Сака ли Маск и натаму да биде извршен директор на „Тесла“?

Илон Маск неодамна во неколку наврати изјави дека не сака да биде извршен директор на „Твитер“ (Twitter).

Тоа го кажуваше пред, но и откако застана на чело на петтата компанија под негово водство, што се чини дека е премногу, барем за акционерите на „Тесла“ (Tesla).

Од 4 април, денот кога Маск откри дека презема удел во „Твитер“, компанијата за автомобили и чиста енергија, која сочинува една третина од неговото нето-богатство, изгуби околу 749 милијарди долари од пазарната вредност.

Дури и по јавното гласање за тоа дали Маск треба да ја напушти главната позиција на „Твитер“, при што корисниците се изјаснија дека треба, не завршија страдањата за „Тесла“. Преплаќањето за „Твитер“, користејќи десетици милијарди акции на „Тесла“, се покажа како многу лош потег.

Кога акционерите или луѓето од бордот на директори на „Тесла“ ќе одлучат дека е доста? Некои веќе го направија тоа.

„Како приврзаник на Илон, инвестирав поради него. Се разбира, сакам Илон да биде извршен директор, но тој ја напушти 'Тесла'“, рече Лео Когуан, еден од најголемите акционери на „Тесла“.

Гласањето преку Твитер, кое Маск рече дека ќе го почитува и дека ќе ја напушти позицијата кога ќе најде соодветна замена, не е единствената критика на негова адреса во последно време. На неодамнешниот собир на американските бизнис-лидери беше спроведена анкета на повеќе актуелни теми и Маск не помина баш најдобро. Дури 98 отсто од колегите посочиле дека за „Твитер“ е платено премногу, 79 отсто сметаат дека тоа ќе биде штетно за вредноста на компаниите со кои управува, а 56 отсто сметаат дека компаниите треба да престанат да се рекламираат на Твитер.

Џефри Соненфелд, кој е задолжен за програмите за лидерство на факултетот за менаџмент „Јејл“, признава дека Маск имал големи технолошки триумфи, но и дека секој од нив може да се спореди со десет неуспеси кои медиумите ги држат во втор план поради, како што вели, блескавите нови објекти што забавуваат и го одвлекуваат вниманието.

Bloomberg Mercury

„Каде е флотата од милион роботакси за кои Маск пред четири години најави дека ќе бидат на улиците уште пред три години? Каде е роудстерот што наводно требаше да лета со погон на мотори од 'Спејсекс' (SpaceX) на задните седишта? Прототипот беше прикажан пред пет години, а лансирањето беше ветено за пред две години. Пазарот сè уште чека“, набројува Соненфелд.

Минатата недела Маск објави на Твитер дека на „Тесла“ ѝ оди подобро од кога било, но дека не ја контролира американската централна банка.

„Тоа е вистинскиот проблем овде“, напиша тој.

Bloomberg Chartmaker

Се чини дека инвеститорите не се уверени во тој аргумент, можеби затоа што тој понуди премногу докази дека е преокупиран со „Твитер“.

Дента кога падна од првото место на индексот на милијардери на „Блумберг“, Маск помина речиси половина час зборувајќи на Твитер за вештачката интелигенција, неговиот пристап кон користење и управување со социјалните мрежи и за тоа колкава казна заслужува Сем Банкмен-Фрид.

„Тесла“ дојде дури на крајот.

„Зборувајќи за 'Тесла'... имам состанок таму, на кој доцнам, па морам да скратам“, рече Маск.