Растечката инфлација ја ограничува ценовната моќ на телекомуникациските компании и во следниот период клучниот фокус ќе биде ставен на контролирање на трошоците. Аналитичкиот тим на „Блумберг Адрија“ очекува да продолжи трендот на раст на приходите од продажба (top line) во целиот сектор, но под нивото на инфлацијата за оваа година. Профитабилноста сепак ќе биде под притисок на генералното слабеење на економските активности, а притисок ќе има и на потрошувачката на телекомуникациските услуги, особено во купувањето нови уреди и опрема. Во оваа анализа посебен осврт се дава на показателите за работата во првите девет месеци на „Македонски телеком“, компанија со најголемо пазарно учество.
„Телеком“ бележи раст на приходите од продажба од 5,5 отсто во овој период во однос на истиот период минатата година, додека трите квартали ги заврши со пад на добивката пред оданочување (EBITDA) од дури 3,7 отсто и пад на EBIT за 13,5 отсто. Во анализираниот период, секоја трошковна категорија има раст.
„’Македонски телеком’ бележи едноцифрен раст во профитабилноста (bottom line) во последните три години. Во овие три квартали, најзначајниот ефект на продажбата произлегува од пазарот на мобилни услуги, која бележи раст од 6,9 отсто. На страната на трошоците, најголем е порастот во трошоците за електрична енергија, кои се зголемиле за над 250 отсто. Со оглед на тоа што трошоците за струја се шест отсто од приходите од продажба, оваа ставка не е во толкава мера загрижувачка. Растот на оперативните расходи од 10,6 отсто, а во рамките на расходите и порастот на COGS (трошоците од работењето), за 30,6 отсто во овие девет месеци во однос на истиот период лани е поголема причина за грижа, затоа што значајно ја надминува стапката на раст на приходите“, вели Илија Нешиќ, корпоративен финансиски аналитичар во „Блумберг Адрија“.
Нешиќ додава дека главен двигател на растот на трошоците се растот на цената на специјализираните суровини за оваа индустрија и исклучително силната конкуренција на пазарот. Инаку, просечниот приход по корисник се намалил за 5,5 отсто во однос на истиот период минатата година, иако бројот на корисници е во пораст. Тоа се должи, како што смета аналитичкиот тим, примарно на слабеењето на припејд-сегментот.
„Вреди да се спомене дека вкупните капитални вложувања се зголемиле за 45 отсто во однос на деветте месеци лани. CAPEX изнесува дури 29 отсто од приходите на продажбата. Инвестициите беа фокусирани на оптичката мрежа, ширењето на инфраструктурата и на инвестициите поврзани со 5Г. Капиталните инвестиции бараат високо ниво оперативна готовина, а исплатливоста ќе се види на долг рок. Воведувањето на 5Г, најмногу поради брзината што ја овозможува, е неопходно заради одржувањето на бројот на корисници и на позицијата на пазарот во иднина (’Македонски телеком’ има 49 отсто од уделот на македонскиот пазар)“, велат од аналитичкиот тим на „Блумберг Адрија“.
Во очекувањата за работењето, аналитичарите потенцираат дека приходите ќе се зголемуваат, а профитабилноста ќе биде под притисок на слабеењето на економската активност.
„Растечката инфлација има ефект врз работата на целиот сектор. Тој ефект е зголемен и од високото ниво на конкуренција на пазарот. Предизвиците во синџирот на снабдување, особено чиповите, може да го забават обртот на резервите. Понатамошното поскапување на суровините и на енергентите може да притиска на профитабилноста. Континуираните инвестиции во капитал за 5Г, на пример, ќе бараат и високо ниво на оперативен готовински тек (cash flow)“, вели Нешиќ.
.webp){kind=icon}
