На годинешната листа на „Гласдор“ (Glassdoor) на 100 најдобри места за работа доминираат технолошки компании, но два редовни члена на листата, „Епл“ (Apple) и „Мета“ (Meta), овој пат не се вклучени.
Повеќе од 40 отсто од компаниите на годинешната листа се во технолошката индустрија и покрај бранот на отпуштања што го зафати овој сектор. „Гласдор“, платформа за анонимни рецензии на работодавци, секоја година објавува список на американски компании што се истакнале и собрале позитивни критики од повеќе од илјада вработени во текот на претходната година. Лани и „Мета“ и „Епл“ беа на средината на топ 100 листата. Оваа година на врвот на листата се најде софтверската компанија „Гејнсајт“ (Gainsight), која за првпат се појави на списокот.
„Технолошкиот сектор и натаму е најзастапен на листата“, вели главниот економист на „Гласдор“, Даниел Жао. „Меѓутоа, во исто време, тој сектор беше во возот на смртта во текот на 2022 година“. Со оглед тоа што некои компании отпаднаа од списокот, а други за првпат влегуваат на него, тој вели дека ова е „убав потсетник дека тешките времиња често доведуваат до промени во составот - компаниите што се потпираат на старите методи може да пропаднат, а новите компании во време на криза често растат“.
Ранг-листата на „Гласдор“ за десетте најдобри работодавци во САД / Bloomberg
Ова е првпат „Епл“ да не се најде на листата откако„Гласдор“ почна да ја објавува во 2009 година. „Мета“ е на ранг-листата од 2011 година и трипати го зазема првото место, што последен пат се случи во 2018-та. Единствените две компании што се на листата секоја година, 15 години по ред, се „Гугл алфабет“ (Google Alphabet) и „Бејн енд компани“ (Bain & Company).
И „Мета“ и „Епл“ се соочија со предизвици во текот на изминатата година. „Мета“ укина повеќе од 11.000 работни места со префрлање на својот фокус на метаверзумот. „Гласдор“ ги зема предвид деловните перспективи на компанијата, а промената во стратегијата ги остави вработените „малку несигурни што точно ќе се случува“, објаснува Жао. Отпуштањата може да влијаат на моралот на вработените и на тој начин да предизвикаат долгорочна штета на угледот на работодавецот.
Фактот дека не котира на листата, „Епл“ може да ѝ го припише на одредбата за враќање на вработените во канцелариите, што се наведува и во рецензиите на работниците. „Вработените навистина ја ценат можноста да работат од далечина или барем хибридно“, посочува Жао. „Притисокот врз вработените да се вратат во канцеларија не беше дочекан со особена радост“, додава тој.
Дебитантот на листата на „Гласдор“ се занимава со изработка на платформи за кориснички услуги, производи и ангажман во заедницата. Во своите прегледи, вработените го истакнуваат транспарентното лидерство на компанијата, различноста и инклузивноста, можностите за напредување во кариерата и флексибилноста - од работа од далечина до неограничени платени слободни денови. Основана во 2009 година, „Гејнсајт“ им нуди софтвер на стотици компании, при што од фирмата нагласуваат дека се приспособени за работа од далечина и дека „ги ставаат луѓето на прво место“.
„Во време на криза, ова често е можност за ваквите компании да се етаблираат“, вели Жао. „Најдобрите компании ќе направат сè за да се осигурат дека секој дел од искуството на вработените е најдобар во класата“.
.webp){kind=icon}
