Најголемите доставувачи на храна и онлајн супермаркетите во земјава лани свртеле над 3,7 милиони евра. Овој бизнис, заедно со лабораториите за ковид тестирање, е еден од најбрзо растечките од почетокот на пандемијата во март 2020 година.
Паниката која тогаш ја донесе вирусот, отвори нов правец во пазарењето. Затворени дома, во повеќедневни карантини, научивме дека доставувачите се едни од ретките во државата, кои заедно со медицинските лица, полицијата, пожарникарите и војската, имаат дозволи за непречено движење. Тоа, но и желбата да се избегне ризикот од турканиците кои се создаваа во маркетите, ни ја создаде навиката со еден клик да ги добиеме потребните производи на врата.
Блумберг Адриа ги анализира финансиските резултати на четири најголеми компании кои во главниот град се занимаваат со достава на храна и се останато што ви е потребно дома. Ги опфативме „Кликни јади“, „Корпа“, „Пакет“ и „Фуд гуру“.
Лидер во бизнисот е „Кликни јади“. Момците на велосипеди со големи торби на грбот од 2019 до лани успеале да ги зголемат вкупните приходи од нешто над 900 илјади евра на 2,5 милиони евра. Нето профитот на компанијата, лани изнесувал над 90.000 евра и е двојно поголем во однос на 2019. Со слична динамика расте и бројот на вработени, од 12 во 2019 година, на 32 лани.
„Фуд гуру“ не може да се мери со „Кликни јади“ по профит или број на вработени, но компанијата основана во периодот на пандемијата, лани „свртела“ над 300.000 евра. Сепак, годината ја завршила со загуба. Работата ја започнале со шест, лани имале осум вработени.
Освен стравот од Ковид, на менување на навиките влијаеше и проблемот во снабдувањето со основни производи кој се случи годинава. Имено, во април кога скопските маркети останаа без масло за јадење, онлајн супермаркетите ви ги доставуваа до дома потребните количини.
Затоа, ги анализиравме и финансиските резултати на два онлајн супермаркети: „Пакет“ и „Корпа“. Првата компанија е основана во далечната 1993 година и лани „свртела“ близу 930 илјади евра. „Корпа“ пак, е основана лани во август и за тие пет месеци од 2021 година не остварила приходи.
Сепак, оваа компанија има најголем основачки влог, од дури 170.000 евра. Останатите го имаат само законскиот минимум од 5.000 евра.
Просечните плати на вработените не се атрактивни. Лани се движеле од 15.500 денари (толку колку што тогаш изнесуваше законскиот минималец во земјава) до 25.500. Сепак, познавачите на бизнисот велат дека примањата зависат од сработеното, односно вработените добиваат и процент од вредноста на нарачките.
.webp){kind=icon}
Во моментов нема коментари за веста. Биди прв да коментира...