Германскиот производител на автомобили „Фолксваген“ (Volkswagen) бара од вработените да минат низ забавно-едукативно искуство познато како соба за бегство (анг. escape room) за да ја намалат вознемиреноста од неизвесноста околу тоа дали ќе ги задржат своите работни места за време на транзицијата кон производство на електрични возила.
Најголемиот европски производител на автомобили инвестира 89 милијарди евра во нова технологија до 2026 година и спроведува проект во седиштето на компанијата во Волфсбург, кој треба да помогне околу 22.000 вработени да се префрлат на производство на електрични возила. Првата група ја сочинуваат 1.200 луѓе, кои ќе работат на моделот ID.3, чие производство треба да започне во втората половина годинава.
„Работиме на процесот на воведување на работниците во светот на е-мобилноста. За многумина сосема ново нешто е фактот што повеќе нема да има мотори со внатрешно согорување и мораме да ги обучуваме луѓето за високонапонско опкружување“, вели раководителот за човечки ресурси во „Фолксваген“, Гунар Килијан.
Во просторот дизајниран како соба за бегство во Волфсбург, групи по четворица вработени треба да решаваат загатки додека се движат низ светот на технологијата за производство на батерии и електрични возила. Почетокот на приказната е во 1860 година, а потоа се развива до денешната точка и можните идни сценарија за развојот на автомобилската индустрија.
Покрај моделот ID.3, „Фолксваген“ планира да произведе најмалку уште два електрични модела до 2026 година. Тоа ќе биде новиот теренец „тигуан“ (Tiguan), а потоа и ново возило од истата категорија што ќе го замени проектот за електрични возила „тринити“ (Trinity), одложен за најмалку две години поради софтверски проблеми.
Во Волфсбург инвестицијата во фабриката за производство на електрични возила е вредна 460 милиони евра, од кои дел ќе биде потрошен за обука на вработените.
.webp){kind=icon}
