приватниот живот повеќе од минатите генерации и не ги сакаат хиерархиските работни позиции, според Корнфилд. Оние без деца или големи финансиски обврски попрво може да дадат отказ наместо да се вратат во канцеларија.

Повеќе од 70 отсто од работниците на возраст од 18 до 24 години велат дека би размислиле да бараат друга работа доколку нивниот работодавец инсистира да се вратат во канцеларија со полно работно време, според неодамнешниот извештај на Институтот за истражување ADP.

Степенот на враќање во канцелариите најверојатно ќе зависи од тоа колку е лоша рецесијата, смета Џеј Зигмонт, основач на финансискиот советодавен сервис Live, Learn, Plan. Во моментот, отворените можности за работа ги охрабруваат работниците да бараат нови позиции доколку не се задоволни со протоколите на нивната компанија.

„Сè додека е таков ставот, мислам дека работодавците нема да можат да ги вратат луѓето“, додава тој.

 

Во моментов нема коментари за веста. Биди прв да коментира...

Остави коментар