„Нестле“ (Nestle SA) објави дека една третина од нејзината продажба не ја исполнува независната дефиниција за здрава храна. Компанијата примени тест за нутриционистичка оценка во своето портфолио на производи. Откритието покажува дека „Нестле“ има простор за подобрување, бидејќи има цел да биде врвна компанија за здрава и велнес (анг. wellness) храна.
„Нестле“ денеска соопшти дека, според системот за рејтинг „Хелт стар рејтинг“ - ХСР (Health Star Rating), 30 проценти од портфолиото на швајцарската компанија се смета за здраво, а 35 отсто за нездраво. Остатокот производи се однесуваат на храна за домашни миленици, формули за доенчиња и производи за медицинска исхрана, кои не беа тестирани, бидејќи се дизајнирани да исполнуваат специфични цели, како што е на пример помагање на функцијата на бубрезите.
Во однос на тоа колку се здрави и хранливи производите, прехранбените компании се под притисок наместо преку интерни метрики, да известуваат во согласност со независните мерки одобрени од владата. „Нестле“ одлучи да го користи системот ХСР, кој е широко користен во Австралија и Нов Зеланд и ги оценува производите што се на продажба доделувајќи им од половина ѕвезда до пет ѕвезди. Резултат од 3,5 ѕвезди или повеќе се смета за здрав.
Поголема транспарентност
„Шеар екшн“ (ShareAction), група за кампањи на инвеститори, која ја поттикна компанијата „Нестле“ кон поголема транспарентност, го поздрави новото истражување, иако ја повика фирмата да го подобри своето рангирање.
„Како една од најголемите компании за храна и пијалаци во светот, 'Нестле' има големо влијание врз тоа што луѓето го јадат и пијат. Тоа што загрижувачки го покажува ова истражување е дека компанијата сè уште е премногу зависна од продажбата на помалку здрава храна и пијалаци“, рече Холи Габриел, активист на „Шеар екшн“.
Оцените се базираат на енергијата на производот, заситените масти, вкупните шеќери, натриумот, протеините, диететските влакна и содржината на овошје, зеленчук, јаткасти плодови и мешунки. Производите како кондиторски производи или солени сосови имаат пониски резултати на скалата, додека производите со малку маснотии, малку сол и шеќер, вклучувајќи ги и обичното кафе и вода, имаат подобри резултати.
Зголемената транспарентност им помага на инвеститорите да разберат колку компаниите се изложени на напорите за спречување на прекумерната тежина на луѓето, на пример, преку забрани за рекламирање. Тоа исто така го засилува притисокот врз компаниите да ги преформулираат производите за да ги направат поздрави.
Иако „Нестле“ има простор да се подобрува, поголемиот дел од неговата продажба не би бил во согласност со законодавството против нездрава храна, бидејќи станува збор за храна за домашни миленици, производи како формули за бебиња или продукти што се сметаат за релативно здрави.
Ривалите „Данон“ (Danone) и „Унилевер“ (Unilever) веќе известија за своите портфолија во согласност со ХСР. „Данон“ објави дека во 2021 година околу 90 проценти од нејзините производи, според обемот на продажба, добиле оценка од ХСР од 3,5 ѕвезди или повеќе. Од портфолиото за исхрана и сладолед, пак, на „Унилевер“, само 17 отсто од асортиманот производи го достигнаа тој стандард за истата година.
„Нестле“ ги преформулираше производите како „несквик“ (Nesquik) да содржат помалку шеќер на некои пазари, но главниот извршен директор Марк Шнајдер им рече на аналитичарите претходно оваа година дека известувањето за исхраната не значи дека групата ќе се откаже од производи како „киткат“ (KitKat) и „смартис“ (Smarties).
„Не сме заинтересирани за целта за тоа дека поздравите делови од портфолиото треба да ги надминат другите делови од портфолиото. Сакаме да успееме и во двете“, рече тој.
„Нестле“ информира дека студијата покривала 97 проценти од нејзиниот приход, исклучувајќи некои производи што не се храна или пијалаци, како и некои неодамнешни аквизиции.
.webp){kind=icon}
